LUKAS 6

Sabatna, yam-wana, sa ma ɓalam keŋkeleŋŋa

Mat 12:1-14; Mark 2:23-28; 3:1-6

1Hay buur tara ta sabatna kepe, Yesu jik hay sinena, sa hatayna valamu kus yam-alkamarena, cokom hiɗi ɓisiya, tun caw mutumu. 2Sa Farisen sara'a dumu: Slen ma telay ala lum hay buura vi sabatnɗina nigi lumu kay mige? 3Yesu disiya: Slen ma David lumna nigi bay jaŋam tuwa su? Hay li ma mayt vumu, namu hiɗi sumuna valamu sa kuɗumna; 4nanige nam kal kalafi hay ziyda vi Lawna, nam yaw fu ma zlaray kay tuwamna ti'e, vul mi sa kuɗumna kaw, may hagat vuli kayni kay tum si muliyan-sa-ɗifinna tuta! 5Nam hot disiya: Goora vi sana mi mul-sabatna.

6Buur ma sabatna mara kep, Yesu kal hay sinagogŋa kay hata, sa mara kep ay dam', ɓalam ta jufta keŋkeleŋe. 7Sa wi-ɗota hiɗi sa Farisena ka cigeɗ Yesu, kay la Yesu as yerem goy hay buura vi sabatna klasige. Kayni kay nisi min gar yal ma pi lawt kalamu. 8May kay nam wi varta visiya, nam di tam sa ma ɓalam keŋkeleŋŋa: Fokaŋ kulo'o, colaŋ kulo jar sumuna. Nam fok kulo'o, col kulo'o. 9Yesu disiya: Nan min jobgiya, hay buura vi sabatn kayn hagat ka kay li ŋaat mi sana lebo kay lum joot su? A suɗ irita vi san lebo hina' ba goy su? 10Nam ɗuwsi kisi kafe, bugolda nam di tam sana: Meɗaŋ ɓaŋ goyo! Nam meɗ ɓalam goyo, na' muɗ goy ŋaa'a. 11Nisi hob hiɗi ɦiyda. Nisi law jar-tuwsiya kay va ma nisi ma lum tam Yesuna.

Vilekka vi sa hatayn sa doogo yam ma'na

Mark 3:13-19; Mat 10:1-15; Lop Ap 1:13

12Hay li namna kayni Yesu kal kulo kay hiɗiyta kay siɗawa. Nam bur tos hay siɗawta tam Lawna. 13Hay li ma liyn foowa goyo, nam yi sa hatayna valamu, vilek sara jarsi doogo yam ma', nam yisi ala sa apostolayna. 14Nisi kayni: Simon, ma nam kaam gileta valam ala Peter, hiɗi ɓasulumna Andre, Yakub hiɗi Yohana, Filip hiɗi Bartelemi, 15Matewus hiɗi Tomas, hiɗi Yakub goora vi Alfewus, hiɗi Simon ma yum ala «ma ciwera». 16hiɗi Yudas goora vi Yakub, hiɗi Yudas ma muɗ di newt kay Yesuna.

Yesu hat sumuna, yer sa moyn goy kaw

Mat 5:2-12

17Nam jik gaa hiɗi nisiya, col hay beɗna vi hiɗiyna, hay liy namna sa hatayna valam ka tokay ŋolo, hiɗi sum segen ŋolo sa may goy Yudiya pet hiɗi Yerusalem hiɗi nagat ta kel niyna Tirus hiɗi Sidon. Nisi co kayni kay humumu, kay gar yerta-goyta kay moyna. 18Nisi sa fuliyan ma liwisna lisi lasi muɗi goy ŋaa'a. 19Sumun kaf gar a tun ɓisi talamu, kay donota ta kalay goy hay tuwam pa ka muɗsi goy ŋaa'a.

20Bugolda nam cuk iram kir sa hatayna di'e:

Sle'ta ka kigi nigi sa hawna,

Kay mulda-wuralawna kayni figita.

21Sle'ta ka kigi nigi sa mayt cigi wulini,

Kay nigi ma hoba.

Sle'ta ka kigi nigi sa tiy wulini,

Kay nigi ma hob hiɗi firita.

22Sle'ta ka kigiya,

Hay li ma sumun ka gawt kigiya,

Hay li ma nisi ma digiɗgi goyo,

Hay li ma nisi ma ŋulgiya,

Ma noy semda vigi goyo

Ki na' muɗi liwisi nala,

Kuɗ semda vi goora vi sana.

23Firigiya hay buur namna ɗawni, pirgi kulo gif-gif', kay wurakŋa vigi ma hay wuralawna ma li ŋolo; kay sumaysiya las sa jobta-Lawna ki nigi nala kaw. 24May joot kigiya, nigi sa farayna, kay teŋ-irta vigi vatawa gaa tani. 25May joot kigi nigi sa hobay wulini, kay mayt ma cigiya. Joot kigi nigi sa ka cen wulini, kay nigi ma tiya, ma yora kaw. 26Joot kigiya hay li ma sumun kaf di ŋaat kigiya, kay sumaysiya li tam sa jobta-Lawna sa bay-gasina ki kayni nala kaw.

