Jo Kolocai 4
4
Pwony
1Wun wegi opii, wuti ki opiiwu i yo ma atir ma romrom. kun wuŋeyo ni, wun bene laditwu tye malo i polo.
2Wumedde matek i lega, ma pe wunino, ento wumiyo pwoc bene. 3wuleg piwa bene, wek Lubaŋa oyab botwa doggola me tito lok, wek watuc muŋ pa Kricito, pien pi lok meno aye omiyo koni atye i buc kany, 4wek anyut ka maleŋ i kit ma myero.
5Wubed dok wuti ticwu ki ryeko twatwal i nyim jo ma pe guye Yecu, kun wutiyo ki kare ma tye bene i yo maber. 6Lok ma wuloko myero obed lok mamit ma kado oromo maber, wek omi wuŋe kit ma myero wudok kwede i peny pa ŋat acel acel.
Mot me agikki
7Ominwa Tukiko ma wamaro, ma obedo latic ma genne, dok latic macalo an i Rwot, bitito botwu lok ducu ma dok i koma. 8Acwalo en botwu pi lok man kikome, wek en omi wuŋe kit ma watye kwede kany, dok bene myero ocuk cwinywu. 9#Pile 10-12 Acwale me bino kacel ki ominwa mukene ma wamaro, en aye Onesimo; en bene dano ma genne, dok en oa ki botwu. Gin bitito botwu gin ducu ma doŋ otimme kany.
10 #
Tic 19.29; 27.2; Pile 24;
Tic 12.12, 25; 13.13; 15.37-39 Aristako ma lamabuc lawota omotowu, ki Marako okeyo Barnaba ma yam doŋ acikowu pire; ka en oo botwu myero wujole maber, 11ki Yecu ma nyiŋe mukene Yucito bene omotowu. Jo magi adek-ki keken aye gin Lujudaya ma gitiyo tic kacel kwedwa kany i ker pa Lubaŋa. Gukweyo cwinya twatwal. 12#Kol 1.7; Pile 23 Epapira latic pa Yecu Kricito ma en ŋat acel mua ki botwu, bene omotowu. En po piwu kare ducu i legane matek, wek wubed jo muteggi, kun wuniaŋ maber i gin ducu ma Lubaŋa mito ma pe wukalo akala wacel. 13An cadenne omiyo amoko ni en otiyo tic matek piwu ki pi jo ma tye i Laodikia ki Kerapoli. 14#2 Tem 4.11; Pile 24; 2 Tem 4.10; Pile 24 Luka ma en daktar ma wamaro, kacel ki Dema bene gumotowu. 15Wumot utmego ma tye i Laodikia, dok wumot Nimpa bene kacel ki jo muye Kricito ma gicokke i ode. 16Ka doŋ waraga man gityeko kwanone i kinwu, myero wumi gikwan bene bot jo muye Kricito ma gitye i Laodikia, ki wun bene myero wukwan waraga ma jo Laodikia gicwalo botwu. 17#Pile 2 Dok wuwac bot Arkipo ni, “Myero inen ni icobo tic ma doŋ igamo i Rwot.”
18An Paulo acoyo botwu lok me mot man ki ciŋa.Wupo i kom twec man ma gitweya kwede ki nyor. Kica pa Lubaŋa obed kwedwu. Amen.
Currently Selected:
Jo Kolocai 4: Aco85
Highlight
Share
Copy
Want to have your highlights saved across all your devices? Sign up or sign in
Acholi Bible © Bible Society of Uganda, 1985.
