مَرْقُسْ 6

الْفَصْلْ السَّادْسْ

النَّاصِرَة مَا قْبْلَاتْشْ يَسُوعْ

1وْخْرَجْ يَسُوعْ مْنْ تْمَّ وْمْشَا لْمْدِينْتُه، وْتْبْعُوهْ التّْلَامْدْ دْيَالُه. 2وْنْهَارْ السّْبْتْ بْدَا كَيْعَلّْمْ فْدَارْ الصّْلَاة، وْبْزَّافْ دْ النَّاسْ اللِّي سْمْعُوهْ تّْعَجّْبُو مْنُّه، وْݣَالُو: «مْنِينْ تْعَلّْمْ هَادْشِّي؟ وْأَشْنُو هَادْ الْحْكْمَة اللِّي تّْعْطَاتْ لِيهْ، وْالْمُعْجِزَاتْ اللِّي كَيْتّْدَارُو عْلَى يْدِّيهْ؟ 3وَاشْ مَاشِي هَادَا هُوَ النّْجَّارْ وَلْدْ مَرْيَمْ، خُو يَعْقُوبْ، وْيُوسِي، وْيَهُودَا، وْسِمْعَانْ؟ وَاشْ خْوَاتَاتُه مَاشِي سَاكْنِينْ مْعَانَا هْنَا؟». وْتّْقَلّْقُو وْمَا بْغَاوْشْ يْآمْنُو بِيهْ. 4وْهُوَ يْݣُولْ لِيهُمْ يَسُوعْ: «النّْبِي كَيْتّْحْتَرْمْ فْكُلّْ بْلَاصَة، مْنْ غِيرْ فْبْلَادُه وْفْوَسْطْ عَائِلْتُه وْمَّالِينْ دَارُه».#يوحنا 4‏:44 5وْمَا قْدَرْ يَسُوعْ يْدِيرْ حْتَّى شِي مُعْجِزَة تْمَّ، وَلَكِنْ حَطّْ يْدِّيهْ عْلَى نَاسْ قْلَالْ كَانُو مْرَاضْ وْشْفَاهُمْ. 6وْتّْعَجّْبْ مْنْ قَلّْةْ إِيمَانْهُمْ.

يَسُوعْ كَيْصِيفْطْ تْلَامْدُه الطّْنَاشْ

وْمْنْ بَعْدْ، مْشَى كَيْضُورْ فْالدّْوَاوْرْ كَيْعَلّْمْ فِيهُمْ. 7وْعَيّْطْ عْلَى التّْلَامْدْ الطّْنَاشْ وْصِيفْطْهُمْ جُوجْ بْجُوجْ وْعْطَاهُمْ السُّلْطَة بَاشْ يْخَرّْجُو الجّْنُونْ. 8وْوْصَّاهُمْ وْݣَالْ: «مَا تْدِّيوْ مْعَاكُمْ حْتَّى شِي حَاجَة فْالسّْفَرْ مْنْ غِيرْ الْعْكَّازْ. لَا خُبْزْ، وَلَا رَزْمَة، وَلَا فْلُوسْ فْحْزَامْكُمْ. 9دِيرُو الصّْبَّاطْ فْرْجْلِيكُمْ، وْمَا تْلَبْسُوشْ جُوجْ لْبْسَاتْ». 10وْݣَالْ لِيهُمْ: «الدَّارْ اللِّي قْبْلُوكُمْ مَّالِيهَا، بْقَاوْ فِيهَا حْتَّى تْخَرْجُو مْنْ تْمَّ. 11#لوقا 10‏:4‏-11وْإِلَا جِيتُو لْشِي مُوضْعْ وْمَا رَحّْبُوشْ بِيكُمْ مَّالِيهْ، وْمَا سْمْعُوشْ كْلَامْكُمْ، خَرْجُو مْنْ تْمَّ وْسُوسُو الْغَبْرَة اللِّي فْرْجْلِيكُمْ بَاشْ تْكُونْ هَادِي شْهَادَة ضْدّْهُمْ».#الاعمال 13‏:51 12وْخَرْجُو التّْلَامْدْ وْخَبّْرُو النَّاسْ بْاللِّي خَاصّْهُمْ يْتُوبُو، 13وْخَرّْجُو بْزَّافْ دْيَالْ الجّْنُونْ، وْدَهْنُو بْالزِّيتْ بْزَّافْ دْيَالْ الْمَرْضَى وْشَافَاوْهُمْ.#يعقوب 5‏:14

