لُوقَا 4

الْفَصْلْ الرَّابْعْ

إِبْلِيسْ كَيْجَرّْبْ يَسُوعْ

1وْرْجَعْ يَسُوعْ مْعَمّْرْ بْالرُّوحْ الْقُدُسْ مْنْ وَادْ الْأُرْدُنْ، وْدَّاهْ الرُّوحْ مْنْ بْلَاصَة لْبْلَاصَة فْالصَّحْرَا، 2مُدَّةْ رْبْعِينْ يُومْ وْإِبْلِيسْ كَيْجَرّْبْ فِيهْ، وْمَا كْلَا حْتَّى حَاجَة فْدِيكْ لِيَّامْ، وْمْلِّي دَازْ هَادْ الْوَقْتْ جَاهْ الجُّوعْ. 3وْݣَالْ لِيهْ إِبْلِيسْ: «إِلَا كْنْتِ وَلْدْ اللَّهْ، ݣُولْ لْهَادْ الْحَجْرَة تْوَلِّي خُبْزْ». 4وْهُوَ يْرَدّْ عْلِيهْ يَسُوعْ: «مْكْتُوبْ فْكْتَابْ اللَّهْ: مَاشِي غِيرْ بْالْخُبْزْ بُوحْدُه كَيْعِيشْ بْنَادْمْ». 5وْطْلّْعُه إِبْلِيسْ لْوَاحْدْ الْبْلَاصَة عَالْيَة، وْوْرَّاهْ فْوَقْتْ قْلِيلْ ݣَاعْ الْمَمْلَكَاتْ دْيَالْ الدّْنْيَا، 6وْݣَالْ لِيهْ: «غَنْعْطِيكْ السُّلْطَة عْلَى هَادْ الْمَمْلَكَاتْ كُلّْهُمْ وْنْعْطِيكْ الْعَزّْ دْيَالْهُمْ، عْلَاحْقَّاشْ هَادْشِّي كُلُّه تّْعْطَى لِيَّ، وْنْقْدَرْ نْعْطِيهْ لَمّْنْ بْغِيتْ، 7وْإِلَا سْجَدْتِي لِيَّ، ݣَاعْ هَادْشِّي غَيْوَلِّي دْيَالْكْ». 8وْهُوَ يْرَدّْ عْلِيهْ يَسُوعْ وْݣَالْ: «مْكْتُوبْ فْكْتَابْ اللَّهْ: لْلرَّبّْ إِلَاهْكْ تْسْجَدْ، وْهُوَ بُوحْدُه اللِّي تْعْبَدْ». 9وْدَّاهْ إِبْلِيسْ لْأُورْشَلِيمْ، وْوَقّْفُه عْلَى الْحَافَة دْ السّْطَحْ دْيَالْ بِيتْ اللَّهْ وْݣَالْ لِيهْ: «إِلَا كْنْتِ وَلْدْ اللَّهْ، رْمِي رَاسْكْ مْنْ هْنَا لْلْتَحْتْ، 10حِيتْ مْكْتُوبْ فْكْتَابْ اللَّهْ: غَادِي يْوَصِّي اللَّهْ الْمَلَايْكَة دْيَالُه عْلِيكْ بَاشْ يْحَفْضُوكْ. 11وْعْلَى يْدِّيهُمْ غَيْهَزُّوكْ بَاشْ رْجْلَكْ مَا تّْضْرَبْشْ مْعَ الْحْجَرْ». 12وْهُوَ يْرَدّْ عْلِيهْ يَسُوعْ وْݣَالْ: «رَاهْ تّْݣَالْ فْكْتَابْ اللَّهْ، مَا تْجَرّْبْشْ الرَّبّْ إِلَاهْكْ».

13وْمْلِّي كْمْلُو ݣَاعْ التَّجْرِبَاتْ، تّْفْرَقْ عْلِيهْ إِبْلِيسْ حْتَّى لْوَقْتْ آخْرْ.

النَّاصِرَة مَا قْبْلَاتْشْ يَسُوعْ

14وْرْجَعْ يَسُوعْ لْبْلَادْ الْجَلِيلْ وْهُوَ مْعَمّْرْ بْقُوَّةْ رُوحْ اللَّهْ، وْدَاعْتْ خْبَارُه فْدِيكْ الجّْوَايْهْ كُلّْهَا. 15وْكَانْ كَيْعَلّْمْ فْدْيُورْ الصّْلَاة دْيَالْهُمْ، وْكُلّْشِي كَانْ كَيْشَكْرُه.

