LUKAS 5

Nisi vi kuluf ŋolo

Mat 4:18-22; Mark 1:16-20

1May hay li ma sumun tun caw hebemu kay hum yoboyna vi Lawna, hay li ma nam ka colay deŋel niy-lumna Genesaret, 2nam wi lumay ma gurayna ma' ka lakay kulo deŋel lak'. Sumiyamna jikay gaa'a kay muz dena visi goyo. 3Nam jik kulo hay lum ta kepta, na' ti lumda vi Simon, nam dumu kay nam ma ɦur lumda goy way niyn neeɗa. Nam mus gaa'a hay lumda, tun caw hat sumuna.

4May hay li ma nam vat kusta-yoboynawa, nam di tam Simon: ɦurgiys vokgi hay liy ma zulla, cukgi dena vigi goloŋo. 5Simon hot dita dumu: Bum-yalla, numa bur ciw tos, may numa vi kuluf noŋɗi, may kuɗ dita vaŋu, numa min cuk dena vuma goloŋo. 6Nisi li ki kayn nala, nisi vi kuluf ŋolo, dena visi haw goyo. 7Nisi yi nuroysi sa hay lum heta kay nisi ma co gut kuɗsiya. Nisi co'o hob lumay ma ma'na, lumayna goboy ɗub gaa'a. 8Hay li ma Simon Peter wi kayni, nam girif gaa'a vok Yesu dumu: Bum-sumuna, vaŋ tuwaŋ goy hiɗi nanu, kay nanu mi sa ma sulukŋa. 9Kay narta vumawa, namu hiɗi sum sa kuɗumna kafe, kuɗ kuluf ma nisi ciwimna. 10Yakub hiɗi Yohana goora vi Sebedew sa ay tapay kuɗ Peter kaw narta visiya. Yesu di tam Simon: Laŋ narɗi, kay tun caw wulin pa, naŋ ma ciw sumuna. 11Hay li ma nisi mar lumayna kulo deŋel marna, nisi hin slen pet tapay kuɗumu.

Yer-goyta vi sa ma kuturuna

Mat 8:2-4; Mark 1:40-45

12Hay li ma Yesu ay hay hoyok-ziyn mara kepe, sa mara'a tuwam rigasay hiɗi moy-kuturuna, nam wi Yesu. Nam dab vokom gaa'a kay nagata, ka siɗaw Yesu ala: Bum-Sumuna, la naŋ mina, naŋ yeran goy yerge. 13Yesu meɗ ɓalam goyo, jomu di'e: Nan mina, yeraŋ goy yer'. Wulini wulini, moy-kuturun hinimu. 14Bugolda Yesu gatam vunamu kay nam ma di kayni goy mi saɗi. May Yesu dum ala: tuɗaŋu, ɗekaŋ tuwaŋ kir mul-ma-ɗifinna, laŋ ɗifin kay yerta-goyta vaŋu, ki Musus vulay gatta nala, kay kayni ma li di-goyta tisiya. 15May labara valamu joki goy suwa lo, sumuna dakay ŋolo kay huma, kay muɗ goy ŋaa'a kay moyna visiya kaw. 16May Yesu kalay goy hay fulda, musi ɗawni kay siɗawa.

