Hch CHIK'B'AB'L
CHIK'B'AB'L
Naqwit tz'ok qmujb'a'nju' u'j lu ajttzaj tzyet (1.1) tuk'ilju' tpakb'al b'a'n tu'n Lukas, q'ancha'lxi'x qa ax tmuju'. Aju' u'j lu a tkab' tneju' te tpakb'al b'a'n kub' ttz'ib'a'n Lukas. Qu'n ati jun tnej yol tib'aj tej tjawx Jesus toj kya'j toju' tuj Lukas inel yal jumajtl toju' u'j lu. Ate' toju' u'j te kyb'inchb'en apostl nyolin kyi'ju' knejel okslal eb'jo'k lpe ti'j Jesus, ex eb'ajx pakb'alte okslab'l, exi'x toj tnam Jerusalen, toj tkyaqil tnam Judey, ex eb'jik'x kanun toj tb'a'nq'ob'kya'j tu'me'l Samarya, ex yajxi'tzuntl eb'jo'kx kyoj tx'otx' mya kye aj Juda, toj Antyokyiy toj Sirya, ẍaqlu'nqetaq tu'n Xewb'aj Xjan. Yajxi'tzuntl, tu'nju' taq'un Pawl ntoq tpakb'an tyol Dyos, ximlen toj b'o's Asya ex okx kyoju' tx'otx' nimaq kyoklen toju' tq'ijlalil na'j, tnejelxi'x toj Kresya ex yajxi'tl toj Rom, tnejel nintnam. Atzuntzu' tzaja' qena' tpakb'etju' okslab'l ti'j Qajaw Jesukrist, ex yajxi'tl xi' mlen toj tkyaqil tx'otx' te tkub'ix q'ij, expe' tik'lenxi'ju' b'a'npun ab'q'i ximlen toj tkyaqil twitz tx'otx'.
Aye' Luch ex Pawl nche yolinjtz b'a'nxi'x toju' u'j lu. Atzunju' nimaqxi'x toklen toju' u'j lu aju' Xewb'aj Xjan, qu'n tu'nju' tipumal ex tu'nku' ẍe' jaw b'entaju' ojtxi' okslal, aku' Qajaw Jesukrist tq'uqlil ex aku' xkub' q'onte. Qu'mtzun tu'me'lxi'x in nelyal kab'naq lajoju' tb'i Xewb'aj Xjan toju' u'j lu. Aju' Xewb'aj Xjan ku'tz tuk'i'l tkyaqil tipumal kyib'aj kkyaqil okslal toj tq'ij Kab'naqlajoj q'ij toj Jerusalen, ex atxi'xtzunj mixti' nsikti tu'n kkuwsante ex kẍaqlunkye okslal exju' knejel toju' tq'ijlalil ti'xti' xjik' kyi'j tz'ib'a'n toju' u'j Kyb'inchb'en Apostl. Aju' ojtxi' okslab'l atzu' q'manjtza' kyoju' pakb'ab'l, ex aye'tzunju' ti'xti' tz'ib'a'nqe' toju' u'j lu nche yek'unte tipumalju' pakb'ab'l toj kychwinqlal okslal teyile junjun ex kychwinqlal te kkyaqil.
Aju' u'j kb'inchb'en apostl aq'pu'n tten toj oxe': (1) Aju' tnejel nyolin ti'j ttzajlen qen okslab'l toj Jerusalen (1.15—8.3) tb'ajlenxi'ju' tjawxlen Qajaw Jesukrist toj kya'j ex tej tkyej tq'o'nju' mankb'il tchaq'b'il ex tej tkyej ttziya'n qa ktzulel jumajtl (1.15—8.3); (2) atzunju' tkab' tnej nyolin ti'ju' tej txi' mlenju' okslab'l toj junjuntl tnej ktx'otx' aj Juda (8.4—12.25) ex atzun toju' toxi'n tnej (3) nyolin ti'ju' tej txi' mlen okslab'l kyoju' tx'otx' tku'qe'x toj ninnjab' ex pon kanunx toj tnam Rom: tnejel maj tqan Pawl pakb'alte tyol Dyos (13.1—14.28), ja b'aj kb'u'yina' kyib'ju' apostl ex tijwnaq toj Jerusalen (15.1-35), tkab' maj tqan Pawl pakb'alte tyol Dyos (15.36—18.22), toxi'n maj tqan Pawl pakb'alte tyol Dyos (18.23—21.16) ex nyolin ti'j tej tokx jpu'n Pawl toj kars Jerusalen, toj Sesarey ex mankb'il maj toj tnam Rom (21.17—28.31).
Currently Selected:
Hch CHIK'B'AB'L: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999