الْمُوتْ دْيَالْ يُوحَنَّا الْمَعْمَدَانْ

14وْسْمَعْ الْمَلِكْ هِيرُودُسْ عْلَى يَسُوعْ حِيتْ سْمِيتُه وْلَّاتْ مْعْرُوفَة. وْشِي وْحْدِينْ ݣَالُو: «يُوحَنَّا الْمَعْمَدَانْ تّْبْعَتْ مْنْ بِينْ الْمُوتَى، وْدَاكْشِّي عْلَاشْ عَنْدُه الْقُدْرَة بَاشْ يْدِيرْ الْمُعْجِزَاتْ».#متى 16‏:14؛ مرقس 8‏:28؛ لوقا 9‏:19 15وْشِي نَاسْ خْرِينْ ݣَالُو: «هَادَا رَاهْ إِيلِيَّا»، وْوْحْدِينْ خْرِينْ ݣَالُو: «هَادَا شِي نْبِي بْحَالْ الْأَنْبِيَا اللّْوّْلِينْ». 16وْمْلِّي سْمَعْ هِيرُودُسْ عْلَى هَادْ الْأُمُورْ، ݣَالْ: «هَادَا هُوَ يُوحَنَّا اللِّي قْطَعْتْ لِيهْ رَاسُه، رَاهْ تّْبْعَتْ مْنْ الْمُوتْ».

