HABAKUK 3
3
Nulla
1Siɗawta vi Habakuk ta ŋray ki tiyta ta yor-tuwta nala.
2Ma-Vatɗina, nan hum va ma naŋ dumnawa,
tuwan li nari,
hay li ma nan ka vok lopna vaŋu,
ma naŋ lumu jar busat ŋolo.
Lop namna ma ki kayn nala
naŋ ma ɗekem goyo hay irita vuma'a kaw.
La naŋ ka muɗi ɦiya kaw,
humaŋ ma gaŋ kay slugota vaŋu.
3Lawna may goy hay Teman pa,
Ma Peldetna may goy hay hiɗiyta Paran pa.
Gi-suk!
Gajijita valamu ŋuy dukalawn kafe,
suburta valamu hob yam nagata.
4Tuwam wile'e ki slen ma vul haraŋa nala,
haraŋa kalay goy hay ɓalam pa,
kayni ti donota valamu ta ŋayayta.
5Moy ma mot sumuna ka tuɗ vokomu,
ma gaŋ tuwaŋ kuna ka tuɗ baŋalamu.
6Nam col kulo'o li ŋaɓta vi nagata,
hay li ma nam cuk iram gaa kay jaf-sumuna,
nisi kaf jiriya.
Hiɗiyn ma ay ɓa-ɓana yak goyo,
liyn ma boŋoloŋŋa ma ay din-dinna ɦas gaa'a,
hagan ma jew ɓa-ɓan kaw mal goy vokomu.
7Nan wi guɗukŋa vi Kusan vatay goy ɦawa'a,
ziyna vi sum sa Madiyan ka hay narta-ŋolda.
8Ma-Vatɗina naŋ muɗi ɦiy kayn kat goloŋŋa su?
Naŋ muɗi ɦiy ŋol kayn kat niy-lumna su?
ɦiyda vaŋ ta ŋolda ka mer goy nala,
kayn kat niy-lum ma ŋolla su?
Hay ɦiyda vaŋu naŋ ɓeyawa kay kulumna vaŋu,
hiɗi keke-ma-duura vaŋu ma kolda su?
9Naŋ sli diŋ-diŋ barawta vaŋawa goyo,
ɓarawta vaŋu mi yoboyn ma naŋ dum dina. Gi-suk.
Naŋ mun nagat goyo, muɗa niy-lumu.
10Hay li ma hiɗiyn waŋu, nam tun caw wira,
niy ma riŋ goyna as capa,
zul ma wiŋŋa di delem kulo'o,
nam sli ɓalam kulo'o.
11Fatta hiɗi tilla lak ŋal kiliŋ'
hay li ma nam wi wileta vi haraŋa vaŋ vul tuwam goyo,
12hay ɦiyda vaŋu naŋ ŋuy yam nagat kafe,
hay ɦiyda vaŋ ta ŋolda naŋ tay jaf-sumun gaa'a.
13Naŋ kaliyawa goy jiya kay suɗ sumuna vaŋu,
kay suɗ ma faŋŋa ma mul ɦoki kalamna.
Sa joona naŋ kus yam-ziyna visi goyo,
tom goyo ta-ta hay selem ma tuni gaana. Gi-suk.
14Naŋ weɗ muliyana visi kisiya,
hiɗi ɓarawta visi kay tuwsiya,
kayni hay li ma tuwsi koti kot,
kay nisi min co meran goyo ki ɦiwliŋŋa nala,
kayni hay li ma nisi ka ciriy ŋolo hiɗi firita,
ki nisi ka vurum sa ma hawna,
hay ziy-cuŋguɗina valam nala.
15Hiɗi kulumayna vaŋu,
naŋ as ɦaw niy-lumna ma ŋolla kulo'o;
la jar niy-lumna ŋolla ma zulla kaw.
16Nan humiya, dikan ɓiranu kaw,
hay li ma nan huma,
vunan muɗ vi bat-bat',
zokan tun caw ɓasanu,
gayan tun caw vi law-law'.
Nan mus ŋal kiliŋ,
kay cub buur ma lawt ma cona,
buur ma sa ma las sumuna ma co lassiya.
17Kay gu-gumna ma ɓo loɗi,
gu gulda-guldana ma vuɗ loɗi,
vuɗna vi gu-olivena sa muɗ fum loɗi;
wan as li hay sine loɗi;
fok-dimina ma vat goyo!
Muɗ ɗawni luway may hay ciŋan loɗi.
18May hiɗi kayni kaf,
nan min li firi hay Ma-Vatɗina,
nan min li firiya hay Lawn ma suɗanna.
19Lawn Ma-Vatɗina mi donota vanu.
Nam muɗan sen koloyo ki dukga nala.
Nam poyan kulo'o hay liyn ma ɗiŋiriŋŋa.
Tam ma ŋolla vi sa gi nulla.
Hiɗi dil ma zigewn juni kuɗumna.
Currently Selected:
HABAKUK 3: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
