الْأَعْمَالْ 9
9
الْفَصْلْ التَّاسْعْ
الْإِيمَانْ دْيَالْ شَاوُلْ بْيَسُوعْ
1وْكَانْ شَاوُلْ بَاقِي مْغَدّْدْ عْلَى التّْلَامْدْ دْيَالْ الرَّبّْ وْكَيْهَدّْدْ بَاشْ يْقْتَلْهُمْ. وْمْشَى لْعَنْدْ رَئِيسْ رْجَالْ الدِّينْ 2وْطْلَبْ مْنُّه يْعْطِيهْ رَسَائِلْ يْدِّيهُمْ لْدْيُورْ الصّْلَاة فْدِمَشْقْ، بَاشْ يَاخُدْ الْإِدْنْ وْيْشَدّْ الرّْجَالْ وْالْعْيَالَاتْ اللِّي غَيْلْقَاهُمْ تَابْعِينْ هَادْ الطّْرِيقْ، وْيْجِيبْهُمْ مْكَتّْفِينْ لْأُورْشَلِيمْ.
3وْمْلِّي كَانْ غَادِي فْالطّْرِيقْ وْقَرّْبْ لْدِمَشْقْ، لْمَعْ حْدَاهْ عْلَى غَفْلَة ضَوّْ مْنْ السّْمَا، 4وْهُوَ يْطِيحْ لْلْأَرْضْ، وْسْمَعْ صُوتْ كَيْݣُولْ لِيهْ: «شَاوُلْ، شَاوُلْ، عْلَاشْ كَتّْعَدَّى عْلِيَّ؟». 5وْجَاوْبْ شَاوُلْ: «شْكُونْ نْتَ آ سِيدِي؟». وْهُوَ يْݣُولْ لِيهْ: «أَنَا يَسُوعْ اللِّي نْتَ كَتّْعَدَّى عْلِيهْ، 6نُوضْ وْدْخُلْ لْلْمْدِينَة، وْتْمَّ غَادِي تْعْرَفْ أَشْنُو خَاصّْكْ تْدِيرْ». 7وْالرّْجَالْ اللِّي كَانُو مْسَافْرِينْ مْعَ شَاوُلْ بْقَاوْ وَاقْفِينْ مَا كَيْتّْكَلّْمُوشْ، كَيْسَمْعُو الصُّوتْ وَلَكِنْ مَا كَيْشُوفُو حْتَّى وَاحْدْ. 8وْهُوَ يْنُوضْ شَاوُلْ مْنْ الْأَرْضْ وْعِينِيهْ مْحْلُولِينْ وْمَا كَيْشُوفْ وَالُو. وْشْدُّوهْ صْحَابُه مْنْ يْدُّه وْدَخّْلُوهْ لْدِمَشْقْ. 9وْبْقَى تْلْتْ يَّامْ وْهُوَ مَا كَيْشُوفْشْ، وْمَا كْلَا مَا شْرَبْ.
