ZAKARIYA 4

Va ma tun fitil kalamna hiɗi gu-olivena ma'

1Sunda-wuralawna ma ka kus yoboy hiɗi nanu ma tanu, nam zliyan kulo ki zliy san kulo hay senda nala. 2Nam ka di tanu: Wulini iraŋ ka wi mige? Nan ka hotom dita: Iran ka wi va ma tun fitil kalamna ma koti hiɗi ora, dowayt ka tuni kulo kalamu, fitilla siɗiya ka tunis kulo kalam lo, hay yalam ma kulona, liyn ma nar mulla kulo hay vunamna ka siɗiya lo. 3Gu-olive ka goboy talam ma', kep hay gal ma gulla vi dowayta, kep hay galam ma jufna may. 4Sunda-wuralawna ma ka kus yoboy hiɗi nanu, nan sli ditiya di talam ala: Mulanna, sle namna kayni min ɗek meloge?

5Sunda-wuralawna ma ka kus yoboy hiɗi nanu di tanu, sle namna cani cawam kiraŋɗi lo su? Nan ka di'e: Cawam kiranɗi, Mulanna. 6Bugolda nam sli ditiya di tanu: Kayni mi yoboyn ma Ma-Vatɗin dum tam Zorobabel. Kayn may hiɗi donotɗi, hiɗi gaŋeraŋɗi lay, may hiɗi ŋusta vanu; din mi Ma-Vatɗina vi vok-ma-duura.

7Nak hiɗiy ta ŋolda zawni, nak as lum vok Zorobabel mi mige? Nak ma toys gaa'a, hiɗiy ŋolda ma kalay goyo jar jaf-sumun pa, sumun kaf ma siwel kuɗum ala toyt kagu, toyt kagu.

8Ma-Vatɗina di yoboyn tan lo ala: 9Ziyd zawni tuna' dira' gaa mi Zorobabel, vat inda va' ɗawn mi nam lay, nigi ma wi ala ganay tigi kayn mi Ma-Vatɗina vi vok-ma-duura. 10Kay nisi sa cen kuɗ lop ma tun caw hiɗi maŋaytna, hay li ma irsi ma wi va ma ŋa-ziyn hay ɓam Zorobabel ɗawni, diksi ma firiya. Slen ma siɗiyan cani mi ira vi Ma-Vatɗina ma ka ŋuy yam nagat kafna.

11Nan sli ditiya di talamu, wulini gu-olive ma' lakŋi, kep hay gal ma gulla vi va ma tun fitil kalamna, kep hay galam ma jufna kayn ɗek mige? 12Nan hot sli dita jobom sem ma ma'na lo: Bam-gun ma' ma lakay goboy tam va ma ora ma' kaw, ma mul ma ora kalay goy hayam pa lakŋi ɗek mige lo? 13Nam ka hot dit tanu: Cawam may kiraŋɗi lo su? Nan ka dumu: May kiranɗi Mulanna. 14Nam di'e: Nisi kayni si sumun ma' sa mul ɦoki kisiya, sa ka laki vok Bum-Sumuna ma mul nagat kafna.

Currently Selected:

ZAKARIYA 4: Massana

Highlight

Copy