16وْجَا يَسُوعْ لْلنَّاصِرَة فِينْ كْبَرْ، وْكِيفْ كَانْتْ الْعَادَة دْيَالُه دْخَلْ لْدَارْ الصّْلَاة نْهَارْ السّْبْتْ، وْوْقَفْ بَاشْ يْقْرَا. 17وْعْطَاوْهْ كْتَابْ النّْبِي إِشْعِيَا، وْمْلِّي حَلّْ الْكْتَابْ، لْقَا وْقْرَا الْمُوضْعْ اللِّي مْكْتُوبْ فِيهْ:

18«رُوحْ الرَّبّْ عْلِيَّ

حِيتْ خْتَارْنِي#4‏:18 خْتَارْنِي: فْالْقْدِيمْ كَانُو الْمُلُوكْ وْرْجَالْ الدِّينْ كَيْتّْدْهْنُو بْالزِّيتْ قْبَلْ مَا يْبْدَاوْ الْخْدْمَة دْيَالْهُمْ. بَاشْ نْخَبّْرْ الْمَسَاكِينْ بْالْبْشَارَة،

وْصِيفْطْنِي نْخَبّْرْ اللِّي مْحْبُوسِينْ بْلِّي غَادِي يْتّْطْلَقْ سْرَاحْهُمْ،

وْالْعَمْيِينْ بْلِّي غَيْوَلِّيوْ يْشُوفُو،

وْالْمْضْلُومِينْ بْلِّي غَيْتْحَرّْرُو،

19وْصِيفْطْنِي نْخَبّْرْ بْالْعَامْ اللِّي فِيهْ غَادِي يْقْبَلْ الرَّبّْ شَعْبُه».

20وْسْدّْ يَسُوعْ كْتَابْ اللَّهْ، وْرَدُّه لْلْخْدَّامْ فْدَارْ الصّْلَاة وْݣْلَسْ. وْكَانُو ݣَاعْ اللِّي حَاضْرِينْ كَيْشُوفُو فِيهْ، 21وْبْدَا كَيْݣُولْ لِيهُمْ: «الْيُومْ، رَاهْ تْحَقّْقْ هَادْ الْكْلَامْ كِمَا سْمَعْتُوهْ». 22وْكُلّْهُمْ تّْكَلّْمُو عْلِيهْ مْزْيَانْ، وْتّْعَجّْبُو مْنْ كْلَامْ النِّعْمَة اللِّي كَانْ كَيْخْرُجْ مْنْ فُمُّه، وْݣَالُو: «وَاشْ هَادَا مَاشِي هُوَ وَلْدْ يُوسْفْ؟» 23وْݣَالْ لِيهُمْ يَسُوعْ: «غَادِي تْݣُولُو لِيَّ هَادْ الْمْتَالْ: آ الطّْبِيبْ دَاوِي بْعْدَ رَاسْكْ، وْݣَاعْ دَاكْشِّي اللِّي سْمَعْنَاهْ طْرَا فْكَفْرْنَاحُومْ دِيرُه حْتَّى هْنَا فْبْلَادْكْ». 24وْݣَالْ لِيهُمْ: «نْݣُولْ لِيكُمْ الْحَقّْ، عَمّْرْ شِي نْبِي مَا تّْقْبَلْ فْبْلَادُه.#يوحنا 4‏:44 25وْالْحَقّْ نْݣُولْ لِيكُمْ: رَاهْ بْزَّافْ دْ الْهْجَّالَاتْ كَانُو فْإِسْرَائِيلْ فْوَقْتْ إِيلِيَّا، مْلِّي تّْحْبْسَاتْ الشّْتَا تْلْتْ سْنِينْ وْسْتّْ شْهُورْ، وْمْلِّي جَا جُوعْ صْعِيبْ فْالْبْلَادْ كُلّْهَا، 26وْوَاخَّا هَادْشِّي مَا صِيفْطْ اللَّهْ إِيلِيَّا حْتَّى لْشِي لْوَحْدَة مْنّْهُمْ، وَلَكِنْ صِيفْطُه لْعَنْدْ مْرَاة هْجَّالَة فْصِرْفَة اللِّي فْجْوَايْهْ صَيْدَا. 27وْكَانُو فْإِسْرَائِيلْ بْزَّافْ دْيَالْ الْمْجْدَامِينْ فْوَقْتْ النّْبِي أَلِيشَعَ، وَلَكِنْ حْتَّى وَاحْدْ مْنّْهُمْ مَا وْلَّى طَاهْرْ مْنْ غِيرْ نُعْمَانْ السُّورِي».

28وْمْلِّي سْمْعُو ݣَاعْ الْحَاضْرِينْ فْدَارْ الصّْلَاة هَادْ الْكْلَامْ تْقَلّْقُو بْزَّافْ. 29وْنَاضُو وْخَرّْجُوهْ عْلَى بْرَّا دْ الْمْدِينَة، وْجَابُوهْ لْلْحَافَة دْ الجّْبَلْ اللِّي كَانْتْ مْبْنِيَة عْلِيهْ الْمْدِينَة بَاشْ يْرْمِيوْهْ لْلْتَحْتْ. 30وَلَكِنْ هُوَ دَازْ فْوَسْطْ مْنّْهُمْ وْمْشَى.

