MATEWUS 18

Ma ŋol suwna gige? Slen ma puk san gaana

Mat 5:29-30; Mark 9:33-50; Luk 9:46-50

ƁAKŊA KAY SUM-WURANA HIƊI GIDA VI SULUKŊA

1Hay liy namna sa hatayna ma tam Yesu jobom ala: Ma ŋolla hay mulda-wuralawna mi gige? 2Yesu yi goor-goor ay kepe, nam musum jarsi dam', ka disi ala: 3Nan min digi gasita: La nigi hamgiɗi, la nigi muɗ tuwgi ki gurosgurayn naɗi, nigi as cuk hay mulda-wuralawn noŋɗi. 4Hay na'ta gigekaw ma hot yalam gaa'a ki goor-goor damni nala, nam ma muɗ mi ma ŋolla hay mulda-wuralawna. 5Gigekaw ma vi goor-goor ki damni nala hiɗi firita hay semda vanu, nam vanti nanu.

6May gurosguray sa viy hay nan lakŋi, la san ɗut mara jarsi kep goyo, ŋaata hiɗiyt nekka ma jun kelemu, kay sirim gaa'a hay zulla vi niyn ma ŋolla. 7Joot kay sa nagatna kay ɗutta-goyta. Kay la linigekaw ɗutta-goyta ma ma'a, may joot kay sa ma mara'na. 8La ɓaŋu kla, seŋu kla nemaŋu, kaam goyo, gum goy gine'e hiɗi naŋu, kay a kal hay irita hiɗi ɓaŋ kepe dirlaya kaw, kayni ŋaa'a kaŋu suw ma naŋ kal hiɗi seŋ ma' pete, ɓaŋ ma' pete may gaŋis hay kuta tewɗita. 9La iraŋ nemaŋu, hulotom goyo, gum goy gine hiɗi naŋu. Kay a kal hay irita hiɗi iraŋ kepe, kayni ŋaa'a kaŋu suw ma naŋ kal hiɗi iraŋ ma' pete, may gaŋis hay kuta tewɗita.

10Nigi ma li ŋali kay guron lakŋi, nigi ma ɗuw mara jarsi kep birek-cekɗi, kay nan digi ala sunda-wuralawna visiya hay mulda-wuralawna ka ɗuw ir bunu ma hay wuralawna dok-doko. 11Kay goora vi sana maawa kay suɗ ma bay-goyna.

Ɦu-dimita ta bay-goyta

Luk 15:4-7

12Nigi var mige? La fok-dimina vi san ka kis, may la kep jaram ba goyo, nam ma hin ma dok-zleeŋe yam zleeŋena, tuɗ kulo'o kay hiɗiyta kay gar ta bay goytɗi su? 13La nam fa'a ni, nan digi gasita: Nam as li firi ka'a suw ma dok-zleeŋe yam zleeŋe ma ba goyɗin ɗisu? 14Nala kaw bugi ma hay wuralawna min ala gurosgurayn lakŋi kep kaw ma ba goy kuɗsiɗi.

Vulda vi gida

15May la ɓasuŋ li sulukawa (kataŋu), tuɗaŋ gatam goy valamu. La nam humawa kuɗaŋu, naŋ fi ɓasuŋawa. 16May la nam min hum kuɗaŋɗi, vaŋ sa kep lebo yaw sum ma' kuɗaŋu, kay lawt kaf kota kuɗ yoboyna vi sa di-goyna ma' lebo ɦidi. 17May la nam min hum kuɗsiɗi, naŋ ma di kayni tam tapna, la nam min hum kuɗ tapnaɗi lay ni, hinim muɗ kiraŋu ki sa ma waana ma tar vun-lumuna nala.

18Nan digi gasita: Slen pet ma nigi junum gaa kay nagat tani, nam juni hay wuralawna, slen pet ma nigi butum goyo gaa kay nagat tani, nam buti hay wuralawna kaw.

19Nan digi gasit lo ala: Slen pet ma sumun ma' jargiya tap vunsi kay siɗaw kalamna, kayni bunu ma hay wuralawna ma vulsita. 20Kay la arigekaw sumun ma' kla, ɦidi kla dak tuwsiya hay semda vanu ni, nan ka jarsi dam'.

21Hay na'ta Peter tuɗ talamu dumu: Bum-Sumuna, nan ma vul gida mi ɓasunna sem gaage la nam li suluk katanu? Co ta-ta sem siɗiya su? Yesu dumu: 22Nan may daŋ ala sem siɗiya ɦawaɗi, may ta-ta dok-siɗiya sem siɗiya.

Sa ma sunda ma wi haw saɗina

23Kay na'ta mulda-wuralawna ŋray ca hiɗi sa ma min ala sa sunda valamu vum caw sle ma kisin goyo. 24Hay li ma nam tun caw joba, nisi mar talamu sa kep ma as vulum gurjuta ir talente birim doogo. 25May kay sle ma nam hotom goyna may kalamɗi, mulamna vul hagata kay nisi ma gusum goyo hiɗi cata valamu, hiɗi gurona valamu hiɗi slena valam noŋ kaf, kay wurakam slena valamu. 26Sa ma sunda girif gaa'a, nam dab vokom gaa'a vok mulamna dumu: mulanna, vaŋ ŋalaŋ tan neeɗa, nan ma wurakam goy kafe. 27May sa ma sunda nam muɗ hawi kir mulamna, nam butum goyo, hinim balla valam kafe. 28May hay li ma sa ma sunda kayni kalawa goyo, nam ŋaf hiɗi niram ma sunda kepe, ma balla valam ka kalamu ir sulay kis-kepe. Nam bowom kelemu, dumu: Wurakan balla van ma kaŋŋiya. 29Niram ma sunda girif gaa'a, siɗawamu di'e: Vaŋ ŋalaŋ tan neeɗa, nan ma wurakaŋu. 30May nam minɗi, kaliya, gum daŋgaya, ta-ta nam wurak bal ma kalamna goy kafe. 31May hay li ma nuriyom sa sunda wi va ma lina, diksi tisi ŋolo, nisi ma'a di tam mulsina kay sle ma lina. 32Hay na'ta mulamna yum talamu dumu: Naŋ sa ma sunda ma dikaŋ joona, nan hinaŋ balla van ma kaŋŋa kay naŋ siɗawanawa, 33naŋ kaw as li slugot tam niraŋŋa ki nan li slugot taŋ naŋ nala ɗisu? 34Mulamna muɗ ɦiya, vulum goy tam sum sa las sumuna, ta-ta nam wurak bal ma kalamna goy kafe.

35Bunu ma hay wuralawna ma li tigi ɗawn nala kaw, la nigi vul gida mi ɓosiyogina hiɗi dikgi kafɗi.

Currently Selected:

MATEWUS 18: Massana

Highlight

Copy