MATEWUS 16

Nisi job ɗekka ta may kulo wuralawni pa, isna vi sa Farisena

Mark 8:11-21; Mat 12:38-42

1Sa Farisena hiɗi sa Sadusena ma talamu kay wakamu. Nisi siɗawamu kay nam ma li ɗekka kirsiya ay kulo dukalawni pa. 2Yesu hot ditiya disiya: Vulatita hay li ma dukalawn ka slawi, nigi di ala liyn ma li ŋaa'a; 3graw culumta hay li ma liyn ka guriya, nigi di ala niyn ma si vaydi. Nigi wi kay poŋ jar slen ma dukalawna, may ɗekka vi liyna, nigi wum cawamɗi kayn nanige? 4Jaf-sum sa joona sa li zlata-bulota gar ɗekka; may ɗekka ta vulis tisit ɗawni ti ɗekka vi Yonas. May nam hinsiya, nam kala.

5May hay li ma sa hatayna co kulo'o gal hena, yisi jok funiya. 6Yesu disiya: Ligi ŋali, ŋomgi tuwgi ŋaa'a kay isna vi sa Farisena hiɗi sa Sadusena. 7Nisi var jar-tuwsi ala: Kayni kay ta ala nay yaw fun ay kayɗit klasige! 8Yesu wi varta visiya, nam disi ala: Nigi var jar-tuwgi ala kayni kay nigi yaw funay kigiɗi klasige kayni kay mige? Nigi sa vida vigi kiɗayna? 9Nigi bay wi tuwa su? Humgi kaw may gigiɗi su? A fun vasl ɦawa ɓurawi tam sum sa birim vaslna, tikisi ma nigi hobom hiɗi namna gaage? 10Lebo a fun siɗiya ɦawa ɓuraway tam sum sa birim fiɗina, tikisi ma nigi hobom hiɗi namna gaage? 11A nan di tigi kayni may kay funɗi, nigi may wi kaynɗi su? May ŋomgi tuwgi ŋaa'a kay isna vi sa Farisena hiɗi sa Sadusena.

12Hay na'ta nisi wi ala nam di tisi kayni kay nisi ma ŋom tuwsi kayni kay isna vi funaɗi, may kay hatta vi sa Farisena hiɗi sa Sadusena.

Di-goyta vi Peter

Mark 8:27-30; Luk 9:18-21

13Hay li ma Yesu co hay nagata vi Sesariya vi Filipi, nam job sa hatayna valamu ala: Sumuna di goy kan nan goora vi sana ala nan mi gige? 14Nisi hot dita: Segena di ala naŋu mi Yohana ma baptisma, segena ala naŋ mi Eliyas, segena lo ala naŋ mi Yeremiyas lebo kep jar sa jobta-Lawna. 15Nam hot disiya: May nigi di kan ala nan mi gige? 16Simon Peter di'e: Naŋu mi Kristu, goora vi Lawn ma irina. 17Yesu hot dumu: Sle'ta ka kaŋu, Simon goora vi Yonas, wida kayni may vulaŋgi sliwna hiɗi busuwnaɗi, may vulaŋgi mi bunu ma hay wuralawna. 18Nan di ala naŋu mi Peter, kulo kay hiɗiy namna nan min in ekklesiyata vanu, vun-galana vi liyna vi mitta ma li gaŋeraŋ ka' noŋɗi. 19Nan min vulaŋ klena vi mulda-wuralawna: Va ma naŋ junum gaa kay nagat tani, nam juni hay wuralawna, va ma naŋ butum goyo gaa kay nagat tani kaw, nam buti goyo hay wuralawna. 20Kay na'ta Yesu di tam sa hatayna valamu kay nisi ma di goy tam sumun ala nam mi Kristuɗi.

21Hay na'ti pa, Yesu tun caw di goy tam sa hatayna valam ala, nam ma tuɗ hay Yerusalem, sa maariyana hiɗi muliyan-sa-ɗifinna hiɗi sa wi-ɗota ma lasam ŋolo, cum goyo kaw, may hay buurta ɦidita nam ma day kulo'o. 22May Peter vum goy ŋayaya, ka gatam ala: La Lawn mina, Bum-sumuna, hin van kayni li taŋ noŋɗige! 23May Yesu muɗ iram ŋoromu di tam Peter ala: Tuɗaŋis goy bugolanu Satan, kay naŋ mi va ma daban senu, kay vaara vaŋu may mi vaara vi Lawnɗi, may vaara vi sumuna.

24Ki kayn nala Yesu di tam sa hatayna valamu: La sa min tap kuɗanu, nam ma noy tuwam goyo, sli grakŋa valam kulo kalamu kay tap kuɗanu. 25Kay gigekaw ma min suɗ irita valamu, nam ma ba'a, may gigekaw ma min ba irita valamu kuɗanu, nam ma fa'a. 26La san fi sle ma hay nagat pete, may nam ba ciwta valam goyo kayn as gutum hiɗi mige? Va ma san as vulum kay muɗ ciwta valam hiɗi namu mi mige? 27Kay goora vi sana ma ma'a hay gajijita vi bulumu hiɗi sunda-wuralawna valamu kuɗumu, hay na'ta nam ma wurak gige gigekaw kuɗ lopna valamu valamu. 28Nan digi gasita: Sum sara'a jaray tan lak': Nisi ma jugo mittaɗi, ta-ta nisi ma wi goora vi sana ma'a hay mulda-wuralawna.

Currently Selected:

MATEWUS 16: Massana

Highlight

Copy