1 R 20
20
Kub'kyi'j aj Siryo tu'n Akab'
1Eb'aj tb'u'yi'n B'en-adad nimaqkawil toj Sirya kykyaqilju' t-xjal te q'oj, kyuk'i'l junaq kab'lajoj (32) nimaqkawil kymojb'a'kyib' tuk'i'l, kyuk'i'lju' kychej exqe' kykarwaj te q'oj, tzajtzuntz ti'ju' nintnam Samarya, b'aj ttxoli'n ti'jile ex oktzaqpaj ti'j.
2-3Axtzun kmoju' eb'aj tzaj tchq'o'n t-sanjelal toju' nintnam lu q'malte te Akab' nimaqkawil toj Israel ikjalu: Intma'n B'en-adad teya: weqe'we' tq'inumala exqe' t-xu'jila, exqe' tk'wala tb'anilqexi'x, chij, chechij. 4Atzunte' nimaqkawil toj Israel xittzaq'we'n: Teqina qman nimaqkawil kyuk'i'lxi' kykyaqilju' ati weye', kse'nxu' xtmaya, chij.
5E'tzajx jumajtlu' sanjelal q'malte te Akab' kjalu: Chi B'en-adad kjalu: Matxi' txinma'n tq'umliye' teya qa ati tu'n kytzaj tq'o'na tq'inumala, exqe' t-xu'jila exqe' tk'wala weye'. 6Ex che kxe'l nchq'o'ne' nejenel kye nxjale' te q'oj najchi'j kloqx ja'lo, jyolte toju' tjaya te kawb'il ex kyoj kyjaju' nche kawin tuk'i'la, ex tkyaqilu' twi' wi'yalqe' che tzajel kyiq'in kye, chi B'en-adad, chechiju' sanjelal.
7Eb'ajtzun ttxko'n nimaqkawil toj Israel kykyaqilju' tijwnaq toju' tnam ex xitma'n kye:
—Qapelo matxi' kyb'iye', in tjyo'nju' ichan lu tu'me'l se'n tu'n nb'o'lja'ye' tu'n, mixpetzunti' nkub' nxk'a'yi'nwe' tu'n kyxi' nq'o'ne' nxu'jile', e' nk'wale' exqe' nq'inumale' te, chi Akab'.
8—Lalun txitb'i'na ex lalun tb'inchaju'ya intma'n —chechiju' tijwnaq ex kykyaqilju' xjal te.
9Xi'tzun tma'n Akab'tz kyeju' t-sanjelal B'en-adad:
—Kymanxe' teju' nimaqkawil qa knb'incha'we' tkyaqilju' tzaj tma'n weye' tnejel, atzu'n intqani'n ja'lo lay nb'inchaye', chij.
Xi'tzun kyiq'i'n sanjelalju' tzaq'web'l te B'en-adad, 10tzajtzun tchq'o'ntl B'en-adad tq'umli te Akab' ikjalu: Kub'xwit tz'e'ysa'n nwitze' kuwxi'x kyu'nju' dyos qa nim quq xkyaj toj Samarya tu'n txiq'et junjun jot kyeju' xjal lepchiqe' wi'je', chij.
11Atzunte nimaqkawil toj Israel xittzaq'we'n te: Lalun jawnaj tnima'n tib'a qa kkanb'ala, chij.
12Tetzunj tk'monte B'en-adadju' tzaq'web'l, intoq k'wan q'e'n kyuk'i'lu' txqantl nimaqkawil kyoju' kypach jawni kyb'incha'n. Xitma'ntzuntz kyeju' nejenel kye t-xjal te q'oj: ¡Kyb'incham kytene' te q'oj! chij. B'aj kyb'incha'ntzun kyib'tz kykyaqil tu'n kyq'ojin ti'ju' nintnam.
13O'kx tpon jun t-sanjelal Dyos twitz Akab', nimaqkawil toj Israel, ex xitma'n te:
—Matzaj tma'n Qman Dyos:
Maskye nim txqan kyb'aju' tajq'oja nxitka'yi'na, che b'elnq'o'ne' toj tq'ob'a ja'lo, tu'n teltnik'a qa ayine' Dyos Manb'aj, chi Dyos, chij.
14—¿Altzunqu'n che b'ela' tq'o'n toj nq'ob'e'? chi Akab' xitqani'n.
—Kyu'nju' ku'xun nche onin kyuk'i'lju' kawil toj junjun tnej tx'otx', chiju' t-sanjelal Dyos xittzaq'we'n.
—¿Alkyetzu'n kq'ojil nejtl? chi Akab' xit-xjelu'ntl.
—Aya, —chiju' t-sanjelal Dyos.