Minda vi sa gawt kayna

Mat 5:38-48; Rom 12:17-21

27May nan digiya, nigi sa ka humanu: Mingi sa gawt kigina, ligi ŋaat tam nisi sa ka gawt kigiya, 28gigi bolo kay nisi sa beɗgiya, siɗawgi kay nisi sa ligi lasi. 29La san caŋ hay geliyaŋ ta kepta, muɗ geliyaŋ heta talamu, la san min yaw sligar-tuwna vaŋu, telem sligara vaŋ henɗi kaw. 30Vul va'a mi sa ma siɗawaŋu, la san yaw slena vaŋawa, hot jobom kalam loɗi. 31Va ma nigi min ala sumun lum tigiyana, nigi ma lum tisi nisi nala kaw. 32La nigi minsi si sa mingina tuta ni, nigi fi slugot ɗawn arige? Kay sum sa sulukŋa kaw ka li nala. 33La nigi la ŋaat tam nisi sa ligi ŋaat tuta ni, ŋaata vigi san wa' ɗawn arige? Sum sa sulukŋa kaw ka li ki kayn nala ɗisu? 34La nigi vul bal kayn mi sa nigi var ala nisi ma wurakgitan tuta, nigi as fi slugot ɗawn arige? Sum sa sulukŋa kaw vul bal mi sa sulukŋa, kay nisi ma fi wurakŋa ŋray ca. 35May mingi sa gawt kigina, ligi ŋaat tam sumuna, vulgi balla hiɗi varta ta ala nigi ma hot fumuɗi, nala wurakŋa vigi ma li ŋolo, nigi ma muɗ goy gurona vi ma Kulo-Jamna, kay nam li ŋaat tam sa gi deɓɗina hiɗi sa joona. 36Ligi slugota, ki bugi li slugota nala kaw.

Kitata

Mat 7:1-5, 15-20; 12:33-37

37Kaagi kitatɗi, kay kitat ma kaays kigiɗi kaw. Tungi lawt kay sumunɗi, kay lawt ma tun kigi nigiɗi kaw. Vulgi gida, nala nigi ma fi gida kaw. 38Vulgi slena, slen a vulis tigi nigiya kaw; nigi ma fi dutta-kusta ta ŋaata, ta dakay gaata, ta siri goyta, ta kulfuti goyta. Kay dutta-kusta ta nigi ŋaɓ hiɗi na'ta kayni ma ŋaɓis tigiya hiɗi na'a kaw.

39Nam di law ma nir-niramna mara tisi lo ala: Sa ma dukina fi tan sa ma dukina su? Nisi ma' pete ma cuk gaa hay zulla ɗisu? 40Sa ma hatayna nam ŋol suw sa ma hatamnaɗi, may gigekaw hay li ma hatta valam vatawana, nam ŋray hiɗi sa ma hatamna. 41Naŋ wi burana hay ir ɓasuŋŋa, may gu-malla hay iraŋ naŋu naŋ wumɗi mayn kay mige? 42Lebo naŋ fi di tam ɓasuŋŋa ala: Hinan sli burana goy hay iraŋu, may naŋ kay tuwaŋu may wi gu-malla ma hay iraŋŋaɗi kay mige? Naŋ sa ma milena, slaŋ gu-malla goy iraŋ naŋ tuwa, bugolda naŋ ma muɗ wi'e kay sli burana goy kir ɓasuŋŋa.

43Gu ma ŋaana ma vuɗ vuɗ gu ma joona mayɗi, gu ma joo ma vuɗ vuɗ gu ma ŋaa mayɗi kaw. 44Sa wi gun mige mige kaw kuɗ vuɗna valamu valamu. Sa fi ja vuɗ gu-gumna hay gu-zigiynɗi, sa fi ja gulda-guldan hay gu-zigiynɗi kaw. 45Sa ma ŋaana yaw farayna valam ma ŋaan ay goy hay dikam pa, sa ma joona yaw slena valam ma joona ay goy hay birimna valam pa. Kay sle ma dikga hobay hiɗi namna kayni vunda dum goyo.

Li kuɗ yoboyna

Mat 7:21-29; 2 Pet 1:5-10

46Nigi yan ala Bum-Sumuna Bum-Sumuna, may sle ma nan di'e nigi min lumɗi kay mige? 47Gigekaw ma ma tanu, hum yoboyna, li kuɗum kaw, nan min ɗekgi kay sa ma nam ŋray hiɗi namna: 48Nam ŋray hiɗi sa ma in ziyna, ma jugoɗom selem ma tuni gaan gaa zulu, nam tun sem-ziyn gaa kay hiɗiyna, hay li ma niyn sulur goyo, niy-ɓatna wat tam ziyda, may na' as geɗ noŋɗi, kay na' ini dono ŋolo. 49May sa ma hum yoboyna li kuɗumɗina, nam ŋray ca hiɗi sa ma in sem-ziyda valam gaa hay nagata, bay se' jugoɗ gaa'a, ɓatna vi niyna wat ziyna, na' ɦo gaa wulini wulini, ziy na'ta ɓulak goy ŋolo.

Currently Selected:

LUKAS 6: Massana

Highlight

Copy