17حِيتْ هِيرُودُسْ هُوَ اللِّي آمْرْ بَاشْ يْتّْقْبَطْ يُوحَنَّا وْيْتّْكَتّْفْ فْالْحَبْسْ، بْسْبَابْ هِيرُودِيَّا مْرَاةْ فِيلُبُّسْ خُو هِيرُودُسْ حِيتْ تّْزَوّْجْ بِيهَا.#لوقا 3‏:19‏،20 18عْلَاحْقَّاشْ يُوحَنَّا كَانْ كَيْݣُولْ لْهِيرُودُسْ: «حْرَامْ تّْزَوّْجْ بْمْرَاةْ خُوكْ!». 19وْحْقْدَاتْ هِيرُودِيَّا عْلَى يُوحَنَّا وْبْغَاتْ تْقْتْلُه وْمَا قْدْرَاتْشْ، 20حِيتْ هِيرُودُسْ كَانْ كَيْحْتَرْمْ يُوحَنَّا وْكَيْعْرَفْ بْلِّي هُوَ رَاجْلْ مْتَّاقِي اللَّهْ وْطَاهْرْ، وْكَانْ كَيْحْمِيهْ. وْمْلِّي كَانْ كَيْسَمْعُه كَانْ كَيْجِيهْ كْلَامُه قَاسْحْ بْزَّافْ، وْوَاخَّا هَكَّاكْ كَانْ كَيْعَجْبُه يْتّْصَنّْتْ لِيهْ. 21وْجَاتْ الْوْجْبَة لْهِيرُودِيَّا مْلِّي وْصَلْ عِيدْ الْمِيلَادْ دْيَالْ هِيرُودُسْ، وْدَارْ وَاحْدْ الْحَفْلَة وْعْرَضْ عْلَى الْوُزَرَا دْيَالُه، وْالْكْبَارْ دْ الْعَسْكَرْ، وْالنَّاسْ الْمُهِمِّينْ اللِّي فْالْجَلِيلْ. 22وْدْخْلَاتْ بَنْتْ هِيرُودِيَّا وْشْطْحَاتْ، وْعْجْبَاتْ هِيرُودُسْ وْالضّْيَافْ دْيَالُه. وْݣَالْ الْمَلِكْ لْلْبَنْتْ: «طْلْبِي اللِّي بْغِيتِي وْغَنْعْطِيهْ لِيكْ». 23وْحْلَفْ لِيهَا وْݣَالْ: «اللِّي طْلَبْتِي مْنِّي غَنْعْطِيهْ لِيكْ، وَاخَّا يْكُونْ النَّصّْ فْالْمَمْلَكَة دْيَالِي!». 24وْخْرْجَاتْ الْبَنْتْ وْسْوّْلَاتْ مّْهَا: «أَشْنُو نْطْلَبْ؟». وْهِيَ تْݣُولْ لِيهَا: «الرَّاسْ دْيَالْ يُوحَنَّا الْمَعْمَدَانْ!». 25وْدِيكْ السَّاعَة رْجْعَاتْ لْعَنْدْ الْمَلِكْ وْطْلْبَاتْ مْنُّه وْݣَالْتْ: «بْغِيتْكْ تْعْطِينِي دَابَا رَاسْ يُوحَنَّا الْمَعْمَدَانْ فْطَبْسِيلْ!». 26وْحْزَنْ الْمَلِكْ بْزَّافْ، وَلَكِنْ فَاتْ مْنُّه حْلَفْ قُدَّامْ الضّْيَافْ دْيَالُه وْمَا بْغَاشْ يْرْجَعْ فْكْلْمْتُه مْعَاهَا. 27وْدِيكْ السَّاعَة صِيفْطْ وَاحْدْ الْعَسْكْرِي وْآمْرُه يْجِيبْ رَاسْ يُوحَنَّا الْمَعْمَدَانْ. وْمْشَى هَادَاكْ الْعَسْكْرِي لْلْحَبْسْ وْقْطَعْ رَاسْ يُوحَنَّا الْمَعْمَدَانْ، 28وْجَابُه فْطَبْسِيلْ وْعْطَاهْ لْلْبَنْتْ، وْالْبَنْتْ عْطَاتُه لْمّْهَا. 29وْمْلِّي وْصْلَاتْ الْخْبَارْ لْلتّْلَامْدْ دْيَاوْلْ يُوحَنَّا، جَاوْ وْدَّاوْ الدَّاتْ دْيَالُه وْدْفْنُوهَا فْالْقْبَرْ.