15Eb'ajtzun tka'yi'n Akab' ku'xun intoq che onin kyuk'i'lju' Kawil kyoju' junjun tnej tx'otx', junlajnaq kab'lajoj (232) kyb'aj, atzun wuqlajk'al lajnaq (7,000) kyb'aju' aj Israel te q'oj tu'n kykyaqil. 16E' etztzuntz te wanq'ij, aye'tzunkye' B'en-adad kyuk'ilju' junaq kab'lajoj (32) nimaqkawil q'o'nkyib' tuk'i'l kukxtoq kytx'ojtiju' kyoju' kypach jawni kyb'incha'n, 17eb'ajx neju' onilkye kawil. Tetzunj tpon tqanil te B'en-adad qa matxitoq che etz junjun ichan toj Samarya. 18Tchaq'tzuntz: ¡B'a'ntzulo qa toj b'anil mujqa q'ojil matxi' che tzaja', wajb'ile' tu'n kyul kyiq'i'ne' itz'qe'! chij.
19Lepchiqe'tzju' xjal te q'oj kyi'ju' onilkye kawil tej kyb'je'tz toju' nintnam. 20Ex teyile junjunkye kub' tb'yo'n junju' ajq'oj, aye'tzu'n aj Sirya eb'aj oq. Eb'ajx lpe aj Israel kyi'j, atzu'n B'en-adad nimaqkawil kye aj Sirya oq ti'j chej kyuk'i'l junjun t-xjal te q'oj chejilqe'. 21Xi'tzu'n nimaqkawil te Israel ex e'ttzuyju' kychej exqe' kykarwaj te q'oj, ex majx eb'ajkub' tb'ajsa'n aj Sirya. 22Yajxi'tzuntl ponju' t-sanjelal Dyos twitzju' nimaqkawil aj Israel, ex xitma'n te:
—Ka'yinxa ex kuwsam qe'ju'ya t-xjala te q'oj, ex ximanku'ya titi' ktb'incha'ya, qu'n tzul jumajtlu' nimaqkawil aj Sirya q'ojil ti'ja toj jun ab'q'itl, chij.
23Aye'tzu'n kynejel t-xjal nimaqkawil aj Sirya kyma teju' kynimaqkawil:
Te twi' witz qekye' kydyos aj Israel; qu'mtzun xkub'a'qi'j kyu'n. Qatzun maqo q'ojin kyi'j toju' plan tx'otx', axxi'x kb'elkyi'j qu'n. 24Ate tu'n tb'inchanteju'ya ja'lo nimaqkawil, aju' tu'n kyel tiq'i'na nimaqkawil toju' kyoklen, ex tu'n kyoktq'o'na kynejel xjal te q'oj te kyxel, 25ex tu'n tnk'et jun nin tnej xjal te q'oj kse'nxju' matxi' kub'kyi'j, exqe' chej kyuk'i'l karwaj. Qo q'ojiltzuntz kyi'j twi' b'is, kb'elte' kyi'j qu'n, chechij.
Xitb'i'n B'en-adad nab'l lu ex xitb'incha'n. 26Tb'ajlenxi'tzun jun ab'q'i, eb'aj tka'yi'n B'en-adadju' xjal te q'oj aj Sirya ex e'pontzuntz Apek tu'n kyq'ojin ti'j Israel. 27Ex ikyqe'xju' aj Israel eb'aj kyka'yi'n kyxjal te q'oj ex b'ajx kyq'o'n kywa, eb'je'tztzuntz q'ojil kyi'ju' aj Sirya. Kub' kyq'o'n kyxmuj kywitzu' aj Sirya, naku'j kab'e' tal tzb'oj chib' qe', qu'n kub' noj twitzju' tx'otx' kyu'n aj Sirya.
28O'kxtzun tpon jun t-sanjelal Dyos twitzju' nimaqkawil aj Israel, xitma'n te:
—Chi Qman Dyos kjalu:
Tu'ntzunte' oje kymaju' aj Sirya qa jun te twi' witz dyos qine' ex mya te toj b'ya', che xe'l nq'o'ne' kykyaqilju' txqan xjal lu toj tq'ob'a. Oktzun tla'tza qa ayine' Dyos Manb'aj, chi Dyos, chij.
29Wuq q'ij e'ten aj Sirya exqe' aj Israel b'incha'n kyten kywitz, tojtzun twuqi'n q'ij oka' q'oj kyu'n. Kab'lajmutx' lajk'al (100,000) xjal aj Sirya te q'oj nche b'et tu'n kyqan e'kyim kyu'n aj Israel toju' q'ij lu. 30Aye'tzu'n jni'tl xjal te q'oj eb'ajx oq toju' nintnam Apek, atzu'n nimaqtapi ti'ju' nintnam tzaj tz'aq kyib'aju' oxemutx' wuqk'al lajnaq (27,000) ichan matxitoq kykolkyib'. Ex ikxte B'en-adad xi' oq ex pon toju' nintnam, ex ewan tojile junjun ja.
