LUKAS 22

Nisi pi lawt kay Yesu, Yudas di newt kay Yesu

Mat 26:1-19; Mark 14:1-16

1Yuldeta vi fun-bay-kufna ta ya' ala Paskata co goboyo. 2Muliyan ŋulo sa-ɗifinna hiɗi sa wi-ɗota gar a nanige nisi ma ci Yesu goyo; kay nisi li nar kay sumuna.

3Satan kal hay Yudas Iskariyot, ma jar sa doogo yam ma'na. 4Yudas kaliya, nam ŋaf hiɗi muliyan ŋulo sa-ɗifinna hiɗi sa ŋulona vi sa gardena kaw, nam ŋra vunam hiɗi nisiya kay yal ma nisi ma vi Yesuna. 5Nisi li firiya, nala nisi ŋra vunsiya kay vulum gurjuta. 6Nam vi lawta visiya, nam tun caw gar liyn ma nam vulsi Yesu goyo bay sumun wi kayni.

Yesu tun dir ɓuraw-funa

Mat 26:17-29; Mark 14:12-25; 1 Kor 11:23-29

7Buura vi fun-bay-kufna, ma nisi ŋat fok-dimi ma paskana coowa. 8Yesu cuk Peter hiɗi Yohana, nam disiya: Tuɗgi kotay ɦu-dimi ma paskana, kay nay ma tumu. 9Nisi dumu: Naŋ min ala numa tuɗ kotaŋ goor ɦu-dimi ma paskana gal arige? 10Nam disiya: Hay li ma nigi coowa hay hoyok-ziyna, nigi ma ŋaf hiɗi sa ma ziy genda niyna kepe, tapgi kuɗumu, tuɗgi hay ziy ma nam ma tuɗ hayna, 11nigi ma di tam bum-ziyna ala: Bum-yalla ka di taŋu: Ziyd ta nam ma ti ɦu-dimi paskana hiɗi sa hatayna valamu ka arige? 12Nam ma ɗekgi kay ziyda ta ŋolda ta kulota, koti kot, nigi ma kot ɦu-dimi paskana hay ziy na'ta. 13Nisi kaliya, nisi fi slen ki nam disi nala, nisi kot goor ɦu-dimi paskana kaw.

14Hay li ma liyn asawa, nam mus ti'e, sa apostolayna hiɗi nam kaw. 15Nam disiya: Dikan min ŋolo kay ti goor ɦu-dimi paskana hiɗi nigiya jew lasta vanu, 16kay nan digiya: Nan ma tum loɗi ta-ta hay li ma vunam ma hoba hay mulda-Lawna. 17Nam sli kaway-ma-cina gi deɓe di'e: Yawgi kayni, ɓurawam jar-tuwgiya. 18Kay nan digiya: Nan ma ci kuɗ vuɗ gulda-guldan loɗi, ta-ta hay li ma mulda-Lawna ma ma'a. 19Bugolda nam sli funa, bugol gi deɓ gina, nam jutum iram goyo, vulsiya di'e: Kayni mi tuwanu, ma vuli goy kigina, ligi kayni kay humgi ma gigi kanu. 20Nala kaw nam sli kaway-ma-cina bugol tina, nam vulsita di'e: kaway-ma-cina kayni mi bonota wulita hay busuwna vanu, ma ɦokay goy kigiya. 21May humgiya, nam ma di newt kanu ka ti hiɗi nan kay table kepe. 22Goora vi sana ma kala, ki kotay kalam nala, may joot kay sa ma di newt kalamna. 23nisi tun caw job tuwsi jar-tuwsi ala sa ma min li van kayni mi gige?

Ma ŋol suwn mi gige?