يَسُوعْ كَيْوَكّْلْ خَمْسَالَافْ وَاحْدْ

30وْرْجْعُو الرُّسُلْ مْجْمُوعِينْ عَنْدْ يَسُوعْ، وْهُمَ يْخَبّْرُوهْ بْݣَاعْ دَاكْشِّي اللِّي دَارُوهْ وْعَلّْمُوهْ. 31وْݣَالْ لِيهُمْ يَسُوعْ: «أَجِيوْ نْتُمَ بُوحْدْكُمْ لْوَاحْدْ الْمُوضْعْ خَالِي وْرْتَاحُو شِي شْوِيَّة»، حِيتْ كَانُو بْزَّافْ دْ النَّاسْ كَيْمْشِيوْ وْكَيْجِيوْ، وْمَا بْقَاشْ لْلرُّسُلْ الْوَقْتْ فِينْ يَاكْلُو. 32وْمْشَاوْ بُوحْدْهُمْ فْالْفْلُوكَة لْوَاحْدْ الْمُوضْعْ خَالِي. 33وَشَافُوهُمْ بْزَّافْ دْ النَّاسْ وْعَرْفُوهُمْ فِينْ غَادْيِينْ، وْتّْجَمْعُو مْنْ ݣَاعْ الْمْدُونْ وْسْبْقُوهُمْ عْلَى رْجْلِيهُمْ لْهَادَاكْ الْمُوضْعْ. 34وْمْلِّي نْزَلْ يَسُوعْ مْنْ الْفْلُوكَة شَافْ جْمَاعَة كْبِيرَة دْ النَّاسْ، وْحَنّْ عْلِيهُمْ حِيتْ كَانُو بْحَالْ شِي غْنَمْ بْلَا سْرَّاحْ، وْبْدَا كَيْعَلّْمْهُمْ بْزَّافْ دْ الْحَاجَاتْ.#متى 9‏:36 35وْمْلِّي مْشَى الْحَالْ، قَرّْبُو التّْلَامْدْ لْعَنْدْ يَسُوعْ وْݣَالُو لِيهْ: «رَاهْ مْشَى الْحَالْ، وْهَادْ الْمُوضْعْ خَالِي، 36صِيفْطْ هَادْ النَّاسْ بْحَالْهُمْ بَاشْ يْمْشِيوْ لْلْفِيرْمَاتْ وْلْلدّْوَاوْرْ اللِّي قْرَابْ وْيْشْرِيوْ لْرَاسْهُمْ الْمَاكْلَة». 37وْجَاوْبْهُمْ يَسُوعْ وْݣَالْ: «عْطِيوْهُمْ نْتُمَ مَا يَاكْلُو». وْݣَالُو لِيهْ: «وَاشْ بْغِيتِينَا نْمْشِيوْ وْنْشْرِيوْ الْخُبْزْ بْمْيَتَايْنْ دِينَارْ بَاشْ نْوَكّْلُوهُمْ؟» 38وْݣَالْ لِيهُمْ يَسُوعْ: «شْحَالْ مْنْ خُبْزَة عَنْدْكُمْ؟ سِيرُو وْشُوفُو!». وْمْلِّي عَرْفُو ݣَالُو لِيهْ: «عَنْدْنَا خَمْسَة دْ الْخُبْزَاتْ وْجُوجْ حُوتَاتْ». 39وْآمْرْ يَسُوعْ تْلَامْدُه، وْݣَالْ لِيهُمْ: «ݣُولُو لْلنَّاسْ يْݣَلْسُو جْمَاعَة جْمَاعَة فُوقْ الرّْبِيعْ الْخْضَرْ». 40وْݣَلْسُو فْجْمَاعَاتْ مْفَرّْقِينْ، شِي فِيهُمْ خَمْسِينْ وْشِي فِيهُمْ مْيَة. 41وْخْدَا يَسُوعْ هَادُوكْ الْخَمْسَة دْ الْخُبْزَاتْ وْالجُّوجْ دْ الْحُوتَاتْ وْهْزّْ عِينِيهْ لْلسّْمَا وْشْكَرْ اللَّهْ وْقَطّْعْ الْخُبْزْ وْعْطَاهْ لْلتّْلَامْدْ دْيَالُه بَاشْ يْفَرّْقُوهْ عْلَى النَّاسْ، وْقَسّْمْ الجُّوجْ دْ الْحُوتَاتْ عْلِيهُمْ كَامْلِينْ. 42وْكْلَاوْ كُلّْهُمْ حْتَّى شْبْعُو. 43وْمْنْ بَعْدْ، جْمْعُو طْنَاشْرْ ݣُفَّة مْنْ دَاكْشِّي اللِّي شَاطْ مْنْ الطّْرُوفَ دْ الْخُبْزْ وْمْنْ الْحُوتْ. 44وْهَادُوكْ اللِّي كْلَاوْ الْخُبْزْ كَانُو خَمْسَالَافْ رَاجْلْ.

