ZAKARIYA 5

Zakariya wi ɗerwella

1Nan poŋ iran kulo mara lo, nan ɗuw na kayni, iran wi ɗerwel ma ɗutina kep ka dol kulo'o hay simeɗna. 2Nam di tanu, iraŋ wum mige? Nan ka hotom dita: Iran wi ɗerwel ma ɗuti kep ka dol kulo hay simeɗna, fiyokom ir goldoŋ dok-ma', buɗukam ir goldoŋ doogo. 3Nam hot di tanu: Kayni mi be'da ma min mer goy hay nagat kafna, kuɗ va ma ɗoy hay ɗerwelda kayni, sum sa kuliyan kaf ma digiɗis goy tani pa, sum sa ŋulda kaf ma digiɗis goyo. 4Ma-Vatɗin vi vok-ma-duura di'e: Ɗerwel namna nan gumi goy kayni kay nam kal hay ziyna vi sum sa kuliyana hiɗi sum sa yi va kisi hiɗi sinda hay semda vanu. Nan min ala ɗerwel namna tun ziyna valam hay liy namna, kay nam ma ŋal guna hiɗi hiɗiyn goyo.

5Sunda-wuralawn ma ka kus yoboyn hiɗi nanu kalays vokomu, nam di tanu: Poŋaŋ iraŋ kulo'o ɗuwaŋ va ma min kalay goyo. 6Nan ka hotom dita: Mi mige? Nam di'e: Kalay goy ɗawn ti tikisita. Nam hot di tan lo: Kayni mi jiw-zlata vi sum sa hay nagat kafna. 7Ɗuw na kayni, va ma nek ma tuni vun tikisita poŋ goyo, cat ka musi kalaf hayam dam'. 8Nam di'e: Kayni ɗek jiw-zlata, nam zuta'ays kalaf hay tikisita, hot duka' vuna'is kulo'o.

9Nan poŋ iran kulo lo, ɗuw na kayni, boyn ma' co goy kiranu. Hay gilaŋatsiya simeɗn ka biw goyo, gilaŋatsi ki gilaŋat lay-joriyon nala, tikisi na'ta nisi sla' kulo jar dukalawna hiɗi nagata. 10Sunda-wuralawna ma ka kus yoboy hiɗi nanu, nan jobom ala: Tikisita nisi nara' kayn arige? 11Nam hot di tanu: Nisi nara' kayni kay ina' ziy kulo hay duk-nagata vi Sineyar;#5:11 Sineyar kayni ti Babilon. hay li ma liyna va' asawana, nisi ma tuna' hay liya'na may.

Currently Selected:

ZAKARIYA 5: Massana

Highlight

Copy