10وْكَانْ فْدِمَشْقْ وَاحْدْ التّْلْمِيدْ سْمِيتُه حَنَانْيَا. وْتّْكَلّْمْ الرَّبّْ مْعَاهْ فْرُؤْيَا وْݣَالْ لِيهْ: «آ حَنَانْيَا!» وْجَاوْبُه حَنَانْيَا: «هَانِي آ رْبِّي!». 11وْهُوَ يْݣُولْ لِيهْ الرَّبّْ: «نُوضْ سِيرْ لْلزَّنْقَة الْمْعْرُوفَة بْسْمِيّْةْ الزَّنْقَة الْمْقَادَّة، وْسْوّْلْ فْدَارْ يَهُودَا عْلَى وَاحْدْ الرَّاجْلْ مْنْ طَرْسُوسْ سْمِيتُه شَاوُلْ. حِيتْ رَاهْ كَيْصَلِّي، 12وْشَافْ فْرُؤْيَا وَاحْدْ الرَّاجْلْ سْمِيتُه حَنَانْيَا دْخَلْ وْحَطّْ يْدِّيهْ عْلِيهْ بَاشْ يْوَلِّي كَيْشُوفْ». 13وْݣَالْ حَنَانْيَا لْلرَّبّْ: «يَا رَبّْ، سْمَعْتْ مْنْ بْزَّافْ دْ النَّاسْ شْحَالْ تْكَرْفْصْ هَادْ الرَّاجْلْ عْلَى الْمُومْنِينْ دْيَالْكْ فْأُورْشَلِيمْ. 14وْدَابَا رَاهْ جَا لّْهْنَا، وْتّْعْطَاتُه السُّلْطَة مْنْ الرُّؤَسَا دْ رْجَالْ الدِّينْ بَاشْ يْشَدّْ فْالْحَبْسْ ݣَاعْ اللِّي كَيْآمْنُو بْالْإِسْمْ دْيَالْكْ». 15وَلَكِنْ الرَّبّْ ݣَالْ لِيهْ: «سِيرْ، حِيتْ أَنَا خْتَارِيتْ هَادْ الرَّاجْلْ رَسُولْ يْخَبّْرْ بْالْإِسْمْ دْيَالِي الشّْعُوبْ اللِّي مَا كَيْعَبْدُوشْ اللَّهْ، وْالْمُلُوكْ وْوْلَادْ إِسْرَائِيلْ. 16وْغَادِي نْوَرِّيهْ شْحَالْ خَاصُّه يْتّْعَدّْبْ عْلَى وْدّْ الْإِسْمْ دْيَالِي».
17وْمْشَى حَنَانْيَا وْدْخَلْ لْلدَّارْ، وْحَطّْ يْدِّيهْ عْلَى شَاوُلْ وْݣَالْ لِيهْ: «آ خُويَا شَاوُلْ، رَاهْ صِيفْطْنِي لْعَنْدْكْ الرَّبّْ يَسُوعْ اللِّي بَانْ لِيكْ فْالطّْرِيقْ اللِّي جِيتِي مْنّْهَا، بَاشْ يْرْجَعْ لِيكْ الشُّوفْ دْيَالْكْ وْتّْعَمّْرْ بْالرُّوحْ الْقُدُسْ». 18وْدِيكْ السَّاعَة طَاحْتْ مْنْ عِينِينْ شَاوُلْ شِي حَاجَة بْحَالْ الْقْشُورْ، وْرْجَعْ لِيهْ الشُّوفْ، وْنَاضْ وْتّْعَمّْدْ. 19وْمْلِّي كْلَا، رْجْعَاتْ فِيهْ الرُّوحْ.
شَاوُلْ كَيْخَبّْرْ بْيَسُوعْ الْمَسِيحْ فْدِمَشْقْ
وْمْنْ بَعْدْ ݣْلَسْ شَاوُلْ شِي يَّامَاتْ مْعَ التّْلَامْدْ اللِّي فْدِمَشْقْ، 20وْدْغْيَا بْدَا كَيْخَبّْرْ النَّاسْ فْدْيُورْ الصّْلَاة بْلِّي يَسُوعْ الْمَسِيحْ هُوَ وَلْدْ اللَّهْ. 21وْݣَاعْ اللِّي سْمْعُوهْ كَانُو كَيْتّْعَجّْبُو وْكَيْݣُولُو: «وَاشْ مَاشِي هَادَا هُوَ الرَّاجْلْ اللِّي كَانْ فْأُورْشَلِيمْ كَيْهْلَكْ كُلّْ وَاحْدْ كَيْتّْكَلّْمْ بْهَادْ الْإِسْمْ؟ وَاشْ مَا جَاشْ لْدِمَشْقْ غِيرْ بَاشْ يْشَدّْهُمْ وْيْرْجَعْ بِيهُمْ مْكَتّْفِينْ لْلرُّؤَسَا دْ رْجَالْ الدِّينْ؟». 22وَلَكِنْ شَاوُلْ كَانْ كَيْزِيدْ يْتّْقُوَّى، وْحَيّْرْ عْقُولْ لِيهُودْ اللِّي سَاكْنِينْ فْدِمَشْقْ، وْبَيّْنْ بْلِّي يَسُوعْ هُوَ الْمَسِيحْ.
