Marako 6

Gikwero Yecu i Najaret

(Mat 13.53-58; Luka 4.16-30)

1Yecu oa woko ki kunnu, odok i lobo tugi, lupwonnyene gulube. 2Ocako pwonyogi i kacokke i ceŋ cabit. Jo mapol ma guwinye, guuro, kun giwaco ni, “Laco man onoŋo ryeko man ducu ki kwene? Kit ryeko aŋo ma gimiye-nu? Dok kit tic aŋo matek madito ma rom man ma en tiyogi-ni? 3Man pe lapac, wod pa Maliam, omin Yakobo, ki Yoce, ki Juda ki Cimon? Dok nyimegine pe gitye botwa kany?” Ci cwinygi ocako a woko i kome. 4#Jon 4.44 Yecu owaco ni, “Lanebi giketo deyo i kome, ento pe giketo deyo i kome ki i lobo tugi ki i kin jo tugi, ki i ode.” 5Pe otwero tiyo tic matego kunnu, ento oketo ciŋe i kom lutwo mogo, ocaŋogi. 6Yecu ouro pien pe gitye ki niye. En obedo ka wirre i kin gaŋi kun pwonyo dano.

Yecu ooro lupwonnye par wiye aryo

(Mat 10.5-15; Luka 9.1-6)

7Yecu olwoŋo bote jone apar wiye aryo, ci oorogi ki aryo aryo, omiyogi twero i kom cen maraco. 8#Luka 10.4-11 Ocikogi matek ni pe guwot ki gin mo, kono odoo keken, laboŋo cam mo, kadi kicaa, kadi lim mo i del pyergi; 9ento guwot kun giruko war tyengi, pe guwot ma gubamo kanyi aryo i komgi. 10Ocikogi ni, “Ka wudonyo i ot mo, wubed kenyo nio ka wubia ki i kabedo meno. 11#Tic 13.51 Kabedo ducu ma pe bijolowu, ma pe biwinyowu, ka ce wubia woko ki kunnu, ci wuteŋ apwa woko ki i tyenwu wek obed caden botgi.” 12Kit meno gucako cito, gutito lok ni myero dano oŋuti. 13#Yak 5.14 Guryemo lwak cen mapol, dok guwiro lutwo mapol ki moo kun gicaŋogi.

To pa Jon Labatija

(Mat 14.1-12; Luka 9.7-9)

14 # Mat 16.14; Mar 8.28; Luka 9.19 Kabaka Kerode owinyo pire, pien onoŋo nyiŋ Yecu doŋ oywek twatwal. Jo mogo guwaco ni, “Jon Labatija aye ocer woko ki i kin jo muto; en aye mumiyo lakit teko macalo meno tye ka tic i kome.” 15Ento jo mukene guwaco ni, “En Elia”, jo mukene ni, “En lanebi, cal ki ŋat mo i kin lunebi macon.” 16Ka Kerode owinyo pire ci owacci, “Jon ma yam atoŋo wiye en aye ocer woko.” 17#Luka 3.19, 20 Pien Kerode yam ooro dano, gumako Jon, gutweyo i mabuc, pi Kerodia ci-ominne, dako pa Pilipo, ma yam okwanyo me bedo dakone. 18Pien Jon owaco bot Kerode ni, “Cik pe oye ni ibed ki ci-omeru.” 19Kerodia obedo ki keccwiny i kome, omito neke woko, ento pe otwero, 20pien Kerode onoŋo lworo Jon, kun ŋeyo ni en dano ma kite atir, ki maleŋ, ci obedo ka gwoke maber. Ka owinyo lok ma en otito, lokke otwoyo doge woko, ento pire obedo mit bote ka winyo lokke. 21Ento kare maber oromo i nino ma Kerode oyubo iye karama me po pi nywale, ci olwoŋo iye luditone ki lutel-wi-lweny ki ludoŋo me Galilaya. 22Nya pa Kerodia odonyo i ot omyelo, ci oyomo cwiny Kerode ki welone. Kabaka owaco bot nyako ni, “Legga gin ducu ma imito, abimiyi.” 23Okwoŋo akwoŋa kun wacce ni, “Gin ducu ma ibilegga abimiyi, kadi bed nucu kerra.” 24Nyako okato woko, openyo minne ni, “Abilego gin aŋo?” Odok iye ni, “Leg wi Jon Labatija.” 25Oyotoyot odwogo i ot bot kabaka ki mit kome, olege ni, “Amito imiya wi Jon Labatija i weer kombeddi.” 26Kabaka okumo matek, ento pi kwoŋŋe ki pi welone omiyo pe omito twonne. 27Oyotoyot kabaka ooro askari ma lakur, ocike ni okel wi Jon. Ocito oŋolo ŋute ki i ot mabuc, 28okelo wiye i weer, omiyo bot nyako; nyako omiyo bot minne. 29Ka lupwonnye pa Jon guwinyo pire, gucito gutiŋo kome, guyiko i lyel.

