1 R 7
7
Junjuntl ja jawtb'incha'n Salomon
1Jawtb'incha'n Salomon tja tkawb'il, ex japunb'aj toj oxlajoj (13) ab'q'i.
2Ex b'entju' tja kawb'il tu'n, tok tb'i K'ul te Lib'ano, te kab'naq jwe' (45) metr tnuqub', junaq kab'e' metr tk'i' nik'jan (22.50) tojt-ẍkyin, ex o'lajoj metr tk'i' nik'janju' (15.50) twe', ex tzyu'n tu'n kyaje' txol tqan k'uteqe', ja tkub'qeyaju' ptzo'n k'ute. 3Kab'naq jwe' (45) kyb'aju' tqul, oxe' tnej eb'jela', o'lajoj chaq (15) tqul junjun, eb'ajx kyib'aju' tqan. Ex jax q'o'n tapank k'ute kyib'aju' ptzo'n. 4Ate'toq oxe' txol tokex spik'un te oxox chaq kyten, tkub' jun twitz juntl. 5Kykyaqilju' tjpel ja exqe' tokexspik'un te kyajkyaj kytx'u'k junelni kyten ex tkub' jun twitz juntl, oxe' txol kyten. 6Ex jawtb'incha'n juntl ja te oyb'il ex twitztzunju' ja lu ekub' twab'i'n tqanja, te junaq kab'e' tk'i' nik'jan metr (22.50) tnuqub', atzun oxlajoj tk'i' nik'jan metr (13.50) toj t-ẍkyin. Ex jawtb'incha'n twi' juntl ja te ula twitzxi'. 7Ex b'entu' ja te kawb'il mujqa tja ttxolil kawb'il janxtuleta' il, ex b'jo'k tq'o'n tz'lan k'ute t-xeyile, tzajx twitz tx'otx' japumnix tqul ja.
8Atitoq tpenju' nin tja nimaqkawil Salomon ti'jxi', ex juntl ja ikxi'x b'inchb'enteju'. Extzunju' nin tja tmyal paraon jawtb'incha'n, ju' tzaj tiq'i'n te t-xu'jil, ati jun ja te oyb'il toj. 9Kykyaqilxju' ja lu tb'anil b'inchb'enkye, tzajnix kyq'uqlil ex japumnix kywi'xi', tzajnix kyi'jile pomni b'aj twi' tpen nimin, tb'anil ab'jile, jso'nqe' ex k'pu'nqe' b'a'nxi'x tu'n syer, ikxi'x kyi'ju' kse'n kyojxi'.
10Ikyqe'xju' kyq'uqlil tb'anil ab'jqe' ex nimaqqe', junjun te kyaje' metr tk'i' nik'jan (4.50 m.) kynuqub', atzun junjuntl te oxe' metr tk'i' masch'in nik'jan (3.60 m.). 11Tzajnixtzuntz tb'anil ab'jqe', b'incha'n ex echinqe', ex ttzeylal k'uteyile.
12Ex atitoq jun tapi te oxe' txol ab'j ex jun txol ptzo'n k'ute ti'jileju' nin pe'n, kse'nxju' tok ti'ju' b'o's pe'n tojxi' ex ti'ju' qokex toj tja Qman Dyos.
Xitq'o'n Salomon taq'un Iram aj Tiro.
(2 Cr 2.13-14; 3.15-17)
13Xitchq'o'n nimaqkawil Salomon tiq'ji Iram tzmajx Tiro, 14tal jun qya kyimni tchmil tyajajil Neptali ex tk'wal jun ichan aj Tiro, tojtzqi'nxi'x tu'n taq'unan ti'j q'ank'uxb'il. K'atzxi'x Iram, atixi'x tnab'l ex tojtzqib'l tu'n tb'inchante chukchaq aq'untl ti'j q'ank'uxb'il, pontzuntz twitz nimaqkawil Salomon ex tb'incha tkyaqilju' aq'untl. 15Kub' tb'incha'n kab'e' tqan ja q'ank'uxb'ilqe', wajxaq metr kywe' ex jwe' metr tk'i' nik'jan kyk'etz. 16Ex ikx tb'incha kab'e' tqankchan kyuk'i'l kyilb'ilal q'ank'uxb'ilqe' kywi'xi'. Te kakab' metr tk'i' ch'intl (2.25 m.) kywe' junjun tilb'ilal. 17Ex ikx tb'incha kab'e' k'uxb'il te kutxb'il xpatx'i'nqe', kyeju' tilb'ilal ate'qe'kx kywi'ju' tqan: junjun kutxb'ilte junjun tilb'ilal. 18Ex e'kub' tb'incha'n kab'e' txol tilb'ilal maẍlob'j ti'jile junjun, tu'n tktxet junjun tilb'ila kywi'xi' kab'e' tqan ja. 19Ch'intlmi kakab' metr kywe'ju' tilb'ilal kywi'xi' kyqan, naku'j b'echqe' xwakyi'n kyten. 20Ate'ktoq lajnaq (200) tilb'ilal maẍlob'j te kab'e' txol ti'jile junjunju' kutxb'ilte junjunju' tilb'ilal kywi'xi' tqan. 21E'kub' tq'o'n Iram tqankchan lu twitz tja Dyos. Tetzunj kykub' twab'a'n toju' kykb'el, oktq'o'n tb'iju' tqankchan te tb'anq'ob' Jakyin, atzu'n tqankchan te tnayaj B'oas. 22Ik kyka'yinx kywi' tqankchanju' kse'n b'ech liryo. Iktzu'n kyej b'enta'ju' aq'untl kyi'ju' tqankchan.
