ZAKARIYA 2
2
Miyok ma fiɗina hiɗi sa zla cafna fiɗi
1Nan poŋ iran kulo'o, ɗuw na kayni, iran wi miyokŋ fiɗi. 2Nan ka di tam sunda-wuralawna ma ka kus yoboyn hiɗi nanu ala: Miyokŋ lakŋ ɗek mige lo? Sunda di tanu: Lakŋi mi miyok ma mer hoyok-ziyn Yuda hiɗi Israyel hiɗi Yerusalem goyna.
3Ma-Vatɗin ɗekan sum sa zla cafn kiran fiɗi'. 4Nan ka job ala nisi lakŋ co lum meloge? Nam ka dan ala lakŋ mi miyok ma mer hoyok-ziyn Yuda goyna. Sa may as a col kulo vokom noŋɗi; may sa zla cafn lakŋi ka'a kay muɗ sumun nari, kay sum sa yaw miyokŋa visi kulo kat nagat Yudana, nam min cuksi goy gine'e, mersi goy kaw.
Zigew ma ŋaɓna
5Nan poŋ iran kulo'o, nan ɗuw na kayni, iran wi san kep hiɗi zigew ma ŋaɓta ka hay ɓalamu. 6Nan di'e: Naŋ tuɗ arige? Nam hotan dita: Nan min tuɗ ŋaɓ Yerusalem, kay ɗuw fiyokŋa va'a hiɗi buɗukŋa va'a. 7Ɗuw na kayni, sunda ma ka law hiɗi nanu tuɗis vokomu, sunda mara'a co ŋaf hiɗi namu. 8Sunda-wuralawna di tam hena: Fokaŋis jaŋi, sa ma joriyon zawn naŋ ma dum ala, hoyok-ziyn Yerusalem vunam ma mal goyo, kay sumuna hiɗi farayna ma dak hayam ŋolo; 9Ma-Vatɗina di'e: Nan kay tuwan ma muɗ ɗawn ti kuta ta ŋuyi ta'a hay baŋal gulmunna, nan ma ɗek gajijita van goy jarsiya.
10Ma-Vatɗin di'e:
Mungi jaŋi, hingi nagat ta gal gaat goyo,
kay nan mergiyawa goy hay gef-nagat fiɗi pete.
Din mi Ma-Vatɗina.
11Piragu Siyon,
naku ta ka musi goy vi goot-cata vi Babilon.
12Kay humgi va ma Ma-Vatɗina vi vok-ma-duura di'e:
Bugol kayni gajijita ma co'o,
nam ganiyawa jar jaf-sum sa vurum slena vigina,
la sa ma min tun ɓalam tigiya,
nam garanti kayn nanu.
13Humgiya, nan min sli ɓan kulo'o katsiya,
nisi ma fi lasta hay ɓam sum sa nisi lisi gorvo jewna,
nigi ma wi ala nanu gan ay mi Ma-Vatɗina vi vok-ma-duura.
14Siwelag kulo ŋolo hiɗi firita,
nak goota vi Siyon,
kay ɗuwagu nan ka co'o kay li ziy hayagu.
15Hay buur namna ɗawni,
jaf-sumun ŋolo ma jun tuwsi tam Ma-Vatɗina;
nisi kaf ma muɗ goy sumuna vanu,
nan ma li ziy jargiya,
nigi ma wi ala gan ay jargi kayni,
mi Ma-Vatɗina vi vok-ma-duura.
16Sumuna vi Yuda ma muɗ goy ir vi Ma-Vatɗina,
nisi ma lak hay nagata valam ta peldetta,
nam ma hot vilek Yerusalem lo.
17Nigi sum sa hay nagat kaf,
lakgi kiliŋ vok ir Ma-Vatɗina,
kay nam zliyawa kulo'o,
kaliyawa goy hay liyna valam ma peldetna pa.#2:17 Sof 1:7.
Currently Selected:
ZAKARIYA 2: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
