MATEWUS 19

YESU KAL KULO HAY YERUSALEM

Di-goyta vi cata

Mark 10:1-12; Mat 5:31-32

1Van li nala hay li ma Yesu vat yoboyna valam vatna, nam fokis hay Galileya pa, kal hay gal nagata vi Yuda goy bugol Yordan. 2Sumun ŋolo tap kuɗum ɗawni, nam muɗsi goy ŋaa'a. 3Sa Farisena ma talamu kay nememu, nisi ka jobom ala: hagat ka vuli tam sana kay gi cata valamu kuɗ law mige mige kaf su? 4Nam hot disiya: Nigi bay ɗuw hay ɗot tuwa su? Ɗot di ala: Hay cawa'ta tunita nam ma in slena kot jufna hiɗi cata, 5nam di'e: Kay na'ta jufna ma hin bulumu hiɗi sulumu, tap hiɗi cata valamu, nisi ma', may sliw-tuwsi ma muɗ kepe, 6nisi may tak-tak ma' loɗi, may sliw-tuwsi muɗi kepe, kay na'ta va ma Lawna tapami tapna, hin san munum jaram goyɗi. 7Nisi dumu: Musus vulma gatta kay vul ɗerwelda ta mun jar jufna hiɗi cata, ta gi cata, kayn kay mige?#19:7 Ɗuw hay Gsm 24:1-4. 8Nam disiya: Musus hingi cuk boyna vigi kayn kuɗ so'otta vi dikgiya, may hay cawa'ta tunita va ma ki kayn nala mayɗi. 9May nan digiya: La san gigekaw gi cata valamu, la kuɗ viyuwta tutaɗi, may nam sli ca tara'a ni, nam li zlata-bulo'o.

10Sa hatayna valamu dumu: La lawt jar jufna hiɗi cat kayn ki kayn nala ni, may ŋaa'a kay sa sli caɗi. 11Nam hot disiya: Sumun kaf may hum caw yoboyn kaynɗi, may humum si sa nam vuli tisina. 12Kay sum sa patayna ka'a, nisi ay nala kalaf hay sumaysi pa; segen ka'a patsi si sumuna, segen ka'a muɗ tuwsi pataya, kuɗ mulda-wuralawna. Sa ma as hum caw kayni, hinim huma.

Gurosguray sa gurayna

Mark 10:13-16; Luk 18:15-17

13Kay na'ta nisi mar gurosgurayn talamu kay nam ma bar ɓalam kisiya, siɗaw kisiya kaw, may sa hatayna lawsiya. 14May Yesu di'e: Hingi gurosgurayn ŋal kiliŋ, telsi goy kanɗi, kay mulda-wuralawna fa' si sum sa kisi nisi naana. 15Nam bar ɓalam kisiya, kal goy hay liy mara'a.

Sa ma joriyo ma farayna

Mark 10:17-31; Luk 18:18-30

16Sa kepe ma tam Yesu, ka dum ala: Bum-yalla, nan ma lum mi mige kay fi irita vatɗita? 17May Yesu dumu: Naŋ joban kay ma ŋaana kay mige? Ma ŋaana ka kep tuta. May la naŋ min tuɗ kalafi hay irita, laŋ kuɗ vun-ma-gatna. Nam hot job ala vun-ma-gatna marige? 18Yesu di'e: Naŋ ci matɗi, naŋ li zlata-buloɗi, naŋ ka sinɗi, naŋ kulɗi. 19Naŋ ma sli yam buŋu hiɗi suŋu kulo'o, naŋ ma min sugoloŋu ki tuwaŋ nala. 20Sa ma joriyona dumu: Slen kayni pet nan ka li kuɗumu, hini kan bay li mi mige? 21Yesu dumu: La naŋ min muɗ goy ŋaa'a noŋ pasiyaki ni, tuɗaŋu, gusaŋ slena vaŋ kaf goyo, vulum mi sa hawna, naŋ ma fi farayna hay wuralawna, naŋaya tapaŋay kuɗanu may. 22May hay li ma sa ma joriyon kayni hum yoboyn namna, nam kalay goyo yor hay dikam kalafi, kay nam mi sa ma faray ŋolo.

23Yesu di tam sa hatayna valamu: Nan digi gasita: Lop ŋolo kay sa ma farayna a kal hay mulda-wuralawna. 24Nan digi lo: Lamgana as raw hay ŋil baadalla bay lopo suw sa ma farayna ma min kal hay mulda-Lawna. 25Hay li ma sum sa hatayna hum kayni, nisi muɗ ɦuyum' ŋolo di'e: La ki kayn nala ma fi su'da ɗawn gige? 26Yesu ɗuwsiya, nam disiya: San may as kay li slen kayni noŋɗi, may Lawna as kay slen pet. 27Peter sli ditiya dumu: Ɗuwaŋu, wulini numa hin slena vuma'awa goy pete, tapawa kuɗaŋu, numa'a ma fi mige? 28Yesu hot disiya: Nan digi gasita: Hay li ma goora vi sana ma mus hay zlamda-mulda vi gajijita valamu hay mu'da wulita vi slen kaf ɗawni, nigi sa tap kuɗanna, nigi ma lak hay zlamda-mulda doogo yam ma', nigi ma ka kitat kay jafna vi Israyel sa doogo yam ma'na. 29Gigekaw ma hin goy ziyna valam kla, ɓosiyom sa jufayn kla, sa boyn kla, bulum kla, sulum kla, guron kla, sinen kla kay semda vanu, nam ma fi sem kis suwa, irita vatɗita nam ma yawa' voco'o kaw. 30May segena ŋolo jar sa jewna ma muɗ si sa cawna, sa cawna ŋolo ma muɗ si sa jewna kaw.

Currently Selected:

MATEWUS 19: Massana

Highlight

Copy