Col 3
3
1Qu'mtzun ayekye' oje che jaw anq'ine' tuk'i'l Krist, kkjyome' ti'xti' te toj kya'j, ja q'uqla'ya' Jesukrist toj tb'a'nq'ob' Dyos. 2Atzu' che ximanaye' kyi'ju' ti'xti' ate' toj kya'j, myatzu' kyi'ju' ti'xti' te twitz tx'otx'. 3Qu'n ayekye' oje che kyime' junx tuk'i'l Krist, k'u'nte kychwinqlale' tu'n Dyos junx tuk'i'l Krist. 4Qu'n aku'te Krist kychwinqlale'. Naqa sulte Krist ex ikxkye' che tenb'ile' tuk'i'l junx toj tajwalil.
Aju' ojtxi' chwinqlal exju' ak'a'j chwinqlal
5Qu'mtzun ktzaqpinkje' myab'a'n nkb'incha'n xjal twitz tx'otx': lalun che ajpajine', lalun kub' ktz'ilsa'n kyanmiye', lalun pon kk'u'je' ti'ju' myab'a'n ex lalun che jamjone', qu'n ate jamjoni'n ikx tz'ela se'n qo k'ulun kye witzileb'. 6Qu'n tu'n tpaj tkyaqil ja'lu tzula tz'e'ysb'il witzb'aj tu'n Dyos kyib'aj kkyaqilju' mixti' xikyoksla'n tyol Dyos; 7qu'n intoq kb'incha'njuye' lu tej tqe'xtoqe' toju' ojtxi' kychwinqlale'. 8Atzun ja'lo kq'onkje' tkyaqil ja'lu: lalun che tx'u'jine', lalun nok kb'incha'ne' taq'wix te juntl, lalun che oktene' ik'lelte juntl ex lalun che q'man xlab'yole'. 9Lalun che chanyole' kxolilexe', qu'n matxina' kyej ktzaqpi'ne' ojtxi' kychwinqlale' exju' taq'wixil intoq kb'incha'ne' ojtxi', 10ex matxi' tzok kyoksa'ne' kyi'je' ak'a'j: matxi' che oke' te ak'a'j ichan, atl junjun q'ij xi' kyokye' te tilb'ilal Dyos Ch'isalkyeye', tu'ntzun telxi'x kynik'e' ti'j Dyos. 11Atzuntzu' lay q'ancha'lixa'tl alkye xjal Kryek mujqa aj Juda, alkye xjal tok techil ti'j tchib'jil mujqa mya, alkye najchaq xjal, mujqa xjal mixti'x ch'i'n b'a'n tu'n, alkyeju' lq'o'n majen mujqa tzaqpi'n, qu'n tkyaqil ja'lu mixti'xte' toklen, ate Kristju' ati toklen kyib'aj kkyaqil ex ati kyuk'i'l kkyaqil.
12K'u'jla'nqe'ye' tu'n Dyos ex matxi' che jaw sk'o'ne' tu'n te xjan ttanam. Tzaj q'aq'anx kyk'u'je' kyi'j txqantl, che okxe' b'a'nwnaq, che okxe' me's, che okxe' mans ex tenx kypasense'. 13Tzik'xkyu'ne' tkyaqilju' myab'a'n nok b'incha'n kyeye' kyu'n txqantl ex knajsanku'ye' kyile' kxolilexe'. Ikse'nte Qajaw makub' tnajsa'n kyile', ikxtzunkye kyb'incham. 14Tib'ajxi' tkyaqil ja'lu, kyk'u'jlam kyib'e', qu'n tu'nju' tk'u'jlalil ati mujb'ab'l qxol. 15Awttzun tnak'b'il Krist ten toj kyanmiye', qu'n a tb'is tk'u'j Dyos ẍettxokye' tu'n kyokye' te junx xmilal. Kyq'onxtzun chjonteye' te Dyos kukxju'.
16Awttzu'n tyol Qajaw Jesukrist ten toj kyanmiye' kukxju'. Kyxnaq'tzam kyib'e' ex kyq'onx kynab'le' kyxolilexe', ex tenx kynab'le'. Che' kyb'itzanxe' salmos tu'n tkyaqil kyanmiye', kyuk'i'l b'itz te ninb'ilte Qman Dyos ex aq'b'il chjonte te. 17Ex tkyaqilju' ma kyb'inchaye' mujqa ma kymaye', kyb'inchanxe' toj tb'i Qajaw Jesukrist, ex kyq'onxe' chjonte te Dyos Manb'aj noq tu'nel Jesus.
Se'n tu'n qanq'ina qxolilex
18Aye'ye' qya, che b'inqeye' kye kychmile', qu'n ilti'j tu'n kb'inchanteye' lu tu'nju' okslalqeye'. 19Ex ikxqekye' chmilb'aj kk'u'jlame' kxu'jile' ex lalun che oktene' ililkye kuw.
20Aye'ye' k'walb'aj, che okslanqeye' te kmane' ex te ktxuye', qu'n aja'lu b'a'n nela' toj twitz Qajaw. 21Aye'tzunkye' manb'aj lalun tz'ok kq'o'ne' ttx'u'jil kk'wale', tu'ntzun lalun tzaj b'is toj kyanmi.
22Aye'ye' lq'o'n majen che okslanqeye' kyeju' tajaw aq'untl alchaqxkyeku', mya o'kxju' se'n nche' ka'yink kyi'je', naqxwit tu'n kykyeje' b'a'n kyuk'i'l, che ajb'enqekye' tu'n tkyaqil kyanmiye' ex tenx tchiylal Dyos kyeye'. 23Ex tkyaqilju' ti'ixti' makb'inchaye' kb'inchame' b'a'n, nakuxwitloj in kb'incha'ne' te Dyos ex mya kye xjal. 24Qu'n b'i'ntlkye' kyu'n qa ktzajel tq'o'n Qajaw jun etzb'il kyeye' te tu'me'l t-xel teju' kyajb'eb'le'. Qu'n tena' Krist Qajawxi'x nche ajb'ena'ye'. 25Ex atzunju' nb'inchante taq'wixil, tzul q'onju' tu'me'l t-xel te se'nxju' xtb'incha, qu'n ate Dyos k'okyel q'onte toj xjel ti'ju' tb'inchb'aj.
Currently Selected:
Col 3: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999