31Xi'tzun kyma'n nejenel kye t-xjal te q'oj te:
—Oje qb'iye' njapunkye nimaqkawil toj Israel kyol ajkytziyante; qq'onk qi'j jochin ex qk'lonk aqwil qqul, qo'qe'tzuntz twitzju' nimaqkawil toj Israel tu'n tkub' tnajsa'n qil ex tu'n lalun qokub' tb'yo'n, chechij.
32Okkyq'o'ntzun kyi'jtz jochin ex jun aqwil kyqul, e'pontzuntz twitzju' nimaqkawil toj Israel ex xikyma'n te:
—Lu B'en-adad nkub'san teya nimaqkawil tu'n tkub' tnajsa'na til ex tu'n lalun kub' tb'yo'na, chechij.
—¿Ma itz'xtzun? ¡Ate' wewe' naku'j qitz'in qib'e' tuk'i'l! chi Akab' xittzaq'we'n.
33Elkynik'ju' ichan qa b'a'n yol ja'lu, ex lwiyxi'x xikytzaq'we'n:
¡Kyitz'inkye'kyib' nimaqkawil tuk'i'l B'en-adad! chechij.
—Kuxna' kyxi'ye' ex kytxkontze', chi Akab' xittzaq'we'n kye.
Pontzun B'en-adad twitz Akab', ex jawx q'o'n toju' tkarwaj tu'n Akab'. 34Xi'tzun tma'n B'en-adad te Akab'.
—K'anjel wanjsa'nwe' kyi'ju' nimaqtnam b'je'l tiq'i'n nmane' te tmana; ex b'a'n tu'n tten tk'a'ẍa Damask kse'nte nmane' ten tk'a'ẍ Samarya, chij.
—Atzunwe' kxel ntzaqpi'na, chi Akab' te.
Ikytzu'n kyaja' b'entti'j tyol Akab' tuk'i'l B'en-adad, xittzaqpi'ntzuntz.
35O'kxtzun ttzaj jun ichan kyxolju' t-sanjelal Dyos, chq'o'ntoq tu'n Qman Dyos, xitma'n te jun tuk'i'l:
—¡B'inchama xtalb'il chin tb'yonka! chij.
Atzu'n juntl min taj tu'n toktk'ixb'sa'n. 36Xi'tzun tma'n t-sanjelal Dyos te:
—K'okyel tzaqpaj jun b'alun ti'ja aj tpa'nte tib'a wi'je' tu'n tpaj mixti'x xitb'i'nju'ya tchaq'b'il Qman Dyos, chij.
Ikxtzun b'aj ju', tej tpa'ntetib' tuk'i'lju' t-sanjelal Dyos, etz jun b'alun ti'j ex kub' b'yo'n. 37Yajxi'tzuntl tk'ultib'ju' t-sanjelal Dyos tuk'i'l juntl ichan, ex xitma'n te tu'n tokb'yo'n tu'n, okb'ju'ntzuntz ex k'ixb'i tu'nju' ichan lu. 38Xi'tzu'n t-sanjelal Dyos ayolteju' nimaqkawil toj b'e, xitch'exb'e'n ti'j ex oktq'o'n jun patzb'il twitz. 39Tetzunj tik'ju' nimaqkawil toj b'e, xitma'n t-sanjelal Dyos tuk'i'l tq'ojq'ojel twi' kuw te:
—Ayine' ajb'el teya nimaqkawil, in pon b'ete' janoka'toqju' q'oj, etztzun jun kyxolu' xjal te q'oj ex kyej tq'o'n jun xjal tzyet toju' q'oj weye'. Tzaj tkub'sa'n tu'n txi' nka'yi'ne', ex majx tzaj tab'tzi'n weye' qa matxitzaqpaj wu'ne', atitzun tu'n nchjontetze' tu'n nkyime' mujqa tu'n wuqk'al lajnaq (3,000) saqpwaq. 40Naqtzun tu'n ch'i'n xxinka'yi'n juntl ti'xti'ye', matz'el oqu' xjal tzyet toj q'oj nwitze', chij.
Xi'tzun ttzaq'we'n nimaqkawil aj Israel te:
—Axta xpoqonte tib'a, ex matxi' tmaya se'n ktchja'ya'ya tila, chij. 41Atzunte' t-sanjelal Dyos lwiyxi'x eltiq'i'n patzb'il twitz, eltzun tnik'ju' nimaqkawil qa jun t-sanjelal Dyos. 42Xi'tzun tma'n t-sanjelal Dyos te:
—Matxi' tma Qman Dyos kjalu: Ma'na' txittzaqpi'na ichan q'ma'ntltoq tu'n tkyim, kkyimela te t-xel, ex kkyimelju' ttanama te t-xelju' ttanam, chi Dyos, chij. 43Xi'tzu'n nimaqkawil aj Israel Samarya, intoq b'isun ex mya'xtoq b'a'n ntna'n, okxtzuntz toju' tja te kawb'il.
Currently Selected:
1 R 20: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999
