YOHANA 15

Gu gulda-guldana hiɗi ɓalamu

1Nanu, nan mi gu gulda-gulda ma gasina, Bunu mi Bum sine gulda-guldana. 2Ɓam guna pet ma ka hay nanu, ma may vuɗ vuɗ-gunaɗi, nam kaam goyo, ɓam-guna kaf ma vuɗ vuɗ-guna, nam sletem tuwamu kay nam fi vuɗ vuɗ-guna suwa. 3Wulini nigi ka pasiyaki kay yoboyna ma nan kusum tigiya. 4Lakgi hay nanu, ki nan ka hay nigi nala. Ki ɓam guna fi vuɗ vuɗ-guna kay tuwam ɗeŋɗi, la nam may tapay tam gunɗi. Nala nigi kaw, la nigi lak hayanɗi, nigi as li vaɗi. 5Nanu, nan mi gu gulda-guldana; nigiya mi ɓam-guna. Sa ma mus hay nanu, ki nan hay namu nala kaw, nam vuɗ vuɗ-gun ŋolo, kay bay nanu, nigi as li va noŋ ne'ɗi. 6La sa mus hay nanɗi, ma gumis goyo ki ɓam-guna nala, nam ma so goyo kaw; bugolda sumun tokomu, cukum hay kuta, nam ŋal goyo kaw. 7La nigi lak hay nanu, yoboyna van mus haygiya kaw, jobgi va mige kaf ma nigi mina, van namna ma vulis tigiya kaw. 8Bunu fi gajijita kuɗ slen kayni, a nigi ma vuɗ vuɗ-gun ŋolo, nala nigi ma muɗ goy sa hatayna vanu. 9ki Bumna minanawa, nan mingiyawa kaw. Lakgi hay minda vanu. 10La nigi ŋom vun-ma-gatna vanu, nigi ma lak hay minda vanu, ki nan ŋom vun-ma-gatna vi Bunawa, musawa hay minda valamu kaw nala.

11Slen kayni nan dumawa tigiya, kay firita vanu ma mus haygiya, kay firita vigiya ma hob kulo'o kaw. 12Kayni mi vun-ma-gatna vanu: Mingi jar-tuwgiya tuwgiya, ki nan mingiyawa nala. 13Minda ta ŋol suw minda ta san vul irita valam goy kay ɓosiyomna kayni tayɗi. 14Nigi si ɓosiyonna, la nigi li slen ma nan gatgi kalamna. 15Nan yigi ala sa gorvona loɗi, kay gorvona wi va ma mulamna lumnaɗi. Nan yigiyawa ala boniyonna, kay slen kaf ma nan humumay vun Bun pana, nan dumawa goy tigiya. 16Nigi may vilekan nan goyɗi, may nanu, nan vilekgi goyo, tungiyawa kaw, kay nigi ma tuɗ goyo, kay nigi ma vuɗ vuɗ-guna, kay vuɗna vigiya ma mus ta-ta, a va mige kaw ma nigi jobom tam Bumna hay semda vanu, nam ma vulgita. 17Va ma nan gatgi kalamna kayni, kay nigi ma min tuwgiya jar-tuwgiya.

Sa nagatna ka gaw kat Yesu hiɗi sa hatayna valamu

18La sa nagatna ka gawt kigiya, wigi goy ala nisi ka gawt kan nan jewgi nigiya. 19Lali nigi ay vi nagata, nagat ma minim ɗawni mi va ma ay ir va'na; may wulin nigi may vi nagat loɗi, kay nan vilekgi goy jar sa nagatna pa, kuɗ kayni sa nagatna ka gaw kigiya. 20Humgi ma gigi kay yoboyna ma nan dum tigiya: Gorvona nam ŋol suw mulamnaɗi. La nisi lan lasi, nisi ma ligi lasi kaw; la nisi ŋom yoboyna vanu, nisi ma ŋom yoboyna vigi kaw. 21May slen kayni kaf nisi ma lum tigiya kuɗ semda vanu, kay nisi may wi nam ma ganinaɗi. 22La nan ma miy tisiɗi, la nan disi diyɗi, sulukŋa visi mayɗi. May wulin kayni nisi as ɗob sem-lawta kay sulukŋa visiɗi. 23Sa ma ka gaw kanu, nam ka gaw kay Bunu kaw. 24Lopna ma sa mara lum tuwaɗin kayni, la nan lum liy jarsiɗi, sulukŋa visi mayɗi. Wulini nisi wumawa, may nisi ka gawt kanu, kay Bunu kaw. 25May kayni li'e kay yoboyna ma ɗoy hay gatta vunam hob kulo'o, ma ala: Nigi ka gawt kanu bay lawta.#15:25 Fi dit kayni hay Nul 35:19.

26Sa ma ɗob-lawta, ma nan ma gumi tigi tam Bumni pana, Ŋusta vi gasita ta may vi Bumni pa, hay li ma na' maawa tigiya, na' ma li di-goyta kanu, 27nigi kaw, nigi ma li di-goyta, kay nigi ka hiɗi nanu hay tun cawt pa.

Currently Selected:

YOHANA 15: Massana

Highlight

Copy