SOFONIYA 2
2
Yita kay hamda
1Tokgi tuwgiya, tapgi tuwgiya,
nigi sum sa zulo kirgiɗina.
2Kotgi tuwgi jew cona vi kitata,
jew a buur kayni cap galgi ki burana
ma simeɗn dolom goyna nala,
jew a ɦiyda vi Ma-Vatɗina co kigiya.
3Gargi Ma-Vatɗina,
nigi sa ka hiɗi ŋalda hay nagata,
nigi sa li kuɗ vun-ma-gatna valamu,
gargi ɗigerta, gargi hot-yamda ta gaata,
kay nigi ma hulot goyo
hay buur ma ɦiyda vi Ma-Vatɗina klasige.
Law joo'o kat jaf-sum sa pulla
4Kay Gaza ma hin goyo,
Askalon ma muɗ goy mi ful ɦawa,
Asdod ma digiɗis goyo hay falay calak',
Ekron ma patis kulo'o hiɗi sutayna va' pa.
5Joot kay sum sa ziyna visi ka kel niy-lum ma ŋolla,
jaf-sum sa Keretiyena,#2:5 Keretiyena si jaf sum sa Filistina.
nigi sum sa hay Kanaan hay nagata vi Filistina,
Ma-Vatɗina di vaawa katgiya,
nan min ɓulakgi goyo,
sa as li ziy hay naga namna lakŋi loɗi.
6Liyn ma vun niy-lum ma ŋolla ma hin ɗawni,
mi liyn ma ŋomom mi faraya.
7Del niy-lum namna ma hin ɗawni vi caw gurona vi Yuda,
nisi ma ŋom farayna visi ɗawn hay liy namna,
vulatita nisi ma tun suksi hay ziyna vi Askalon,
kay Ma-Vatɗina Lawna visiya yalam ma joksi loɗi,
sa gorvona visiya nam ma hotsi ay vo'o.
8Nan humi ŋulda vi sum sa Mowabna,
hiɗi burahta vi gurona vi Amon,
nisi pan sumuna van ŋolo,
nisi muɗ nagata visi ŋolo kuɗ sa Israyella.
9Kay na'ta nan ka iriya,
din mi Ma-Vatɗina vi vok-ma-duura,
Lawna vi Israyel,
Awa, Mowab ma muɗ ki Sodoma nala,
sum sa Amonitna ma muɗ ki Gomora nala,
mi liyn ma yalam ɗubi kay us ma joona,
liyn ma vurok mandana,
mi liyn ma hini goy ɓulakiya kay dok-doko.
Dir sumuna van ma hinina ma vurumsiya,
dir sumuna van ma hinina ma vurna baŋalsiya.
10Lawt kayni co kisi ɗawn kuɗ subur-tuwta visiya,
kay mige nisi ŋul sumuna vi Ma-Vatɗina,
Ma-Vatɗina vi vok-ma-duura,
nisi lisi las ŋolo kaw.
11Ma-Vatɗina ma muɗ katsi joo'o,
kay lawayna visi ma gaa kay nagat kafna nam ma tom goyo;
gigekaw hay nagata valamu valamu ma girif gaa vokomu.
Gigekaw hay jokota valamu valamu.
12Nigi sa Etiopiyana kaw,
kew-gaferaŋa van ma calgi goyo.
13Nam ma meɗ ɓalam goyo ta-ta hay gal ma gaana,
nam ma to Asiriya gaa'a,
nam ma muɗ Ninive goy mi liyn ma hiweŋŋa.
Ma so' goy haɓi ki fulda nala.
14Muuriyan ma bur goy way-ziyna,
sle ma fulla ma tok tuwamu;
gudufna hiɗi ɦuna ma tun sukam hay yam dolla vi ziyna,
layayn ma ciriya goy hay ir-ziyna pa,
vun-ziyn ma hin goy baŋa'a,
kay gu-gamna nisi ma vurumumu.
15Sargi hoyok-ziy namna ma firit hayam ŋolla tige.
Nisi sa lak gaa'a bay narta hay diksiya,
sa di hay diksi ala:
Numa'a, ŋra hiɗi numa'a gige?
Sargit tige, nisi ɓulakay goyɗi su?
Muɗi mi zulla vi muuriyana.
Sum sa jikawa tam liy namna goboyona,
ma feɗ kuy-kuy',
ma ci ɓisi kuɗulu' kuɗulu'.
Currently Selected:
SOFONIYA 2: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
