MATEWUS 17

Yesu jok nafaramu

Mark 9:2-10; Luk 9:28-36

1Hay buur karkiya bugolda, Yesu yaw Peter hiɗi Yakub hiɗi ɓasulumna Yohana kuɗumu, kalsi kulo kay hiɗiyt fiyokka goy ŋayaya. 2Tuwam muɗ kirsi ir valamu, vokom muɗ wile'e ki fatta nala, sligara valamu muɗ haɓ tal-tal' ki haraŋa nala. 3Musus hiɗi Eliyas vul tuwsi kirsiya, nam kus yoboyn hiɗi nisiya. 4Peter sli ditiya di tam Yesu: Bum-Sumuna: Ŋaa'a kay nay lak tani. La naŋ mina, nan min pi guɗuk tan ɦidi: Kep kaŋ naŋu, kep kay Musus, kep kay Eliyas may. 5Hay li ma vunam bay vat tuwan kayni, ɗugul ma haraŋa li kisi ŋusu, nisi hum della may goy hay ɗugulla pa ka di ala: Zawni mi goora van ma hayan kalamna, nam kiran ŋaa ŋolo, humgi kuɗumu. 6Hay li ma sa hatayn hum kayni, nisi girif gaa'a, dab voksi gaa'a, muɗ nar ŋolo. 7Yesu co tisiya, nam josiya disiya: Yawgi kulo'o, ligi narɗi. 8Hay li ma nisi cuk irsi goyn kayni, nisi wum mi Yesu valam kep zaw'. 9Hay li ma nisi jik goy gaa kay hiɗiyta pa, Yesu gatsi ala va ma nigi wumna nigi ma dum goy mi saɗi, ta-ta goora vi sana ma day kulo'o hay mitta tuwa.

10Sa hatayna jobom ala: Sa wi-ɗota di ala Eliyas ma co jew tuwa kayn kay mige?#17:10 Ɗuw hay Mal 3:23. 11Nam hot dita: Eliyas ma ma'a gasi, nam ma kot slen pet goy hay liyamu. 12May nan fi digi ala Eliyas miy vatiya, may nisi fi wumɗi, nisi lasamu ki nisi min nala. Nala kaw goora vi sana ma ci lasta hay ɓisiya. 13Hay na'ta sa hatayn wi ala nam di tisi kayn kay Yohana ma Baptisma.

Yesu yer sa ma ful kalamna goyo

Mark 9:14-32; Luk 9:37-45

14Hay li ma nisi co goboy tam sumuna, sa kep ma tam Yesu girif gaa vokomu di'e: 15Bum-Sumuna, laŋ slugot kay goora vaŋ lige! Kay ul cumu, nam ka li las ŋolo, dok-dok nam nig hay kuta, nig hay niyna kaw. 16Nan maram tam sa hatayna vaŋ kaw, may nam muɗ goy kisi ŋaaɗi. 17Yesu hot dita: Nigi jaf ma bay-vina ma viyuk-viyukŋa, nan ma mus hiɗi nigi atage? Nan ma ziygiya ta-ta lancitige? Maramay tan tani. 18Yesu bay fulla, fulla kal goy hay goor-goora, nam muɗ goy ŋaa'a hay leer namna de'. 19Hay na'ta sa hatayna co tam Yesu goy ŋayaya dumu: Numa'a fi a digiɗ fulla goy kalamɗi kayn kay mige? 20Nam disiya: Kuɗ vida vigi ta kiɗayta. Nan digi gasita, la vida vigi ka ki jaf-seneve nala, la nigi di tam hiɗiyt zawn ala jokagis ɗaw goyni kaw, na' fi joka, va ma nigi as a liɗin mayɗi. 21May jaf ful namna kayni, as digiɗim goy kayn hiɗi siɗawta hiɗi laata kaw.

Yesu di goy kay mitta hiɗi dayta-kulota valamu

22Hay li ma nisi ka poy hay Galileya, Yesu disiya: Goora vi sana ma vulis goy hay ɓam sumuna, 23nisi ma cum goyo, hay buurta ɦidita nam ma day kulo'o. Nisi yor tuwsi ŋolo.

Yesu vul taara

24Hay li ma nisi co hay Kapernawum, nisi sa yaw taara vi drakma#17:24 drakma kayni mi taara vi Tempella. ma ma' ma'na tuɗ tam Peter dumu: Bum-yalla vigiya may tar drakma ma ma' ma'naɗi su? 25Nam di'e: Taramu. Hay li ma nisi co kalaf hay ziyda, Yesu sli diti jewe, nam ka job Peter ala: Naŋ var mige? Muliyan sa hay nagatna yaw taar kayn hay ɓam gige? Hay ɓam gurona visiya lebo hay ɓam sa pulla su? 26Peter hot dit ala: Hay ɓam sa pulla. Yesu hot dumu: Guron hayɗin taar may tuni kisiɗi. 27May kay nay ma li va ma dabsi sesiɗi, tuɗaŋ kel niy-lumna, gaŋ siwit goloŋ kepe, kuluf ta naŋ va' jewta naŋ ma sla'a, hay li ma naŋ mala' vuna'awa goyo, naŋ ma fi stater#17:27 Stater kepe ir drakma fiɗi. vuna' kepe, slaŋga, wuraka' kaŋu hiɗi nanu.

Currently Selected:

MATEWUS 17: Massana

Highlight

Copy