CAWA'TA TUNITA 37

LABARA VI YAKUB HIƊI JAFNA VALAMU

Bosiyom Yosefna gusum goyo

1Yakub li ziy hay Kanaan, kayni ti nagata ta bulum ays musi haya'ta. 2Kayni mi jafna vi Yakub. Hay li ma busata vi Yosef co doogo yam siɗiya, nam ka ŋom farayna hiɗi guro-biyomna; nam ka kuɗ tuwsi hiɗi gurona vi Zilpa hiɗi gurona vi Bilha, boyna vi bulumu. Law ma nisi dum joona nam ka tuɗ dum mi bulumu. 3Israyel min Yosef suw gurona valam segen kaf, kay nam vuɗum kayni hay maarta valamu; nam kotom sligara ma tuwam jaray ŋolo. 4Guro-biyom segena vi ala bulum minim suwsi nisi kafe, nala nisi kaam gawi, min ka kasla ma ŋaa'a hiɗi nam loɗi.

5Yosef duwayt dumu, nam da' goy mi guro-biyonna, nala nisi kaam gaw suwa.

6Nam ka disi ala humgi duwayt ta dumta natige: 7Nay ka goy sine'e kay jun alkamarena, ɗuw ma kayni, ma nan junumna col kulo'o, figi nigin ŋuyumu, girif gaa vokomu. 8Guro-biyomna dumu: Naŋ ma ti mul kuma'a su? Lebo naŋ ma muɗ ma ŋolla vuma'a su? Nala nisi kaam gaw ŋol suwa kuɗ duwayta ta dumta hiɗi law ma nam ka dumna.

9Duwayt tara'a dum lo, nam da' goy mi guro-biyomna. Nam ka disi ala duwayt tara danawa lo: Nan wi fatta hiɗi tilla hiɗi mislekŋa doogo yam kep ka girif gaa vokanu. 10Nam da' goy mi bulumu hiɗi guro-biyomna. Bulum lawam ɦiya, ka dum ala duwayt na'ta ta daŋga cawa' min ɗek mige? Naŋ min ala nan hiɗi suŋu hiɗi guro-biyoŋŋa numa nays girif gaa vokaŋ su? 11Guro-biyomna tun caw lum hunoyo, may bulumu yalam may jok kay lawt kaynɗi.

12Guro-biyom Yosefna kal goy hay Sikem, kay ŋom farayna vi busiya. 13Israyel di tam Yosef: Guro-biyoŋŋa ka goy Sikem ŋom farayna ɗisu? Naŋaya, nan min gaŋ kuɗsiya. Nam hot dit ala nan humiya. 14Israyel di tam Yosef: Nan siɗawaŋu: tuɗaŋ saray guro-biyoŋŋa tige: La nisi ka ŋaa'a, Farayn kaw ka malam ŋaa'a ni, naŋ ma hotan labariya. Nam gum kayn hay liyn ma lokŋa vi Hebron; Yosef kal hay Sikem.

15San fum goy hay sinen gar kila'. San ka jobom ala naŋ garam mige? 16Yosef hot dita: Nan gar guro-biyonna. Nan siɗawaŋu naŋ dan kay liy ma nisi ka ŋom farayn hayamna tige. 17San ka dum ala nisi say tan loɗi, kay nan humsi law lak' ala tuɗay hay Dotan. Yosef kalay kuɗsiya, nam fisi hay Dotan.

18Nisi wumi goy gine'e pa Jew a nam co tisi goboy kayni, nisi ŋra vunsiya kay cum goy mati, 19nisi ka di jar-tuwsi ala: Bum duwayt ɗaw tuɗayni. 20Wulin kayn nigiyaya, caygit goyo, gaygit hay kaar lakŋi; nay ma di ala muur ma siy mutumawa, la duwayta valam muɗ muɗtige kaw nay ma wi'e. 21Ruben hum labar namna, nam hulotom goy hay ɓisiya. Nam disiya, nay ma cum goy matɗi. 22Ruben disiya, ɦokgi busuw goyɗi, nigi ma gum hay kaata ta hay fulda zawni; tungi ɓigi talamɗi. Nam ka gar kay butum goy hay ɓisiya, kay hotom tam bulumu.

23Hay li ma Yosef co tam guro-biyomna, nisi fokom sligara valam ma talamni goyo, sligar namna ma cuki talamna tuwam ɗoy ŋolo. 24Nisi vumu, gum hay kaata, kaat na'ta goy soya, kay niy may haya'ɗi.

25Bugolda nisi lakay gaa'a yam tuwsiya kay ti'e. Nisi cuk irsi goy na kayni, irsi wi sum sa Ismayella ka tuɗay hiɗi lamgan zaw. Nisi may goy hay Galaad pa; lamgana visi ay hobay hiɗi urdi ma hisna ma yum aromatna; ma kor-tuwna#37:25 urdi ma kor-tuwna kayni mi urdi ma nisi kor tuw sum sa mitin hiɗi namu kay nisi ma buwɗi. hiɗi ma yum mirr, nisi ka naram hay Egipte. 26Yuda di tam guro-biyomna: Nay ci goor-buyn goyo, ŋayam busuwam gaa kaw kayn nay fum kuɗum mi mige? 27Nigiyaya, gusaygit goy hay ɓam sum sa Ismayella, caygit goyɗi, kay nam mi goor-buyna, nam mi sliway naya. Guro-biyomna hum lawta valamu. 28Hay li ma sa li filiwna sa Madiyanna ka capa, nisi sli Yosef ay goy hay kaata, nisi gus Yosef goy hay ɓam sa Ismayella ir gurjuta sikel dok-ma', sum nisina kalam hay Egipte.

29Ruben hotay vun-kaata; nam ɗuw na kayni Yosef may hay kaata loɗi. Nam jet sligara valam goyo, 30nam hot tam guro-biyomna ka di'e: Goor may loɗi, nanu nan ma li linige? 31Nisi yaw sligar-tuwna vi Yosef, nisi ci ɦuna, cuk sligar hay busuwna. 32Sligara ma tuwam ɗoy dak-dakŋa nisi jokom mi busiya, kay di busi ala; sligar cani numa fumiya, saraŋgi tige, nam mi sligara vi goora vaŋ lebo namɗi su? 33hay li ma Yakub wi sligar namna, nam di'e: Hih! yawn mi sligara vi goora vanu, muur ma siy mutumawa, Yosef jetay goy kay muura. 34Nam jet sligara valam goyo, jun sligar-bolla furamu, tun sligar hayamu, nam ti do'ol goora valam ir buur ŋolo. 35Guro malam sa jufayna hiɗi sa boyna kaf co'o kay teŋem iramu; may nam min vi teŋ-irta noŋɗi. Nan di'e: Nan min mit gaa kuɗ goora van hiɗi do'olla. Nam ka ti do'ol goora valamu.

36Sum sa Madiyanna gus Yosef goy hay Egipte hay ɓam Potifar ma ŋolla vi sojena sa ŋom mulla Farawn.

Currently Selected:

CAWA'TA TUNITA 37: Massana

Highlight

Copy