CAWA'TA TUNITA 38

Yuda hiɗi Tamar

1Hay li namna kayni, Yuda ja jaram goy hiɗi guro-biyomna, kal goy tam sa ma hay Adullam yum Hira. 2Ɗawni Yuda wi goota vi sa ma Kanaaniyana yum Suwa, nam sla' ca'a, nam bur ta'a. 3Na' sli haya, vuɗ goor kep, na' tunum selem ala Er. 4Na' vi hay mara lo', na' vuɗ goor mara'a, tunum selem ala Onan. 5Na' vuɗ goor mara lo, na' tunum selem ala Sela; hay li ma na' vuɗumna, Yuda ay goy hay Kezib.

6Yuda sli cat mi goor malam ma ŋolla ma yum Er, cat na'ta ya' ala Tamar. 7Er goora vi Yuda ma ŋolla nam kir Ma-Vatɗin suluku, nala Ma-Vatɗin cum goy mati. 8Nala Yuda di tam Onan: Tuɗaŋ buraŋ kat cata vi basuŋŋa, naŋ ma musa'a, vuɗaŋ jaf hay sem ɓasuŋŋa. 9Hay li ma Onan wi ala jaf ma vuɗ'n ɗawni may hay selem namɗi, hay li ma nam ka bur tam cata vi ɓasulumna, nam hin tuwam day goy gaa butuwu, kay nam min ala goor ma vuɗ hay baŋal ɓasulumnaɗi. 10Va ma nam lum ki kayn nana firi Ma-Vatɗinɗi, nala Ma-Vatɗin cum goy mati. 11Nala Yuda di tam kunomta Tamar: Musag duhulu hay ziyna vi bugu, ta-ta goora van Sela muɗ ŋol tuwa. Nam di nala kayni kay tuwam ka li nari ala Sela ɗawn ma mit ki ɓosiyomna nala klasige. Tamar kaliya, na' mus hay ziyna vi bu'a.

12Buur kalay ŋolo, cata vi Yuda, goota vi Suwa mitawa. Hay li ma tiyna va' vatawa, Yuda hiɗi banamna Hira ma Adullamna kalay hay Timna kuɗ sum sa ka ɗuŋus fok-dimina valam goyna. 13Nisi co di Tamar ala: Humagu, kunogŋa ka co kulo hay Timna kay ka ɗuŋus fok-dimina valam goyo. 14Na' fok sligara va' ma duhulla goy ta'a, na' bar sligar ta'a, ŋay tuwa'a, na' mus goy vun hagata ta hay Enayim, hay hagata vi Timna. Kay na' wi ala Sela muɗi ŋolo, may nisi may vula' ca malamɗi.

15Hay li ma Yuda wa'a, nam var ala na' ti cata gawlaŋga, kay ya' ay baraya. 16Nam co ta'a hay hagata ka di ta'a: Hinan bur tagu. Kay nam may wi ala na' ti kunomtaɗi. Na' dumu: Naŋ bur tan ɗawni, naŋ wurakanti mi mige? 17Nam di ta'a: Nan ma jokag goor ɦu-meena ay kepe jar farayna vanu. Na' dumu: Naŋ as deŋan va mara'a jew a naŋ jokomay su? 18Nam di ta'a: Nan as deŋakgi ɗawn mi mige? Na' di'e: Naŋ ma vulan tuju ta keleŋga hiɗi jaɓ ma kuɗa'na hiɗi zugul ma ka hay ɓaŋ kayni. Nam vula'ta. Nam bur ta'a, na' cap vi haya. 19Na' fokay kulo'o kaliya; sligar ma baray ta'na na' fokom goyo, hot cuk sligara va' ma duhulla.

20Yuda jok goor hu-meen ay hay ɓam banamna ma Adullamna a nam naram mi cata kay yawam slena valam ma nam deŋa'tinay goyo. May nam fi catɗi. 21Nam job sum sa hay liy namna ala: Cata ta gawlaŋga ta ka coli hay hagata vi Enayimta ka wulin arige? Nisi di'e: Gawlaŋ may co tan sem kep noŋɗi. 22Nam hot tam Yuda dumu: nan may fa' noŋɗi. Sum sa hay nagat kaw di ala gawlaŋ tay hoyok-ziyna visi noŋɗi. 23Yuda di'e: Hina' ŋom sle namna, muɗay tuway a sumun panayɗi. Kay nan gaŋ hiɗi goor ɦu-meena, may naŋ fa'ɗin tuta.

24Til ɦidi bugolda, sumun co di Yuda ala: Kunoŋga Tamar li tuwa'awa goy gawlaŋi, ɗuwaŋu, kuɗ tuwa' ma na' lum gawlaŋŋa wulini na' viy haya. Yuda di'e: Vigit goy jiya, ŋalgit goyo.

25Hay li ma nisi va'a kay ŋala' goy kayni: na' ka di tam kuno'na ala: Van hay mi mul slen yawni; nan siɗawaŋu, naŋ ma ɗuwum tige, tujuta hiɗi zigew ma kuɗa'na hiɗi zugul kayni mulamna mi gige? 26Yuda wumu, nam di'e: Nan joo'o suwa' na'a, kay nan min vula' mi goora van Selaɗi. Nam min bur ta' mara loɗi.

27Hay li ma liyna vi pukka va' coowa, ɗuw na kayn guro-ŋonayn ka kalaf haya' ma'. 28Hay li ma na' ka puka, hena kal ɓalam ay goy jewe; cata ta puk boyn vum ɓalamu, junum zigew ma slawn ɓalamu, na' di'e: Kayn kalay goy jewna. 29May nan hot ɓalam kulo'o. Ɓasulum hena kalay goy jewemu. Cat ta puk boyn di'e: Naŋ hawami baŋa marige? na' tunum selem ala Peres, min di'e: Haw baŋana. 30Bugolda ɓasulumna ma nisi jun zigew ma slawn hay ɓalamna kalay goyo. Nisi tunum selem ala Zerak.

Currently Selected:

CAWA'TA TUNITA 38: Massana

Highlight

Copy