23وْمْنْ بَعْدْ يَّامَاتْ كْتَارْ، تَّافْقُو لِيهُودْ بَاشْ يْقْتْلُوهْ،#2كورنتوس 11:32،33 24وْهِيَ تْوْصَلْ هَادْ الْخْبَارْ لْشَاوُلْ. وْكَانُو كَيْحْضِيوْ الْبِيبَانْ دْيَالْ الْمْدِينَة لِيلْ وْنْهَارْ بَاشْ يْقْتْلُوهْ. 25وَلَكِنْ التّْلَامْدْ دَّاوْهْ بْاللِّيلْ وْدْلَّاوْهْ فْسْلَّة مْنْ فُوقْ السُّورْ.
شَاوُلْ فْأُورْشَلِيمْ
26وْمْلِّي وْصَلْ شَاوُلْ لْأُورْشَلِيمْ حَاوْلْ بَاشْ يْكُونْ مْعَ التّْلَامْدْ. وَلَكِنْ كَانُو كُلّْهُمْ خَايْفِينْ مْنُّه، وْمَا تِيّْقُوشْ بْلِّي وْلَّى تْلْمِيدْ دْ الْمَسِيحْ. 27وْهُوَ يْتْكَلّْفْ بَرْنَابَا وْجَابُه لْعَنْدْ الرُّسُلْ، وْعَاوْدْ لِيهُمْ كِيفَاشْ بَانْ الرَّبّْ لْشَاوُلْ فْالطّْرِيقْ وْتّْكَلّْمْ مْعَاهْ، وْكِيفَاشْ خَبّْرْ شَاوُلْ النَّاسْ بْإِسْمْ يَسُوعْ فْدِمَشْقْ بْلَا مَا يْخَافْ. 28وْمْنْ دَاكْ الْوَقْتْ بْدَا شَاوُلْ كَيْعِيشْ مْعَ التّْلَامْدْ وْكَيْدْخَلْ وْيْخْرُجْ لْأُورْشَلِيمْ بْحُرِّيَّة، وْكَيْتّْكَلّْمْ مْعَ النَّاسْ بْإِسْمْ الرَّبّْ بْلَا خُوفْ. 29وْكَانْ كَيْتّْكَلّْمْ وْكَيْتّْنَاقْشْ مْعَ لِيهُودْ اللِّي كَيْتّْكَلّْمُو بْالْيُونَانِيَّة، وْبْدَاوْ كَيْقَلّْبُو كِيفَاشْ يْدِيرُو بَاشْ يْقْتْلُوهْ. 30وَلَكِنْ مْلِّي عَرْفُو الْخُوتْ الْمُومْنِينْ هَادْشِّي، دَّاوْهْ لْقَيْصَرِيَّة وْمْنْ تْمَّ صِيفْطُوهْ لْطَرْسُوسْ.
31وْفْدَاكْ الْوَقْتْ كَانُو الْكْنَايْسْ كُلّْهُمْ فْالْيَهُودِيَّة وْالْجَلِيلْ وْالسَّامِرَة كَيْعِيشُو فْالْهْنَا، وْكَيْكَبْرُو وْكَيْمْشِيوْ فْطَاعَةْ الرَّبّْ، وْكَيْتّْزَادُو بْالْعْوِينْ دْيَالْ الرُّوحْ الْقُدُسْ.