Tixti' toj tja Dyos
(2 Cr 4.1—5.1)
23Yajxi'tzuntl kub' tb'incha'n Iram jun nin tkb'el a' q'ank'uxb'il. Tolin ti'j ex kyaje' metr tk'i' nik'jan toj. Kab'e' metr tk'i' ch'i'ntl (2.25) twe', atzun oxlajoj metr tk'i' nik'jan (13.50) ttole. 24Ktb'incha' kab'e' txol tilb'ilal tzu tjaq'ile ttziju' nin tkb'el a', lajojchaq tzu ti'j ch'inxmi nik'jan metr (0.45 cm.). 25Atkub'toqju' nin tkb'el a' lu kyib'aj kab'lajoj (12) tman wakx q'ank'uxb'ilqe', xi' nche ka'yinxa' oxe' toj tb'a'nq'ob'kya'j, oxe'tl nche ka'yinx toj tnayajkya'j, oxe'tl nche ka'yinx toj tjawetzq'ij, ex oxe'tl nche ka'yinx toj tkub'exq'ij. Tokxile kyẍo'p tojxi', tkub'tzunju' nin tkb'el a' kyib'aj. 26Jwe' twiq'ob'aj tpimalju' nin tkb'el a', ik ttziyileju' kse'n jun b'ech liryo, jo'mutx' lajk'al (44,000) litr a' inb'ajx toj.
27Ex e'kub' tb'incha'n lajoj tq'uqlil q'ank'uxb'ilqe', ch'inxmi kab'e' metr (1.80 m.) chaq kynuqub', ex nimaq kywitz, atzun jun metr tk'i' ch'i'ntl (1.35 m.) chaq kywe'. 28Iky b'inchb'enkye tq'uqlil ja'lu: tku'xchaq kyxol tzyu'nileqe' tu'n kyqul, 29ex b'incha'nqe'toq kyilb'ilal b'alun, tman wakx e'kyerb'in kywitzju' kyxol kyuk'i'l kyqul. Ate'toq tilb'ilal b'ech kyirnalda kyib'aj ex kyjaq'u' kyilb'ilal tman wakx ex b'alun. 30Teyile' junjun tq'uqlil ati kyaje' ktul q'ank'uxb'ilqe', ex tqul q'ank'uxb'ilqe'x. Ate'toq tzuyb'ilkyeju' tq'uqlil q'ank'uxb'ilqe'x kyoju' kyaje' kytx'u'k tjaq'ju' nin tkb'el a', ex ate'ktoq kyilb'ilal b'ech wirnalda q'ank'uxb'ilqe'x kyi'j junjun ttx'u'k. 31Tokx ttziju' nin tkb'el a' toj jun kolb'ilti'j, ch'inxmi nik'jan metr (45 cm.) jaxna' ten tib'ajxi' kolb'ilte. Tolin ttziju' nin tkb'el a', masch'i'n nik'jan metr (68 cm.) twe'ju' tzuyb'ilte. Ex ikx ate'toq tilb'ilal tib'aju' ttzi nin tkb'el a', te kyaje' kytx'u'k junelniqe' tqul.
32Ate'qe'kxju' kyaje' ktul tjaq'xi' tq'uqlil, iqi'n kyib'ju' tqul ti'ju' tq'uqlil. Te nik'jan tk'ich'i'ntl (68 cm.) chaq kywe'ju' rwed; 33ikqe'xju' kse'n kyrwedil karwaj. Kykyaqilxju' tqul, rwed, tzuyb'ilte rwed ex tokex tqul rwed, q'ank'uxb'ilqe'. 34Majx iqi'mile kyib'ju' kyaje' tzuyb'ilte junjun tq'uqlil kyoju' kyaje' ttx'u'k ti'j junjun tq'uqlil. 35Atzu'n kytziju' tq'uqb'il tolin kyten te junaq kab'e' sentimetro tk'i' nik'jan (22.50 cm.) kywe'; aye'tzunju' tz'lan tib'aj exju' tzuyb'ilte majx iqa'mile tib' ti'ju' tq'uqlil. 36E'b'jo'k tb'incha'n Iram kyilb'ilal kyerb'in, b'alun ex tut kyi'ju' tz'lan exju' tzuyb'ilte, kse'nxju' txol teyile junjun, ex tilb'ilal b'ech ti'jile. 37Iktzu'n tej kyb'aj tb'incha'nju' lajoj tq'uqlil, kykyaqilx junelni b'inchb'enkye ex junelni echb'enkye.
38Ex e'kub' tb'incha'n lajoj tkb'el a' q'ank'uxb'ilqe', teyile junjun, ch'inxmi kakab' metr (1.80) qe', kab'k'al kyajnaq (880) chaq litr a' inb'ajx toj junjun, ex teyile junjunju' tkb'el a' lu kub' q'o'n tib'aj junjunju' tq'uqlil, 39jwe' tq'uqlil kub' q'o'n toj tb'a'nq'ob'ju' tja Dyos ex jwe' toj tnayaj. Atzunju' nin tkb'el a' kub' q'o'n toj tb'a'nq'ob'ju' tja Dyos tu'me'l tjawetzq'ij.
40Ex ikx e'kub' tb'incha'n Iram k'wil, chkon, ex pak'tze, iktzu'n japunb'aj tkyaqilju' aq'untl tb'inchate Salomon toju' tja Qman Dyos, 41aye'ju' kab'e' tqankchan tuk'i'l tilb'ilal, tolin kyten, ju' jawx q'et toj kywi'ju' tqankchan, kab'e' kutxb'ilkyeju' tilb'ilal, 42exju' junk'al (400) tilb'ilal maẍlob'j ti'ju' kutxb'ilkye, kakab' txol ti'j junjun kutxb'il, kab'e' tilb'ilal k'uxb'ilile tolin kyten ate'kx kyib'aju' kab'e' tqankchan; 43Tu'n kyjax ten lajoj tk'ub'ila', kyib'aju' lajoj tq'uqlil, 44extzunju' nintkub'ila', kyuk'i'lju' kab'lajoj (12) tman wakx ate'qe'kx tjaq', 45exqe'tzuntlju' k'wil, e' pak'tze ex nimaqlaq.
Kykyaqilju' aq'unb'il lu eb'aj tb'incha'n Iram teju' nimaqkawil Salomon toju' tja Qman Dyos, q'ank'uxb'ilileqe' sq'ib'un kyoj. 46Atzu' kub'a' tb'incha'n nimaqkawil kyoj tz'awun ttxuylal ttziju' a' Jordan, kyxol Sukot ex Saretan. 47Txqanxi'xju' ti'xti' q'ank'uxb'ilile, mixti' kub' t-xima'n Salomon tu'n kykub' mlet.
48Xitab'tzintl Salomon tu'n kykub' b'incha'n txqantl toj tja Qman Dyos: aju' q'olb'eb'l q'anpwaq, ikxju' mes q'anpwaq jakub'a' q'etu' wab'j xjan twitz Qman Dyos, 49Tqan kantil q'anpwaqxi'x tokx twitzju' Najb'il Xjanxi'x, jwe' e'kub'ten toj tb'a'nq'ob' ex jwe' toj tnayaj, kykyaqil tuk'i'l tilb'ilal b'ech, tkantil, e' tx'ab'l q'anpwaqqe', 50e' b'itidor, pitxb'il kantil, nimaqlaq, pak' exqetzu'n xq'aq'b'il, kykyaqil q'anpwaqileqe'xi'x. Ex ikx q'anpwaqqe' tzyub'l tjpelju' Najb'il Xjanxi'x tojxi' tja Dyos, exqe' tzyub'l tjpelju' tja Dyos.
51Tetzunj kyb'aj b'ent kykyaqilju' aq'untl tb'incha nimaqkawil Salomon toju' tja Qman Dyos, eb'aj tb'u'yi'n Salomon ti'xti' q'anpwaqqe' ex saqpwaqqe' kyejni tq'o'n tman toj tja Qman Dyos, ex eb'jo'kx tk'u'n kyxolju' k'uwenj toj tja Qman Dyos.
Currently Selected:
1 R 7: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999
