الرِّسَالَة لْلْعِبْرَانِيِّينْ 4
4
الْفَصْلْ الرَّابْعْ
الرَّاحَة اللِّي وَجّْدْهَا لِينَا اللَّهْ
1مَا حَدّْ الْوَعْدْ دْيَالْ اللَّهْ مَازَالْ كَايْنْ بَاشْ نْدَخْلُو لْلرَّاحَة اللِّي وَجّْدْهَا لِينَا، خَاصّْنَا نْرَدُّو بَالْنَا لَيْتّْحْرَمْ مْنُّه شِي وَاحْدْ! 2حِيتْ حْتَّى حْنَا سْمَعْنَا الْبْشَارَة كِمَا سْمْعُوهَا جْدُودْنَا، وَلَكِنْ الْكْلَامْ اللِّي سْمْعُوهْ هَادُوكْ مَا نْفَعْهُمْشْ، حِيتْ مَا قْبْلُوهْشْ بْالْإِيمَانْ. 3أَمَّا حْنَا الْمُومْنِينْ، غَنْدَخْلُو لْلرَّاحَة اللِّي وَجّْدْهَا لِينَا اللَّهْ، وْاللِّي ݣَالْ عْلِيهَا: «فْوَقْتْ الْغَضَبْ دْيَالِي حْلَفْتْ وْݣْلْتْ: عَمّْرْهُمْ مَا غَيْدَخْلُو لْلْبْلَادْ فِينْ وَجّْدْتْ لِيهُمْ الرَّاحَة». وْاللَّهْ ݣَالْ هَادْشِّي، وَاخَّا كَمّْلْ الْخْدْمَة دْيَالُه مْنْ الْوَقْتْ اللِّي خْلَقْ فِيهْ الدّْنْيَا. 4وْرَاهْ مْكْتُوبْ فْكْتَابْ اللَّهْ عْلَى النّْهَارْ السَّابْعْ: «رْتَاحْ اللَّهْ مْنْ الْخْدْمَة دْيَالُه كُلّْهَا فْالنّْهَارْ السَّابْعْ». 5وْعَاوْدْ ݣَالْ اللَّهْ: «عَمّْرْهُمْ مَا غَيْدَخْلُو لْلْبْلَادْ فِينْ وَجّْدْتْ لِيهُمْ الرَّاحَة». 6رَاهْ كَايْنِينْ شِي وْحْدِينْ اللِّي يْقَدْرُو يْدَخْلُو لْهَادْ الرَّاحَة، وْهَادُوكْ اللِّي سْمْعُو الْبْشَارَة فْاللّْوّْلْ مَا دَخْلُوشْ لِيهَا عْلَاحْقَّاشْ عْصَاوْ اللَّهْ، 7وْعَاوْتَانِي خْتَارْ اللَّهْ نْهَارْ آخُرْ كَيْݣُولْ عْلِيهْ: «الْيُومْ». وْتّْكَلّْمْ عْلَى هَادْ النّْهَارْ مْنْ بَعْدْ شْحَالْ مْنْ عَامْ عْلَى لْسَانْ دَاوُدْ كِمَا تّْݣَالْ مْنْ قْبَلْ: «إِلَا سْمَعْتُو صُوتْ اللَّهْ الْيُومْ مَا تْقَسّْحُوشْ قْلُوبْكُمْ». 8حِيتْ كُونْ دَخّْلْهُمْ يَشُوعْ لْبْلَادْ الرَّاحَة، كُونْ مَا تْكَلّْمْشْ اللَّهْ مْنْ بَعْدْ عْلَى نْهَارْ آخُرْ.#يشوع 22:4 9وْهَكَّا، رَاهْ شَعْبْ اللَّهْ مَازَالْ عَنْدُه يُومْ دْ الرَّاحَة. 10حِيتْ اللِّي كَيْدْخَلْ لْلرَّاحَة اللِّي وَجّْدْهَا اللَّهْ، كَيْرْتَاحْ حْتَّى هُوَ مْنْ خْدَمْتُه كِمَا رْتَاحْ اللَّهْ مْنْ خْدَمْتُه. 11إِيوَا خَاصّْنَا نْدِيرُو جَهْدْنَا بَاشْ نْدَخْلُو لْهَادْ الرَّاحَة، بَاشْ مَا يْفْشَلْ حْتَّى وَاحْدْ مْنَّا بْحَالْ هَادُوكْ اللِّي عْصَاوْ اللَّهْ. 12حِيتْ كْلَامْ اللَّهْ حَيّْ وْقْوِي، وْمْضَى مْنْ كُلّْ سِيفْ مَاضِي مْنْ جُوجْ جْوَايْهْ، وْكَيْدْخَلْ حْتَّى لْفِينْ كَتّْفَارْقْ النّْفْسْ مْعَ الرُّوحْ، وْالْمْفَاصْلْ وْالْمُخّْ دْيَالْ الْعْضَامْ، وْقَادْرْ يْعْرَفْ الْأَفْكَارْ دْيَالْ الْقَلْبْ وْالنِّيَّة دْيَالُه. 13وْمَا كَايْنْشْ شِي مْخْلُوقْ كَيْخْفَى عْلَى اللَّهْ، وَلَكِنْ كُلّْشِي وَاضْحْ وْبَايْنْ قُدَّامْ عِينِيهْ، وْهُوَ لَمّْنْ غَنْعْطِيوْ الْحْسَابْ دْيَالْنَا.
يَسُوعْ رَئِيسْ رْجَالْ الدِّينْ الْكْبِيرْ
14إِيوَا مَا دَامْ عَنْدْنَا رَئِيسْ رْجَالْ الدِّينْ الْكْبِيرْ اللِّي تّْرْفَعْ لْلسَّمَاوَاتْ، اللِّي هُوَ يَسُوعْ وَلْدْ اللَّهْ، رَاهْ خَاصّْ الْاعْتِرَافْ دْيَالْنَا بِيهْ يْكُونْ تَابْتْ. 15حِيتْ مَا عَنْدْنَاشْ رَئِيسْ رْجَالْ الدِّينْ مَا قَادْرْشْ يْشَارْكْ فْالضُّعْفْ دْيَالْنَا، وَلَكِنْ هُوَ تّْجَرّْبْ فْكُلّْشِي بْحَالْنَا، وْعَمّْرُه مَا دْنَبْ. 16إِيوَا خَاصّْنَا نْقَرّْبُو لْعَرْشْ النِّعْمَة بْتِقَة، بَاشْ نَاخْدُو الرَّحْمَة، وْنْلْقَاوْ النِّعْمَة اللِّي غَتْعَاوْنَّا فْوَقْتْ الْإِحْتِيَاجْ دْيَالْنَا.
Currently Selected:
الرِّسَالَة لْلْعِبْرَانِيِّينْ 4: MSTD
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved