CAWA'TA TUNITA 50

Pita vi Yakub hay nagat Kanaan

1Yosef gi tuwam gaa kay bulumu, nam tiya, ŋaf vunam gaa kalamu. 2Nam vul hagat tam doktorayna sa sunumna kay nisi ma setem hiɗi mul ma nam as buwɗina. 3Nisi kotom tuwam ir buur dok-fiɗi, nisi setem mul namna talamu. Sum sa Egipten tiyim ir buur dok-siɗiya.

4Hay li ma buur ma tiyn vatawa, Yosef di tam sum sa hay ziyna vi Farawn ala: La nan fi slugotawa vok irgiya ni, nan siɗawgiya kay nigi ma tuɗ di lawt kayni mi Farawn: 5Bun dan ala: Wulin kayn nam mit ɗawn mitiya, nala nan ma tuɗ pum hay zulda ta nam gusa' hay nagat Kanaanta, nan yi va kan vokomu. Kuɗ kayni nan min tuɗa kay pumu, nan ma hotiya may. 6Farawn hot dita: Tuɗaŋ paŋ buŋu, ki naŋ yi va kaŋ vokom nala.

7Yosef kalay ɗawni, kay pi bulumu. Sunda sa hay ziyna vi Farawn pat kuɗum noŋ kafe, sa maariyana hay ziyna valam noŋ kafe, sa maariyana hay nagat Egipte noŋ kaf kaw. 8Sum sa hay ziyna vi Yosef noŋ kafe, guro-biyomna hiɗi sa hay ziyna vi bulumu. Hay nagat Gosen hin vo kayn si gurosgurayna, fukunayna hiɗi luwayna tuta. 9Keke ma duura hiɗi sa ɓe kay kulumayna ka tapay kuɗ Yosef ŋolo. 10Hay li ma nisi co hay muɗakŋa vi Atad, ma goy bugol niy-lumna Yordan, nisi mun tiyn giti-giti, nisi tiy tiyn ma yorta ŋolo, Yosef ti do'ol bulum ir buur siɗiya. 11Sum sa Kanaaniyana sa sumay nagata, wi tiy namna ma hay muɗakŋa vi Atadna hiɗi irsiya, nisi di'e: Kayn mi tiy ma ŋolo jar sum sa Egiptena. Kuɗ kayni muɗak namna nisi tunum selem ala Abel-Misrayim, nam ka goy bugol niy-lumna Yordan. 12Ki kayn nala gurona vi Yakub vi vun busiya. 13Nisi tuɗum hay nagat Kanaan. Nisi pum hay zul-hiɗiyna vi sinen ma hay Makpela, ma Abraham gusum hay ɓam Efron ma Hetiyena, kay pi sumuna valam haya, nam ka ɗiger vok Mamre. 14Hay li ma Yosef pi bulum pina, nam hot hay Egipte, hiɗi guro-biyomna hiɗi sumun kaf sa tap kuɗumu kay pi bulumna.

15Hay li ma guro-biyom Yosefna wi ala busi mitawa, nisi di'e: Yosef ka gaw hiɗi nay klasige, nam min hot joo ta nay la' talamta klasige. 16Nisi gi sunda tam Yosef kay dum ala: Jew a buŋ mita, nam hin ditis ala: 17Numa ma daŋ ala: Naŋ ma vul gida kay jiw-zlata hiɗi sulukŋa vi guro-biyoŋŋa, kay nisi lum taŋ kayn mi law ma joona. Wulin kayni naŋ ma vul gida mi sa sunda vi Lawna vi buŋ lakŋi. Hay li ma Yosef hum lawt kayni, nam tiya. 18Guro-biyomna kay tuwsiya co'o dab voksi gaa vokomu, nisi di'e: Numa si gorvona vaŋu. 19Yosef disiya: Ligi nar noŋ ne'ɗi. Nan vurnay baŋal Lawn su? 20Nigi vari hay dikgi kay lan joo'o, may joo na'ta Lawn muɗa' goy ŋaata, kay suɗ jaf-sumun ŋolo goyo ki nigi ka wi wulin kayn nala.

21Nigi ma li nar noŋ ne'ɗi, nan ma ŋomgiya, nigi hiɗi gurona vigi noŋ kafe. Nam teŋsi irsiya, disi law ma hay dikamna goy kafe.

Mitta vi Yosef

22Yosef ka musi hay Egipte, nam hiɗi ziyna vi bulum noŋ kafe. Nam li busat kis hiɗi diram doogo. 23Yosef wi gurona vi Efrayim ta-ta tam jaf ma ɦidina. Gurona vi Makir, gurona vi Manase kaw vuɗ kayn wulsi mi namu. 24Yosef di tam guro-biyomna. Wulin kayn mitta vanawa. May Lawn humam ma gum kigiya, nam ma yawgi goy hay nayat tani kay hotgi hay nagata ta nam yi va kalamu kay vula' mi Abraham, Isaak hiɗi Yakub. 25Yosef di gurona vi Israyel ala: Lawn humam ma gum kigiya. May nigi ma yi va kigi ala nigi ma yawan zokan kigiya.

26Yosef mita. Busata valam coy kis hiɗi dira' doogo. Nisi set mul ma buwɗin talamu, nisi cum hay kesna, hay nagat Egipte.

Currently Selected:

CAWA'TA TUNITA 50: Massana

Highlight

Copy