Yoh 13:2-17; Mat 18:1-4; Mark 10:35-45

24Ci-wayta fok kulo jarsi ala ma ŋolla jarsiya ma lin mi gige? 25Yesu disiya: Muliyana vi jaf-sumuna ti mul kisiya, nisi sa ka hiɗi gaŋeraŋ kay sumuna min ala sumun yisi ala sum sa ŋaana. 26May nigi ma li naɗi. Ma ŋolla jargiya ma muɗ mi ma cawna, ma ŋolla jargiya ma muɗ mi ma sungina kaw. 27Sa ma musi gaa ti'e hiɗi sa ma sunumna ma ŋolla jarsiya mi gige? Mi ma musi gaa tina ɗisu? May nan ka jargiya ki sa ma sungin nala. 28Nigiya, nigi si sa ka so tuwgi hiɗi nanu hay wakka vanu; 29kuɗ na'ta nan vulgi muldawa, ki bunu vulan mulda man nanu nala kaw. 30Kay nigi ma ti'e ci'e kay tablena vanu hay mulda vanu, nigi ma lak hay zlamayn-mulda kaw kay ka kitat kay jaf sa Israyel sa doogo yam ma'na.

31Simon, Simon, humgiya, Satan ka gargiya, kay nam min gasgi goyo ki alkamaren nala. 32May nan siɗaw kaŋu kay vida vaŋu ma vat goyɗi, hay li ma naŋ hotiyawa tanu, naŋ ma vul donot mi ɓosiyoŋŋa hay vida. 33Peter dumu: Bum-Sumuna, nan as kay tuɗ hiɗi naŋu hay daŋgayna, hay mitta kaw. 34Yesu di'e: Peter nan daŋu: Jew a slek-gulokŋ hel kayni, naŋ ma puw vunaŋ kan sem hiɗi ala naŋ wanɗi.

35Nam disi lo: Hay li ma nan cukgi goy bay birimi, bay sakŋa, bay tuguruna kaw, sle mara kiɗa goy kigi su? Nisi hot dita: mayɗi. 36nam hot disiya: Wulin hayɗini, nam ma birimna valam kana, nam ma slum kalamu, sa ma sak ka kalamu nala kaw, sa ma kew-gaferaŋa valam mayɗina, nam ma gus sligara valam goyo, gus kew-gaferaŋ kepe. 37Kay nan digiya: Slen ma ɗoy kanu vunam ma hoba, slen ma ɗoy ala: Nisi ŋaɓam jar sa jiw-zlata.#22:37 Fi kayni hay Es 53:12. sle ma ɗoy kanu yalam gijay goboyo. 38Nisi di'e: Bum-Sumuna, ɗuwaŋu, kew-gaferaŋa ka ma'. Nam disiya: Kayni asawa.

Getsemani

Mat 26:36-46; Mark 14:32-42; Yoh 18:1-2

39Hay li ma nisi cukay goy cukŋa, ki nam ka li dok-dok nala, nam kal kat hiɗiyt Olive. Sa hatayn tap kuɗumu kaw. 40Hay li ma nisi co hay liy namna, nam disiya: siɗawgiya, kay nigi ma cuk hay nemdaɗi. 41Nam rasi bugolomu ir ki sa gi hiɗiyn vokom nata, nam girif gaa'a siɗawa di'e: 42Bunu, la naŋ mina, hinaŋ kaway-ma-cin kayni raw goy kanu, nir na'ta kepe kayni may minda vanɗi, may naŋ ma hin minda vaŋ li'e. 43Sunda-wuralawna vul tuwa'ay kiram kulo wuralawn pa, vulum dono'o. 44Nam co vun narta vi mitta, nam siɗaw dono'o, ɦiɓiyna valamu muɗi tol gaa'a ki busuwna nala.

45Hay li ma nam fokay kulo'o hay siɗawta pa, nam ma tam sa hatayna valamu, nam fisi buri sene, kay yorta vi diksiya. 46Nam disiya: Nigi burgi sene kay mige? Yawgi kulo'o siɗawgiya, kay nigi ma co hay nemdaɗi.

