2 Ti 2

Jun b'a'n q'ojil te Qajaw

1Nky'ajul, kuwsam tib'a toju' t-xtalb'il Dyos tu'n tokslab'la ti'j Jesukrist. 2Aju' matxi' tb'iya b'ajx nxnaq'tza'ne' kye nim xjal, q'manxa kye okslal q'uqli kyk'u'jlalil, ju' kb'antel txi' kyxnaq'tza'n kye txqantl.

3Tzik'xtu'na toju' yajb'il kse'n jun q'ojil te Qajaw Jesukrist. 4Mixti' jun xjal te q'oj ati toj toklen inwt b'aj t-sku'ntltib' toju' taq'un tja, o'kxtzu' tu'n t-ximana'te' ti'ju' nxiq'ma'n te tu'n ati toklen tib'aj. 5Ex ikxju' xjal ojqelal, ajtokx kyxol ojqelal, lay b'ent tk'monte oyaj qa min sojqelan kse'nxju' nuk'b'il tib'aju' ojqela'n. 6Exju' aq'unal toj kojb'il, ati tu'n taq'unan nejtl tu'n tk'monte twitz taq'unb'en. 7Ximana ti'ju' nxinma'ne' teya lu, ex k'oninjtzela tu'n Qajaw tu'n tkane tyaqil toj twitza.

8Na'ntza Jesukrist, jaw anq'in kyxol kyimni ex tyajajil nimaqkawil Dab'i, kse'nxju' tpakb'al b'a'n npakb'a'ne'. 9Tu'ntzu'n npakb'a'ne' tpakb'al b'a'n nchin yajta'ye', expe' jpu'nqine' toj xpatx'i'n k'uxb'il ku'xi'xtej nim wile'; atzunte' tyol Dyos mya xmo'nte' toj xpatx'i'n k'uxb'il. 10Qu'mtzun nik'x tkyaqil yajb'il wu'ne' tu'n kykletju' sk'o'nqe' tu'n Dyos ex tu'n tten kychwinqlal tejumajx tu'n Jesukrist.

11Axxi'xte' yol lu:

Qama qokyim tuk'i'l Krist, ex qo anq'il tuk'i'l;

12qama tzik'xju' yajb'il qu'n, qo tenb'el toju' tkawb'il;

qama kub' qewa'n extzun qojtzqi'n, ex kb'el tewa'n qa ojtzqi'nqo' tu'n;

13qatzun min xjapun qokslab'l ti'j Krist, kjapumelte' Krist tyol,

qu'n lay kub' ttoqi'nte Krist tyol.

Jun b'a'n aq'unal

14Na'nxa kye txqantl ex q'manxa kyetwitz Dyos tu'n lalun che wulj. Mixti'te wulje'n tajb'en. A nb'aju' nt-xitu'n kynab'lju' nche b'in. 15Q'onk tilila tu'n ttena b'a'n twitz Dyos, kse'n jun aq'unal mixti' tu'n tkub' ch'ixwi, nxi' t-xnaq'tza'n tpakb'al b'a'n axxi'x. 16Lalun taq'a anb'il kyeju' yol mixti'x kyajb'en, qu'n aye' nche yolin ikju' nche'xxi'xtl toj il 17extzu'n kyxnaq'tzb'il nkub' puqli kse'n jun yab'il nq'ayj kychib'jil xjal tu'n. Ikytzun matxi' kyb'incha Imeney ex Pilet, 18mache eltxalpuj ti'ju' ax, nkyma'n qa majx matxi' qo ik' toju' kamik tu'n qten toju' chwinqlal, ex ate'k xitulkye junjun toj kyokslab'l. 19Atzunte Dyos oje kub' tq'o'n tq'uqlil ja layx yukchi, tz'ib'a'n yol ti'j kjalu: Tojtzqi'n Dyos alkyeqe'ju' te, ex Kykyaqilju' nche na'nte tb'i Qajaw lalun che b'inchantl il, chij.

20Mya tkyaqilju' ti'xti' ati tojun nin ja q'anpwaqqe' ex saqpwaqqe', ex ate' tze ex tx'otx'qe'; ate' junjun tb'anil kyajb'eb'l kyoj q'ij nim kyoklen, atzun txqantl myaxi'x tb'anilqe' nche ajb'en tkyaqil q'ij. 21Ikytzun qeju', qama qẍtilsaqib' te il ex te xnaq'tzb'il mya ax, qo okyel se'n jun ti'xti' tb'anil tajb'eb'l, qo ajb'el te Qajaw, b'a'nqo' tu'n tb'inchet tkyaqil b'a'n aq'untl.

22Pa'mil tib'a ti'ju' kyachb'il ku'xun, q'onk tilila tnik'alilti'j, okslab'l, tk'u'jlalil ex nak'b'il, junx kyuk'i'lju' nche k'ulun te Qajaw tu'n tkyaqil kyk'u'j. 23Lalun taq' anb'ila kye wulje'n mixti'x kynab'l; qu'n naq toj q'oj npona' b'aj. 24Jun tmajin Dyos mixti' tu'n tokten q'ojil; atipe' tu'n tok b'a'n xjal kyuk'i'l kykyaqil. B'a'nxi'x tu'n tq'on xnaq'tzb'il; ati tu'n tten tpasens. 25Ati tu'n ttzak'una toj me'sb'il kyeju' pi's, qaj xtaq' Dyos anb'il kye tu'n tanjtzti'j kyanmi ex tu'n telkynik' teju' ax, 26tu'n tel spiky'e' kyuk'i'l ex tu'n kytzaqpaj toju' xpatxab' jatzyu'na'qe' tu'n tajaw il tu'n kyb'inchante tajb'il.

Currently Selected:

2 Ti 2: MAMO

Highlight

Copy