يَسُوعْ كَيْشَافِي رَاجْلْ سَاكْنُه جْنّْ

31وْهْبَطْ لْكَفْرْنَاحُومْ، وْهِيَ مْدِينَة فْالْجَلِيلْ، وْبْدَا كَيْعَلّْمْ النَّاسْ نْهَارْ السّْبْتْ، 32وْتّْعَجّْبُو مْنْ التَّعْلِيمْ دْيَالُه، حِيتْ كَيْتّْكَلّْمْ بْسُلْطَة.#متى 7‏:28‏،29 33وْكَانْ فْدَارْ الصّْلَاة وَاحْدْ الرَّاجْلْ سَاكْنُه جْنّْ، وْبْدَا كَيْغَوّْتْ بْصُوتْ عَالِي: 34«آشْ بِينَّا وْبِينْكْ آ يَسُوعْ النَّاصِرِي؟ وَاشْ جِيتِي بَاشْ تْهْلَكْنَا؟ أَنَا كَنْعْرَفْ شْكُونْ نْتَ: نْتَ هُوَ الْمْقَدّْسْ دْيَالْ اللَّهْ!». 35وْنْهَضْ يَسُوعْ فْالجّْنّْ وْݣَالْ: «سْكُتْ وْخْرُجْ مْنْ الرَّاجْلْ!». وْطِيّْحْ الجّْنْ الرَّاجْلْ فْوَسْطْ النَّاسْ وْخْرَجْ مْنُّه بْلَا مَا يْآدِيهْ. 36وْهُمَ يْتّْعَجْبُو النَّاسْ كُلّْهُمْ، وْݣَالُو لْبَعْضِيَّاتْهُمْ: «آشْ هَادْشِّي كَنْسَمْعُو؟ بْقُوَّة وْبْسُلْطَة كَيْآمْرْ الجّْنُونْ وْكَيْخَرْجُو؟». 37وْدَاعْتْ خْبَارُه فْݣَاعْ هَادِيكْ الجّْوَايْهْ.

يَسُوعْ كَيْشَافِي نْسِيبْةْ بُطْرُسْ وْبْزَّافْ دْ النَّاسْ

38وْخْرَجْ مْنْ دَارْ الصّْلَاة وْدْخَلْ لْدَارْ سِمْعَانْ، وْكَانْتْ نْسِيبْةْ سِمْعَانْ فِيهَا السّْخَانَة مْجَهْدَة، وْطْلْبُو مْنُّه بَاشْ يْشَافِيهَا. 39وْوْقَفْ حْدَاهَا، وْنْهَضْ فْالسّْخَانَة وْهِيَ تْمْشِي مْنّْهَا، وْنَاضْتْ وْضَايْفَاتْهُمْ. 40وْمْعَ غْرُوبْ الشّْمْسْ، جَاوْ النَّاسْ بْالْمَرْضَى دْيَاوْلْهُمْ لْعَنْدْ يَسُوعْ، وْكَانْ كُلّْ وَاحْدْ وْمَرْضُه، وْحَطّْ يْدِّيهْ عْلَى كُلّْ وَاحْدْ مْنّْهُمْ وْشْفَاهْ، 41وْخَرْجُو الجّْنُونْ مْنْ بْزَّافْ دْ النَّاسْ وْهُمَ كَيْغَوّْتُو وْكَيْݣُولُو: «نْتَ وَلْدْ اللَّهْ!». وْنْهَضْ فِيهُمْ يَسُوعْ وْمَا خْلَّاهُمْشْ يْتّْكَلّْمُو، حِيتْ عَرْفُو بْلِّي هُوَ الْمَسِيحْ.

يَسُوعْ كَيْعَلّْمْ فْدْيُورْ الصّْلَاة

42وْخْرَجْ يَسُوعْ فْالصّْبَاحْ بْكْرِي، وْمْشَى لْوَاحْدْ الْمُوضْعْ خَالِي، وْبْدَاوْ الجّْمَاعَاتْ دْ النَّاسْ كَيْقَلّْبُو عْلِيهْ، وْمْلِّي لْقَاوْهْ شْدُّوهْ بَاشْ يْبْقَى مْعَاهُمْ. 43وَلَكِنْ هُوَ ݣَالْ لِيهُمْ: «وَاجْبْ عْلِيَّ نْخَبّْرْ الْمْدُونْ لْخْرِينْ حْتَّى هُمَ بْمَمْلَكَةْ اللَّهْ، حِيتْ عْلَى قْبَلْ هَادْشِّي اللَّهْ صِيفْطْنِي». 44وْمْشَى كَيْخَبّْرْ بْالْبْشَارَة فْدْيُورْ الصّْلَاة دْيَالْ الْيَهُودِيَّة.

Currently Selected:

لُوقَا 4: MSTD

Highlight

Copy