بُطْرُسْ كَيْشَافِي مْشْلُولْ فْلُدَّة وْكَيْحْيِي طَابِيتَا فْيَافَا
32وْمْلِّي كَانْ بُطْرُسْ كَيْسَافْرْ مْنْ بْلَاصَة لْبْلَاصَة، دَازْ لْعَنْدْ الْخُوتْ الْمُومْنِينْ اللِّي سَاكْنِينْ فْلُدَّة، 33وْلْقَا فِيهَا وَاحْدْ الرَّاجْلْ مْشْلُولْ سْمِيتُه إِينِيَاسْ، تْمَنْ سْنِينْ وْهُوَ طَايْحْ فْالْفْرَاشْ، 34وْݣَالْ لِيهْ بُطْرُسْ: «آ إِينِيَاسْ! يَسُوعْ الْمَسِيحْ شَافَاكْ، نُوضْ وْجْمَعْ فْرَاشْكْ بْيْدِّيكْ!». وْهُوَ يْنُوضْ دِيكْ السَّاعَة. 35وْشَافُوهْ ݣَاعْ النَّاسْ اللِّي سَاكْنِينْ فْلُدَّة وْسَارُونْ، وْآمْنُو بْالرَّبّْ.
36وْكَانْتْ فْيَافَا وَاحْدْ الْمُومْنَة سْمِيتْهَا طَابِيتَا، اللِّي كَتْعْنِي بْالْيُونَانِيَّة دُورْكَاسْ، وْكَانْتْ كَتْدِيرْ الْخِيرْ بْزَّافْ وْكَتْعَاوْنْ الْمْحْتَاجِينْ. 37وْفْدَاكْ الْوَقْتْ مَرْضَاتْ وْمَاتْتْ. وْغَسّْلُوهَا وْحَطُّوهَا فْالْبِيتْ الْفُوقَانِي. 38وْحِيتْ يَافَا قْرِيبَة لْلُدَّة، سْمْعُو التّْلَامْدْ اللِّي فْيَافَا بْلِّي بُطْرُسْ فْلُدَّة، وْهُمَ يْصِيفْطُو لِيهْ جُوجْ دْ الرّْجَالْ بَاشْ يْطْلْبُو مْنُّه يْجِي لْعَنْدْهُمْ دْغْيَا. 39وْنَاضْ بُطْرُسْ دِيكْ السَّاعَة وْمْشَا مْعَاهُمْ لْيَافَا. وْمْلِّي وْصَلْ، طَلّْعُوهْ لْلْبِيتْ الْفُوقَانِي، وْجَاوْ لْحْدَاهْ الْهْجَّالَاتْ كُلّْهُمْ كَيْبْكِيوْ وْكَيْوْرِّيوْهْ الْحْوَايْجْ وْالْقْمَايْصْ اللِّي خَيّْطَاتْ دُورْكَاسْ مْلِّي كَانْتْ مْعَاهُمْ فْالْحَيَاةْ. 40وْخَرّْجْ بُطْرُسْ النَّاسْ كُلّْهُمْ عْلَى بْرَّا، وْهُوَ يْسْجَدْ وْصْلَّى. وْمْنْ بَعْدْ ضَارْ جِهْةْ الدَّاتْ الْمْيّْتَة وْݣَالْ: «طَابِيتَا، نُوضِي!». وْفْدِيكْ السَّاعَة حْلَّاتْ عِينِيهَا. وْمْلِّي شَافْتْ بُطْرُسْ ݣْلْسَاتْ. 41وْمْدّْ لِيهَا يْدُّه وْنَوّْضْهَا، وْعَيّْطْ عْلَى الْمُومْنِينْ وْالْهْجَّالَاتْ وْقَدّْمْهَا لِيهُمْ حَيَّة. 42وْدَاعْتْ الْخْبَارْ فْيَافَا كُلّْهَا، وْآمْنُو بْالرَّبّْ بْزَّافْ دْ النَّاسْ. 43وْݣْلَسْ بُطْرُسْ مُدَّة طْوِيلَة فْيَافَا عَنْدْ وَاحْدْ الرَّاجْلْ دْبَّاغْ سْمِيتُه سِمْعَانْ.
Currently Selected:
الْأَعْمَالْ 9: MSTD
Highlight
Share
Copy
Want to have your highlights saved across all your devices? Sign up or sign in
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved
