Matayo 7

Ŋolo kop i kom jo mukene

(Luka 6.37-38, 41-42)

1“Pe wuŋol kop i kom jo mukene, wek wun bene pe giŋol kop i komwu. 2#Mar 4.24 Pien kop ma wuŋolo-ni bene gibiŋolo i komwu, dok gin ma wupimo kwede jami, en aye doki gibipimo kwede jami botwu. 3Piŋo ineno cuŋ kal ma tye i waŋ omeru, ento dul yat ma tye i waŋi in kikomi pe ineno? 4Nyo itwero waco bot omeru niŋniŋ ni, ‘Wek akwany cuŋ kal ma tye i waŋi-ni woko’ kun in bene dul yat tye i waŋi? 5In lagoba, koŋ ikwoŋ kwanyo dul yat ma tye i waŋi-ni woko, ci miyo doŋ ineno piny maber me kwanyo cuŋ kal ma tye i waŋ omeru ca.

6“Pe myero wunywak jami maleŋ ki jo ma pe guye Lubaŋa. Pien gibilokke gilwenyo i komwu. Man noŋo rom macalo bolo kidi mo me wel i nyim opego, ma gibinyono megi anyona ki tyengi woko-ni.

Wulegi ci gibimiyo botwu

(Luka 11.9-13; 6.31)

7“Wulegi, ci gibimiyo botwu; wuyeny, ci wubinoŋo; wudwoŋ doggola ci gibiyabo botwu. 8Pien dano ma lego gimiye, ki ŋat ma yenyo bene noŋo, ki ŋat ma dwoŋo doggola bene gibiyabo doggola bote. 9Aŋa i kinwu ma won latin, ma ka latinne olege ni omiye kwon, ci bimiye gweŋ? 10Nyo ka olege ni omiye rec, ci bimiye twol? 11Doŋ ka ce wun jo maraco wuŋeyo miyo mot mabeco bot litinowu, ci Wonwu ma tye i polo pe bimiyo jami mabeco makato ducu bot jo ma lege! 12#Luka 6.31 Kit gin ducu ma wumito ni dano gutim botwu, wun bene wutim botgi kit meno; pien man aye tyen lok me cik pa Moses ki me pwony pa lunebi.

Doggola madiŋ

(Luka 13.24)

13“Wudony ki i doggola madiŋ, pien doggola ma tero dano i to lac, dok yone gipiro maber, dok jo ma donyo ki iye pol. 14Pien doggola ma tero dano i kwo diŋ, ki yone bene rac, dok jo ma noŋo yo meno ginok.

Yat maber giŋeyo i kom nyige

(Luka 6.43-44)

15“Wugwokke i kom lunebi ma lugoba, ma gibino botwu ma gurukke woko calo romi, ento ki i cwinygi noŋo gitye calo orudi muwor. 16Wubiŋeyogi i kom kitgi. Gitwero pwono olok ki i kom yat okuto, nyo nyig oduro ki i kom yat tworo? 17Kit meno, yat maber nyako nyige mabeco, ento yat marac nyako nyige maraco. 18Yat maber pe twero nyako nyige maraco, ki yat marac bene pe twero nyako nyige mabeco. 19#Mat 3.10; Luka 3.9 Kit yat ducu ma pe nyako nyige mabeco gitoŋo ci gibolo woko i mac. 20#Mat 12.33 Kit meno wun bene wubiŋeyogi i kom kitgi.

Cakke con onoŋo pe aŋeyowu

(Luka 13.25-27)

21“Pe dano ducu ma gilwoŋa ni, ‘Rwot, Rwot’ aye gibidonyo i ker me polo, ento ŋat ma tiyo gin ma Wora ma i polo mito. 22I nino meno jo mapol biwaco bota ni, ‘Rwot, Rwot, yam pe watito lok pa Lubaŋa i nyiŋi, dok pe waryemo cen maraco-gu woko ducu i nyiŋi? Yam pe watiyo tic mogo matek madito i nyiŋi?’ 23#Jab 6.8 Ci abituco botgi ka maleŋ ni, ‘Onoŋo pe aŋeyowu; wua woko ki bota, wun lutim gin maraco.’

Odi aryo ma gigero

(Luka 6.47-49)

24“Dano acel acel ma winyo lokka ce tiyo, bibedo calo dano maryek, ma ogero ode i kom pata got. 25Kot ocwer, lalele omol matek, ci yamo okodo matek i kom ot meno oyeŋo, ento ot pe opoto, pien te gutine gikwinyo i kom pata. 26Ento dano acel acel ma winyo lokka ce pe tiyo bibedo calo dano ma lamiŋ ma ogero ode i kom kweyo. 27Kot ocwer, lalele omol matek, yamo okodo matek i kom ot oyeŋo, ci ot opoto woko; potone owinnye matek adada.”

Twero ma Yecu obedo kwede

(Mar 1.22)

28 # Mar 1.22; Luka 4.32 I kare ma Yecu doŋ otyeko loko lok magi ducu, lwak guuro kit pwonnye matek, 29pien opwonyogi calo ŋat ma tye ki twero, pe macalo lupwony-cik.

Currently Selected:

Matayo 7: Aco85

Highlight

Copy