Yecu omiyo cam ki jo alip abic

(Mat 14.13-21; Luka 9.10-17; Jon 6.1-14)

30Lukwena gudwogo bot Yecu gutitte lok ducu ma gutiyo ki ma gupwonyo. 31En owaco botgi ni, “Wubin kenwu ka ma dano pe iye, wuywe manok.” Pien jo mapol onoŋo gibedo ka bino, gidok cen, kun gigwennye agwenya, omiyo pe gubedo ki kare mo me cam. 32Gucito kengi ki yeya i kabedo ma dano pe iye. 33Jo mapol gunenogi ka gicito, guŋeyogi, ci guriŋo kunnu ki tyengi kun gia ki i gaŋi ducu; gin aye gukwoŋo o kunnu wiati. 34#Wel 27.17; 1 Luker 22.17; 2 Tek 18.16; Ejek 34.5; Jek 10.2; Mat 9.36 Ka Yecu okato i wi tera, oneno lwak madwoŋ; kica ocako make i komgi, pien gitye macalo romi ma gipe ki lakwat; ci opwonyogi ki lok mapol. 35Ka oo otyeno, lupwonnyene gubino bote guwacce ni, “Kabedo man tye i dye tim, cawa bene doŋ okato. 36Cwal lwak gucit i kin paco ki i gaŋi ma cokcok, guwil ginacama pigi kengi.” 37Ento en odok iye ni, “Wun aye wumigi ginacama.” Gin gugamo ni, “Wacit wawil kwon me ciliŋ#6.37 Leb Grik: denari miya aryo, wami botgi wek gucam?” 38Ento en openyogi ni, “Wutye ki mugati adi? Koŋ wucit wunen.” Ka guŋeyo guwacce ni, “Abic, ki rec aryo.” 39Yecu ociko jo ducu ni gubed piny i dul ki dul, i kom lum alita. 40Kit meno lwak gubedo piny i dul ki dul, miya miya, ki pyerabic pyerabic. 41Okwanyo mugati abic ki rec aryo, oneno malo i polo olego gum, obaro i mugati, omiyo ki lupwonnyene wek guket i nyim lwak; dok opoko rec aryo i kingi ducu. 42Gin ducu gucamo, guyeŋ 43Gicoko ŋide mugati ma obaro-nu mudoŋ, ki rec bene, opoŋo aduku apar wiye aryo. 44Jo ma gucamo mugati giromo co alip abic.

Yecu owoto i wi nam ki tyene

(Mat 14.22-33; Jon 6.15-21)

45Oyotoyot Yecu ociko lupwonnyene ni gudony i yeya, gukwoŋ nyime me cito loka ca, wa i Betecaida, kun en pud ciko lwak. 46Ka doŋ ocikogi, ci ocito i wi got ka lega. 47Ka piny oyuto, yeya onoŋo doŋ tye wa i dye nam, en kene aye onoŋo tye i wi tura. 48En onenogi kun gicanne ki cero yeya, pien onoŋo yamo kodo bino ki i nyimgi. I kine me koko gweno, en ocako bino botgi kun woto i wi nam ki tyene. Omito katogi akata, 49ento ka gunene kun woto i wi nam ki tyene, gutamo ni gwok nyo tipo, ci gudaŋŋe matek; 50pien gin ducu gunene, ci tipo komgi oto woko. Ento oyotoyot oloko kwedgi kun waco ni, “Wudi cwinywu. An enni; gwok wulwor.” 51Odonyo botgi i yeya, ci yamo oliŋ mot. Gin guuro matek twatwal ki i cwinygi, 52pien nakanen pe guniaŋ lok ma i kom mugati, ento cwinygi pud obedo nwaŋ.

Yecu ocaŋo two i Genecaret

(Mat 14.34-36)

53Ka doŋ gukato loka ca, ci gukato wi tura i lobo Genecaret, gutweyo yeya kunnu. 54Ka gutyeko a woko ki i yeya, ci lwak guŋeyo Yecu oyotoyot. 55Gucako riŋo gurumo kabedo ducu ma tye kunnu, kun gikelo lutwo ma gutiŋogi ki kitara, giterogi i kabedo ducu ma guwinyo ni en tye kunnu. 56I kabedo ducu ma yam en obino iye, i kin paco-gu, ki i gaŋi-gu, ki i kin caro, gipyelo lutwo wa i cuk-gu, kun gibako doggi bote ni oye wek gugud kadi dog ginarukane keken; ci lutwo ducu ma gugudo gucaŋ.

Currently Selected:

Marako 6: Aco85

Highlight

Copy