ZAKARIYA 1

Sa jobta vi Israyel sa jewna hiɗi sle ma nisi law kalamna

1Hay til ma glafandina vi busata ma'ta vi mulla Dariyus, Ma-Vatɗina di yoboyn tam Zakariya goora vi Berekiya goor-ŋolona vi Iddo, Ma-Vatɗin ka dum ala: 2Nanu dikan bulak ŋolo kat sumaygiya. 3Naŋ ma di tisi ala: Ma-Vatɗina vi vok-ma-duura ka di ala: Hotgiyay tanu, -- din mi Ma-Vatɗina vi vok-ma-duura -- nan ma hotis kirgi kaw, din mi Ma-Vatɗina vi vok-ma-duura. 4Nigi ma li tuwgi ki sumaygi naɗi, nisiya, sa jobta sa jewn kus yoboyn tisi ala: «Humgi va ma Ma-Vatɗina vi vok-ma-duura di'e, hotgiyay bugolgiya tam hagata vigi ta joota pa, hingi law ta joota vigi goyo». May nisi min humɗi, nisi min tun ŋalda visi kanɗi. Din mi Ma-Vatɗina. 5Wulini sumaygi ka arige? Nigi var ala sa jobta vigi ma fot kulo su? 6May yoboyna vanu hiɗi gatta ta nan vula' hay vun sa sunda vanu sa jobta, yoboy namna may co tam sumaygiɗi su? Nisi muɗ varta visiya, nisi di'e: Lawna vi vok-ma-duura gatayawa, nam vilek kay lay joo'o kayn kuɗ hagat joo'o ta nay sla'ta hiɗi lop ma joona vaya.

Zakariya wi kulumayna

7Hay buurta dok-ma' yam fiɗita vi til ma doogo yam kepna, ma yum ala tilla vi Sebat, kayn ti busata ma'ta vi mulla Dariyus, Lawna di yoboyn tam Zakariya ma jobta, goora vi Berekiya, goor-ŋolona vi Iddo, nam di'e:

8Hay henjeta va vul tuwam kiranu, Ɗuwgiya, san kep ka ɓey kay kulum ma bufna, nam ka coli jar warana#1:8 Warana mi gun ma ka kel niyna Neh 8:15. gaa hay liyn ma beɗna, kulumay ma bufna hiɗi ma slawna hiɗi ma haɓayna ay kaw. 9Nan ka job ala mulanna, nisi kayn si sarige? Sunda-wuralawna ma ka kus yoboyn hiɗi nanu di tam ala: Nan ma ɗekaŋ kay sum nisina. 10San ma coli jar warana sli ditiya di'e: Lakŋi si sum sa Ma-Vatɗin cuksiyay kay ŋuy nagatna. 11Nisi di tam sunda-wuralawna sa ka lakay jar warana ala: Numa ŋuy yam nagatiyawa kafe: Ɗuwgiya, nagat ka tuni kiliŋ hay sle'ta. 12Bugolda sunda-wuralawna sli ditiya di'e: Ma-Vatɗina vi vok-ma-duura, wulin kayn busat laawa dok-siɗiya ma naŋ ɗek ɦiyda vaŋ goy tam Yerusalem hiɗi Yuda, busat ta naŋ min lisi slugot haya'ɗita hini gaage lo? 13Ma-Vatɗin hot dit tanu hiɗi della vi sunda-wuralawna ma ka kus yoboyn hiɗi nanu, nam dan yoboyn ma ŋaana, ma vul teŋ-irta.

14Sunda-wuralawna ma ka kus yoboy hiɗi nanu di tanu, siwelaŋu, daŋis ala: Humgi va ma Ma-Vatɗina vi vok-ma-duura: Nan hobi hiɗi hunayt ŋolo kay Yerusalem hiɗi Siyon, 15Nan muɗi ɦiy ŋolo kat jaf-sum sa subur tuwsina, kay jewe nan ay kaay ɦiy ŋol noŋɗi, may wulini nisi jor jootawa. 16Kay na'ta humgi va ma Ma-Vatɗina ka di'e, nan min hotay hay Yerusalem hiɗi slugota, ziyna van ma hot in haya' lo, zigewn ma giys tam Yerusalem lo, Din ma Ma-Vatɗina vi vok-ma-duura. 17Siwelaŋis lo ala: Humgi va ma Ma-Vatɗina vi vok-ma-duura ka di'e, hoyok-ziyna vanu ma hot fi farayn ŋol lo; Ma-Vatɗin ma teŋ ir Siyon sem mara lo, nam ma hot vilek Yerusalem sem mara lo.

Currently Selected:

ZAKARIYA 1: Massana

Highlight

Copy