Nisi vi Yesu

Mat 26:47-56; Mark 14:43-50; Yoh 18:3-12

47Hay li ma nam ka law tuwa, sumun ŋolo co'o, nam ma yum Yudas ma jar sa doogo yam ma'na ka kuɗsiya. Nam tuni voksiya, nam ma tam Yesu kay ŋaf vunam hiɗi namu. 48May Yesu di Yudas: Yudas, naŋ di newt kay goora vi sana hiɗi ŋaf-vunda su? 49Hay li ma nisi sa kuɗumna wi va ma lina, nisi di'e: Bum-Sumuna, numa ma cal hiɗi kew-gaferaŋa su? 50Sa kuɗsi kep cal sa ma sunda vi mul-ma-ɗifinna hay humam ta jufta, kaam humam goyo. 51May Yesu sli ditiya di'e: Lakgiya! Bugolda nam jo hum sa namna, muɗum goy ŋaa'a. 52Bugolda Yesu di tam muliyan ŋulo sa-ɗifinna, sa ŋulona vi sa ŋom Tempella hiɗi sa maariyana, nisi sa co vumna, nam disi ala: Nigi cooya ki nigi co gar sa ma coŋcoloŋŋa nala, hiɗi kew-gaferaŋa hiɗi zugulayna kaw. 53Buura kaf nan ay hiɗi nigiya hay Tempella, nigi tun ɓigi tanɗi may. May co kayni mi liyna vigiya hiɗi donota vi jufunda.

Peter puw vunamu. Yesu vok sa ɗiger-lawta

Mat 26:57-75; Mark 14:53-72; Yoh 18:12-27

54Hay li ma nisi vi Yesu, nisi kalam hay ziyna vi mul ŋol ma-ɗifinna. May Peter ka tuɗ ay goy bugolom gine'e. 55Nisi ŋal kuta hay wur-daŋŋa, lak gaa vuna'a. Peter mus jarsiya. 56Goota ta li sunda kepe, hay li ma na' wumu, na' cuk ira' kiramu di'e: San damni kaw ay hiɗi namu. 57May nam puw vunamu di ala: Cata, san kayni nan wumɗi. 58Mus ne' bugolda, sa mara kep wumu, ka dum ala: Naŋ kaw kuɗ sum nisina. May Peter di'e: Sana, may mi nanɗi. 59Ir ki leer kep nala lo bugolda, sa mara ma'a, ka di ala: Gasiya, san damni ay hiɗi namu, kay nam mi sa ma Galileyana. 60May Peter di'e: Sana, va ma naŋ dumna zawni, nan wum cawamɗi. Wulini wulini hay li ma vunam bay vat tuwa, slek-gulokŋ hela. 61Bum-Sumuna muɗ iramu, nam sar Peter. Nala Peter humam gum kay yoboyn ma Bum-Sumuna dum ala: Vaydi jew a slek-gulokŋ hela, naŋ ma puw vunaŋ kanu sem ɦidi. 62Nam kal goy jiya, tiy ŋolo.

63Sum sa vi Yesuna ka burahamu, ka tomu kaw.

64Nisi jun sligar kiramu, jobom ala: Daŋay tige, caŋ zawn gige? 65Nisi di law ma ŋulla mara'a mara'a ŋolo kalamu.

66Hay li ma liyn foowa goyo, sa maariyana vi sumuna hiɗi muliyan ŋulo sa-ɗifinna hiɗi sa wi-ɗota dakaya, nisi kal Yesu vok sa ɗiger-lawta. 67Nisi di'e: La naŋ mi Kristu, naŋ duma'aya. Yesu disiya: La nan digi kaw, nigi ma vi kayn noŋɗi, 68la nan jobgiya, nigi ma hotan ditɗi. 69May wulini pa, goora vi sana ma mus hay gal ɓam ma juf ma gaŋeraŋa vi Lawna. 70Hay na'ta nisi kaf di'e: Naŋu mi goora vi Lawna su? Nam disiya: Nigi di hay liyamu, nanu mi namu. 71Nisi di'e: Nay ma lum hiɗi di-goyta mi meloge? Kay nay kay tuwaya hum dita ta may goy vunamtawa.

Currently Selected:

LUKAS 22: Massana

Highlight

Copy