CAWA'TA TUNITA 40

1Bugol slen kayni, sa ma kot dolayn mi mulla hiɗi sa ma kot tin mi mulla li va ma joo'o kat sa ma ŋolla visiya, mulla vi Egipte. 2Farawn muɗ ɦiy ŋolo kat sa ŋulon ma' lakŋi, ma ŋolla vi sa kotom dolayna hiɗi ma ŋolla vi sa kotom tina. 3Nam cuksi kalaf hay ziyna vi ma ŋolla vi sa ŋom daŋgayna, hay ziyn ma daŋgayna ma Yosef ka ti daŋgayn hayamna. 4Ma ŋolla vi sa ŋom daŋgayna vulsi hay ɓam Yosef, Yosef ka sunsiya. Nisi lakay hay daŋgayna ir liyn neeɗa.

5Hay henjet kepe, sa ma kot dolayna vi mulla hiɗi ma kot tina vi mulla sa ay duki hay daŋgayna, duwayt disi vun tuwsi kafe, gigekaw min hum caw falamta goy kay tuwamu. 6Yosef co katsiya hay graw culumta, nam ɗuwsi kayni, voksi turkusiya. 7Nala sa ŋulona vi mulamna sa ka hiɗi nam hay daŋgayna nam jobsi ala: Vaydi nigi ka hiɗi vokgi turkusiya kay mige? 8Nisi hotom dita: Duwayt duma'a, may sa ma duma'ta cawam goy mayɗi. Yosef disiya: Ma da' dira' goyna mi Lawn kepɗi su? Nigi dan duway na'ta ay tige.

9Ma ŋolla vi sa vul dolayn mi mulla di caw duwayta valam mi Yosef. Nam ka di'e: Duwayt dan kayn ala nan wi gu gulda-guldan goy vokan zaw. 10Gu gulda-gulda namna ɓalam ɓetay goy ɦidi. Hay li ma nam wulawa, nam ɓo'o, vuɗna valam niy goyo. 11Tasata vi Farawn ay hay ɓanu. Nan yaw vuɗna vi gulda-guldana, nan keslem hay tasata vi Farawn, nan vul tasat na'ta hay ɓam Farawn. 12Yosef dumu: Caw duwayt na'ta kayni: Ɓam gulda-gulda ma ɦidin kayni mi buur ma ɦidina. 13Hini buur ɦidi, Farawn ma slaŋ kulo'o, ma hot musaŋ hay lopna vaŋu; naŋ ma hot vul tasata hay ɓam Farawn lo, ki naŋ ka li jewe hay li ma naŋ ay li lop ma kot dolayna nala. 14May hay li ma naŋ hotawa hay sle'tana, humaŋ ma gaŋ kan gi ge. Nan siɗawaŋu kay naŋ ma di law ma ŋaan kanu, naŋ ma di yoboy ma ŋaan kanu vok Farawn, naŋ ma kalanis goy hay ziyd zawn kalge. 15Kay nanu, nisi kulani kayn goy hay nagata vi sa Hebren pa, tan kaw nam may li va ma joo'o ma nan as ti daŋgay kalamɗi.

16Ma ŋolla vi sa kot funa wi ala Yosef di caw duwayt goy hay liya'a, nam di'e: Nan kaw, duwayt dan ala: Zlarakŋ hiɗi ka lakay kulo kan lak', hiɗi fu ma haɓna hayamu. 17Hay zlarakŋ ma kulo fiyok suwna, tin ma koti mi Farawn ka hayam kuɗ jafam pete, ɗiliy hay kuta; layayn ka tum kulo kan hay zlarakŋa. 18Yosef hot dita di'e: Caw duway na'ta kayni: Zlarakŋ ma ɦidin kayn mi buur ma hini ɦidina. 19Hini buur hiɗi, mulla Farawn ma kaŋ yaŋ goyo, ma ɓalaŋ kulo kat guna, layayn ma taŋ sliwaŋu may.

20Co hay buurta ɦidita, hay buurta vi vu'da vi Farawn kayni, nam li yuldeta kay sa sunda valam kafe, ma ŋolla vi sa kot dolayna hiɗi ma ŋolla vi sa kot funa, nam slisi yisi kulo'o jar sa sunda valam kafe. 21Ma ŋolla vi sa kot dolayna nam hot tunum hay lopna valamu, kay nam ma tun tasata gaa vok Farawn lo. 22May ma ŋolla vi sa kot funa nam ɓalam kulo kat guna, ki Yosef di caw duwayt goy nala. 23Ma ŋolla vi sa kot dolayna min var kay Yosef loɗi, yalam jok Yosef goyo.

Currently Selected:

CAWA'TA TUNITA 40: Massana

Highlight

Copy