Luka 13

Ka pe wuŋut, ci wun ducu wubito

1I kare meno onoŋo tye jo mogo kunnu ma gutitte pi Lugalilaya mogo ma yam Pilato orubo remogi kigitumgi. 2En odok iye botgi ni, “Wutamo ni Lugalilaya meno gin lubalo makato Lugalilaya mukene ducu, ma omiyo guneno can kit meno-ni? 3Atito botwu ni, pe; ento ka pe wuŋut, ci wun ducu wubito kit meno. 4Nyo jo apar wiye aboro meno ma yam ot ma wiye bor opoto i komgi onekogi i Ciloam, wutamo ni gin onoŋo gutimo bal makato jo mukene ducu ma bedo i Jerucalem? 5Atito botwu ni, pe; ento ka pe wuŋut, ci wun ducu wubito kit meno.”

Carolok i kom oduro ma pe nyak

6Yecu obolo carolok ni, “Yam tye dano mo ma onoŋo tye ki oduro ma gipito i poto olokke. En obino kun yenyo nyige, ento pe onoŋo. 7Owaco bot lapur ni, ‘Nen, koni doŋ odoko mwaka adek kun abino, ayenyo nyig oduro man, pe anoŋo. Toŋ woko; piŋo balo ŋom nono?’ 8Lapur odokke iye ni, ‘Ladit, koŋ iwek obed pi mwaka man doki, nio ka abako ŋom i tere, aonyo iye cet dyaŋ mutwo. 9Ka binyak i mwaka ma bino-ni, ci ber; ento ka pe, ci ibitoŋo giri.’ ”

Gicaŋo dako ma cen ogomo i ceŋ cabit

10Yam onoŋo Yecu tye ka pwony i kacokke mo i ceŋ cabit. 11Dako mo onoŋo tye kunnu ma tye ki cen ma okelo goro i kome pi mwaka apar wiye aboro; onoŋo doŋ ogome woko, ma pe twero tirre. 12Ka Yecu onene, olwoŋe, owacce ni, “Dako, gigonyi woko i kom goroni.” 13Oketo ciŋe i kome; cutcut dako-nu otirre, ci opako Lubaŋa. 14#Nia 20.9, 10; Nwo 5.13, 14 Ento kiniga omako ladit me kacokke, pien Yecu ocaŋo dano i ceŋ cabit. Owaco bot lwak ni, “Tye nino abicel ma myero giti iye tic; wubin i nino meno wek gicaŋwu, pe i ceŋ cabit.” 15Rwot odokke iye ni, “Wun lubuta! Ŋat acel acel ki i kinwu pe gonyo twonne nyo kanane ki i ka-camgi, ci tero i pii i ceŋ cabit. 16Dako man, ma en nya pa Abraim,, ma ceŋ Catan otweye pi mwaka apar wiye aboro kulu, pe myero gigonye ki i twec man i ceŋ cabit?” 17I kare ma Yecu oloko lok man, ci lewic omako lukworre ducu; lwak ducu cwinygi obedo yom pi tic me deyo ducu ma en otiyo.

Carolok i kom kodi karadali

(Mat 13.31-32; Mar 4.30-32)

18Pi meno en owaco ni, “Ker pa Lubaŋa rom ki gin aŋo? Abiporo ki gin aŋo? 19Rom ki kodi dek karadali ma dano mo okwanyo, ocoyo i potone; ci odoŋo, odoko yat madit, winyo me polo gibino gigero odigi i jaŋe.”

Carolok i kom tobi

(Mat 13.33)

20Dok owaco ni, “Abiporo ker pa Lubaŋa ki gin aŋo? 21Rom ki tobi ma dako mo okwanyo, orubo ki moko mugati ma romo adita adek, nio ka moko ducu oyenyo, okwot.”

Doggola madiŋ

(Mat 7.13-14, 21-23)

22Yecu omedde ki wotte i kin gaŋi madito ki matino, kun pwonyo, dok kwede tuŋ Jerucalem. 23Ŋat mo openye ni, “Jo manok aye bilarre?” Yecu owaco botgi ni, 24“Wuket tek wek wudony ki i doggola madiŋ; pien awaco botwu ni, jo mapol gibitemo donyo, ento pe gibitwero. 25Ka won ot doŋ oa malo ocego doggola, wun wubicuŋ ki woko wudwoŋo doggola kun wuwaco ni, ‘Ladit, yab botwa doggola ba!’ En bidok iye botwu ni, ‘An pe aŋeyo ka ma wua iye.’ 26Ci wun wubiwaco ni, ‘Yam wacamo dok wamato kacel kwedi, dok bene ipwonyo dano i dye gaŋwa.’ 27#Jab 6.8 Ento en biwaco botwu ni, ‘Awaco botwu ni, pe aŋeyo ka ma wua iye; wua woko ki i nyima, wun lutim maraco ducu!’ 28#Mat 22.13; 25.30 Kunnu wubikok, wubikayo lakwu, ka wuneno Abraim ki Icaka ki Yakobo ki lunebi ducu kun gitye i ker pa Lubaŋa, ento wun kikomwu gibolowu woko. 29#Mat 8.11, 12 Dano gibibino kun gia ki tuŋ wokceŋ, ki tuŋ potoceŋ, ki yo tuŋ acam, ki tuŋ yo acuc, gibibedo piny i dog cam i ker pa Lubaŋa. 30#Mat 19.30; 20.16; Mar 10.31 Nen, jo mogo ma lacen gibibedo meati, ki jo mogo meati gibibedo me lacen.”

Yecu okok pi Jerucalem

(Mat 23.37-39)

31I cawa meno luparicayo mogo gubino, guwaco bot Yecu ni, “Cit woko ki kany, pien Kerode mito neki.” 32Yecu odok iye botgi ni, “Wucit, wuwac bot too can ni, ‘Nen, abiryemo cen dok abicaŋo dano tin ki diki, i nino me adekke abicobone. 33Kadi bed kit meno, myero amedde gira ki wotta, tin ki diki ki diki maca; pien lanebi pe myero oto ka mukene ma pe i Jerucalem.’ 34Jerucalem, Jerucalem, in ma ineko lunebi, ma icelo dano ma gioro boti woko ki got, tyen adi ma nene amito coko litinoni woko, macalo min gweno coko litinone i te bwome, ento wun pe wuye giwu! 35#Jab 118.26 Nen, doŋ gitenyo otwu botwu. Atito botwu ni, pe wubinena nio ka wubiwacci, ‘Gipwo ŋat ma bino i nyiŋ Rwot.’ ”

Currently Selected:

Luka 13: Aco85

Highlight

Copy