Yer-goyta vi sa ma hurɓulina

Mat 9:1-8; Mark 2:1-12

17Fat tara kep Yesu ka hata. Sa Farisena hiɗi sa wi vun-ma-gatna ay molay gaa'a, nisi may goy hay nagat Galileya, Yudiya hiɗi Yerusalem pa; Bum-Sumuna ka ɗek donota valamu goy hay yerta-goyta vi sa moyna. 18Nisi mar sa ma hurɓulina kep tam Yesu, nisi ka ziyim kay raŋgawna, nisi gar a naram kalafi burum gaa vokomu. 19May hay li ma nisi fi a maram kalafɗi kay sumun hebem ŋolo, nisi jik kulo'o kay yam ziyda, nisi co yam-ziyd goyo, sirim gaa hiɗi va ma buura valam ɗiger jar sumuna hay liyn ma Yesu ka coli hayna. 20Hay li ma Yesu wi vida visiya, nam di'e: Sana, sulukŋa vaŋu cukawa goyo. 21Sa wi-ɗota hiɗi sa Farisena tun caw vara, di kaw ala: Sa ma di yoboy ma ŋulda zawni nam gige? Sa ma as vul gida kay sulukŋa mi Lawna kep ɗisu? 22Yesu wi varta visiya. Nam sli ditiya disiya: Nigi var hay dikgi nala kay mige? 23Bay lop kayn mi ma di ala sulukŋa vaŋ cukawa goyon lebo ma di ala slaŋ va ma buura vaŋu tuɗaŋun su? 24May kay nigi ma wi ala goora vi sana donota valam ka gaa kay nagata kay cuk sulukŋ goyo. Nam di tam sa ma hurɓulina: Nan daŋu fokan kulo'o, slaŋ raŋgawna vaŋu, tuɗaŋ vo'o. 25Wulini wulini nam fokay kulo'o kirsi kafe, sli va ma buura valamu, kalay vo hay ziyna valamu, subur Lawna. 26Nisi kaf muɗ ɦuyum', subur Lawna kaw. Hobay hiɗi narta, nisi di'e: Vaydi iray wi sle ma jafam valamawa.

Yita vi Levi, lawta vi laata

Mat 9:9-17; Mark 2:13-22

27Bugol kayni Yesu kalay goyo, nam ŋaf hiɗi sa ma tar vun-lumuna yum Levi, nam ka musi hay burona vi sa tar vun-lumuna, nam dumu: Tapaŋay kuɗanu. 28Nam hin slen pet, fokay kulo'o, tap kuɗ Yesu. 29Levi li yuldeta ŋolda kalamu hay ziyna valamu. Sa tar vun-lumuna hiɗi segen ŋolo lakay ti'e hiɗi nisiya. 30Sa Farisena hiɗi sa wi-ɗota visiya ŋurnaya, nisi di tam sa hatayna valam ala: Nigi ti'e ci'e hiɗi sa sulukŋa, hiɗi sa tar vun-lumuna kaw kayni kay mige? 31Yesu hot dita: Sa bay-moyna gar doktorɗi, may gar doktor kayni si sa moyn tisina. 32Nan ma kayni kay gar sa ɗigeraɗi, may kay yi sa sulukŋa hay hamda.

33Nisi dumu: Sa hatayna vi Yohana li laat dok-doko, siɗaw lay, sa hatayna vi sa Farisena nala kaw. May sa faŋŋa ti'e ci'e. 34Yesu disiya: Nigi as di boniyom juf cata kay nisi ma li laata hay li ma nam ka jarsi damna su? 35May buur ma ma'a, hay li ma juf-cata ma vumis goy jarsiya, hay na'ta nisi ma li laata.

36Nam di law ma nir-niramna tisi lo ala: San as ka sligar ma wulina kay duɓum vun sligar ma busaynɗi, kay la duɓumawa vunamu, nam ma haw sligar ma wulin goyo, vun-sligar ma wulina fi tap hiɗi ma busaynɗi. 37Sa fi sel vin ma wulina hay tiliy ma busaynɗi, kay la selemawa, vin ma wulina ma co tiliyn goyo, nam kay tuwam ɦok goyo, tiliyn ma ɓulak goyo kaw. 38Kay la linigekaw, vin ma wulina selem ɗawni hay tiliyn ma wulina. 39Kay la sa ci vin ma busaynawa, nam ma dar ma wulina loɗi, kay nam di ɗawn ala vin ma busayna ŋaa suwa.

Currently Selected:

LUKAS 5: Massana

Highlight

Copy