يَسُوعْ كَيْتّْمَشَّى فُوقْ الْمَا

45وْدِيكْ السَّاعَة آمْرْ يَسُوعْ التّْلَامْدْ دْيَالُه بَاشْ يْرَكْبُو فْالْفْلُوكَة لْلجِّهَة لْخْرَى دْيَالْ الْبْحَرْ، وْيْسَبْقُوهْ لْبَيْتْ صَيْدَا عْلَى مَا يْصِيفْطْ النَّاسْ بْحَالْهُمْ. 46وْبَعْدْمَا صِيفْطْهُمْ طْلَعْ لْلجّْبَلْ بَاشْ يْصَلِّي. 47وْمْلِّي طَاحْ الضّْلَامْ، كَانْتْ الْفْلُوكَة فْوَسْطْ الْبْحَرْ، وْبْقَى هُوَ بُوحْدُه فْالْبْرّْ. 48وْشَافْ يَسُوعْ بْلِّي التّْلَامْدْ دْيَالُه كَيْتّْعَدّْبُو وْهُمَ كَيْقَدّْفُو بْالْفْلُوكَة، حِيتْ الرِّيحْ كَانْتْ جَايَّة ضْدّْهُمْ. وْقْبَلْ الْفْجَرْ جَا لْعَنْدْهُمْ وْهُوَ كَيْمْشِي فُوقْ الْمَا دْ الْبْحَرْ، وْكَانْ بَاغِي يْفُوتْهُمْ. 49وْمْلِّي شَافُوهْ جَايْ فُوقْ الْمَا فَكّْرُو بْلِّي هُوَ شِي خْيَالْ دْيَالْ شِي وَاحْدْ مْيّْتْ وْبْدَاوْ كَيْغَوّْتُو، 50حِيتْ كُلّْهُمْ شَافُوهْ وْتّْخَلْعُو. وْفْدِيكْ السَّاعَة، تّْكَلّْمْ مْعَاهُمْ وْݣَالْ: «تْشَجّْعُو، أَنَا هُوَ، مَا تْخَافُوشْ!». 51وْمْنْ بَعْدْ طْلَعْ لْعَنْدْهُمْ لْلْفْلُوكَة وْهِيَ تّْهَدّْنْ الرِّيحْ. وْتْبَهْضُو التّْلَامْدْ وْتّْعَجّْبُو بْزَّافْ، 52عْلَاحْقَّاشْ مَا فَهْمُوشْ الْمُعْجِزَة دْيَالْ الْخُبْزْ، حِيتْ قَلْبْهُمْ كَانْ قَاسْحْ.

يَسُوعْ كَيْشَافِي بْزَّافْ دْ النَّاسْ مْرَاضْ فْجَنِّيسَارَتْ

53وْمْلِّي قْطْعُو الْبْحَرْ، وْصْلُو لْجَنِّيسَارَتْ وْرْبْطُو الْفْلُوكَة تْمَّ. 54وْغِيرْ نْزَلْ يَسُوعْ وْالتّْلَامْدْ مْنْ الْفْلُوكَة، وْهُمَ يْعَرْفُوهْ النَّاسْ، 55وْبْدَاوْ كَيْتّْسَرَاوْ فْݣَاعْ هَادِيكْ الجِّهَة، وْكَيْجِيبُو الْمَرْضَى مْهْزُوزِينْ فْفْرَاشَاتْهُمْ لْكُلّْ مُوضْعْ سْمْعُو بْلِّي يَسُوعْ كَايْنْ فِيهْ. 56وْفِينْ مَا مْشَى سْوَا لْلدّْوَاوْرْ وْلَا لْلْمْدُونْ وْلَا لْلْفِيرْمَاتْ، كَيْحَطُّو لِيهْ الْمَرْضَى فْالسّْوَاقْ، وْكَيْطْلْبُوهْ بَاشْ يْمَسُّو وَاخَّا غِيرْ جْلَايْلُه. وْݣَاعْ الْمَرْضَى اللِّي مْسُّوهْ تّْشَافَاوْ.

Currently Selected:

مَرْقُسْ 6: MSTD

Highlight

Copy