YOHANA 6

Mu'da vi funa ma ŋol dak-dakŋa

Mat 14:13-21; Mark 6:30-44; Luk 9:10-17

1Bugol kayni Yesu kalay goy gal hena vi niy-lumna vi Galileya ma yum Tiberiyad. 2Tok ŋolla tapay kuɗumu, kay nisi wi ɗekka ma nam lumay kat sa moyna. 3Yesu jik kulo kay hiɗiyta, ɗawni nam musi gaa'a hiɗi sa hatayna valamu. 4May yuldeta vi Paskata vi sa yudiyana ay goboyo. 5Yesu poŋ iram kulo na kayni, nam wi tokŋa vi vok ŋolla ka tuɗay talamu, nam ka di tam Filip: Nay ma gus fun ay arige a sumun kayni ma fi a ti'e? 6May nam di kayni kay wakamu, kay nam wi va ma nam ma lumna. 7Filip hotom dita: La funa ir deniye kis-ma' kaw, as ɓuraw kisi a sa fi ne' ne' kafɗi. 8Sa mara kep jar sa hatayna valamu, Andre, ɓasum Simon Peter dumu: 9Goor ma joriyona ka tani ma fu-orgena ka hay ɓalam vasl, kuluf ma' lay, may kay vok ŋol ma ɦini-ɦinin tani, nam asam kisin mige? 10Yesu di'e: Molgi sumun gaa'a. Hay liy namna usna ay ŋolo. Nisi lakay gaa'a, ŋaɓta visi ir sumun birim vasl. 11Yesu yaw funa, gi bol kalamu, ɓurawam goy tam sa ay molay gaana; nam li nala kaw hiɗi kulufna, ta-ta nisi fi pet ma nisi mina. 12Hay li ma nisi hobawa, nam di tam sa hatayna valamu: Cawam ma ray goyna yawam kulo'o, kay va ma ba goyɗi. 13Wulini nisi yawam kulo'o, nisi hob tikisina doogo yam ma' hiɗi caw fu-orgena, ma ray goy kuɗ sumuna, hay li ma nisi ti tina. 14Vok ɗekka ma Yesu lumna kayni, sumuna di'e: Gasi nam zawni mi jobta-Lawna ma min ma kay nagata. 15Hay li ma Yesu wi ala nisi min tunum mulu, nam puw goyo, kalay lo kulo kay hiɗiyta, nam valam kep.

Yesu tuɗ kulo kay niyna

Mat 14:22-34; Mark 6:45-53

16Hay li ma vulatita coowa, sa hatayna valamu jik gaa ta-ta deŋel niy-lum ŋolla. 17Nisi jik hay lumda kay kal ta-ta kulo gal hena vi niy-lum ŋolla hay Kapernawum. Wulini liyn liy jufunu, may Yesu bay ma tisi tuwa. 18Simeɗ ŋolla biwa, billa li ŋol suw asa. 19Hay li ma nisi gi voksiya ir stade dok-ma' yam vasl lebo dok-ɦidi, nisi wi Yesu ka tuɗay kay niy-lumna; hay li ma nam hebay goboy tam lumda, nisi muɗi nari. 20May Yesu disiya: Kayni mi nanu, ligi narɗi! 21Nisi min jikimay kulo kuɗsiya hay lumda, ɗuw na kayni lumda gaɓ kulo deŋel hay liy ma nisi na hayn cis' may.

Funa vi irita

Yoh 3:14-16; 1 Yoh 5:10-13; 1 Kor 11:23-26

22Hay buurta ka'ta, vokŋa ma hinay goy gal hena vi niy-lumna, ɗuw kayni lumna mara kalays ɗawn paɗi, may lumda kep na kay', nisi may wi Yesu jik kulo haya' hiɗi sa hatayna valamɗi, may nisi kalay visiya. 23May lum hena may Tiberiyad pa goboy hiɗi liyn ma nisi ti fun hayna, bugol Bum-Sumuna gi bol kalam gina. 24Hay li ma sumun wi ala Yesu hiɗi sa hatayna valam kaw say ɗawnɗi, nisi jik hay lumna, kalay Kapernawum kay gar Yesu.

25Nisi fum kulo gal niy-lum ŋolla dumu: Rabbi, naŋ may gal tan kayn lancitige? 26Yesu hot dita: Nan digi gasita, nigi garanu, may kay nigi wi ɗekkaɗi, may kay ta ala nigi ti funa hobay kaw. 27Ligi lop kay tin ma ba goynaɗi, may kay tina ma mus ta-ta kay irita ta vatɗita, nam ma goora vi sana ma vulgiya, kay nam kayni ma Bumna -- Lawna -- tun soona valam kalamna. 28Nisi dumu: Numa ma lum mi mige a li lopna vi Lawna? 29Yesu hot dita: Lopna vi Lawn kayni kay nigi vi hay nam ma nam gumina. 30Ɗekka mige ma naŋ ma li'e kay numa ma wa'a, vi hayaŋ kaw? Naŋ lum mi lop mige? 31Sumayma ti manna hay fulda, ki ɗo'ay nala: Nam vulsi tina ma may wuralawn pana a ti'e.#6:31 Fi kayni hay Kg 16:4, 13-15. 32Yesu disiya: Nan digi gasita, funa ma may wuralawni pana vulgitin mi Mususɗi, may funa ma gasina ma may wuralawni pana vulgit mi Bunu; 33kay funa vi Lawna, nam kayn ma may kulo wuralawni pana, ma vul irita mi sum sa nagatna. 34Nisi di talamu: Bum-Sumuna, naŋ vulma fun kayni dok-doko.

35Yesu disi ala: Nan mi fun ma irina. Nam ma min ma tanu, mayt ma cum loɗi, nam ma vi hayanu, laat ma lum loɗi kaw. 36May nan digiya, nigi wanawa, nir na'ta kep nigi min viɗi. 37Nisi kaf sa Bumna vulanta, nisi ma tanu, nam ma ma katanu, nan ma gum goy noŋɗi; 38Kay nan may kulo wuralawni pa, kay li minda vanɗi, may kay li minda vi nam ma ganina. 39Awa, minda vi nam ma ganin ka kayn ala: Nisi kaf sa nam vulantina, nan ma ba mara kuɗsiɗi, may kay nan ma daysi kulo'o hay buur ma cawna.

40Minda vi Bun kayn ala: San gigekaw ma ɗuw goora, vi hayamu kaw, nam ma fi irita ta vatɗita; nan ma dayam kulo'o hay buur ma cawna kaw.

41Hay na'ta kayni sa Yudiyana ŋurnay kuɗumu, kay nam di'e: Nanu, nan mi funa ma may kulo wuralawni pana. 42Nisi di'e: Nam zawn may mi Yesu di su? Goora vi Yosef ɗi su? Ma bulum hiɗi sulum nay wisi yawn ɗi su? Nam as di ala: Nan jikay kulo wuralawni pa ir nanige? 43Yesu hotsi dita: Nigi may ŋurnay jar-tuwgiɗi. 44Sa as ma katanu bay bumna ma ganina maramayɗi, nan min dayam kulo'o hay buur ma cawna may. 45Ɗota ɗoy hay sa jobta-Lawna ala: Nisi kaf Lawna ma hatsiya.#6:45 ɗuw Es 54:13. Gigekaw ma hum vun Bumnawa, vi hatta valamu kaw ma tanu. 46Sa ma wi Bumna mayɗi, may mi nam ma may vi Lawni pana; namu nam wi Bumniyawa. 47Nan digi gasita, sa ma vi'e nam ma fi irita ta vatɗita. 48Nanu, nan mi funa vi irita. 49Sumaygi ti manna hay fulda, nisi mitiya. 50Tani mi funa ma jikay wuralawni pana, kay gigekaw ma fi tumu, nam ma mitɗi. 51Nanu, nan kayni mi fun ma irina ma may kulo wuralawni pa. La sa ti kuɗ fun kayni, nam ma mus iriya ta-ta hay vatɗita, kay funa ma nan vulum kayni, nam mi sliw-tuwanu kay irita vi sa nagatna.

52Hay na'ta sa yudiyana ci wayt jar-tuwsiya di'e: Nam as vulay sliw-tuwamu a ti'e ir nanige? 53Yesu disiya: Nan digi gasita, la nigi ti sliw-tuwna vi goora vi sanaɗi, ci busuwamɗi kaw, irita may haygi noŋɗi. 54Nam ma ti sliw-tuwanu, can busuwan kaw, nam ma fi irita ta vatɗita, nan ma dayam kulo'o hay buur ma cawna kaw. 55Kay sliw-tuwan kayni mi va ma tina gasi, busuwan kaw mi va ma cina gasi. 56Sa ma ti sliw-tuwanu, ci busuwanu kaw, mus hayanu, nan mus hayamu kaw. 57Ki Bumna ma irina ganiyawa, nan kaw ka iriya hay Bumna, nala kaw sa ma tan tuwan nanu, ma mus iri kuɗan nanu. 58Funa ma jikay wuralawni pana ka tani. Nam may ŋray ki ma sumaygi tumaya, nisi mit kawna naɗi. Sa ma ti fun namna nam ma mus iriya ta-ta hay vatɗita. 59Kayni mi slen ma Yesu dumu hay li ma nam ka hatsi hay sinagogayna, hay Kapernawum.

60Hay li ma nisi hum kayni, ŋolo jar sa hatayna valamu di'e: Yoboyna ma ɗeŋŋa kayni sa ma as kay humum mi gige?

61Yesu wi hay tuwam ala sa hatayna valamu ka ŋurnay jar-tuwsiya kuɗ lawt kayni, nam disi ala: Lawta kayni muɗi kigiya mi va ma dab sem su? 62May la nigi wi goora vi sanawa kal kulo'o hay liy ma nam ay jew pana klasige! 63Vul irita kayni ti Ŋusta. Sliw-tuwna nam mi va ɦawa. Yoboyna ma nan dum tigiya kayni mi Ŋusta hiɗi irita kaw. 64May sara ka jargi yaw, nisi may viyɗi. Kay hay tun cawta pa Yesu wi nisi sa viɗina hiɗi nam ma min di newt kalamna kaw. 65Nam di'e: Kuɗ kayni nan digi ala, sana as ma tanɗi, la Bumna vulum a li nalaɗina.

66Hay liy namna pa, sa hatayna valam segen ŋolo tun caw hot goy bugolsiya, nisi min tuɗ hiɗi nam loɗi. 67Yesu ka law tam sa doogo yam ma'na ala: Nigiya, nigi min tu'ɗi may su? 68Simon Peter hot dit talamu di'e: Bum-Sumuna, numa ma tuɗ tam gige? Yoboyna vi irita ta vatɗita ka kaŋu. 69Numa vi'e, wi kaw ala naŋ mi Kristu, ma Peldetna vi Lawna. 70Yesu hotsi dita: Nigi sa doogo yam ma'na, vilekgi goy mi nanɗi su? May kep jargiya mi Matna! 71Nam law kayn kay Yudas goora vi Simon Iskariyot, kay nam mi sa ma min di newt kalamna, nam kep jar sa doogo yam ma'na.

Currently Selected:

YOHANA 6: Massana

Highlight

Copy