CAWA'TA TUNITA 31
31
Kalta vi Yakub hay Kanaan
1Yakub hum dita ta gurona vi Laban ka da' ala: Yakub yaw slena vi buyawa kafe, wulini nam muɗi faray ŋol kayn hiɗi slena vi buya. 2Yakub ɗuw Laban kayni, dik Laban may buti goy talam ki jew nala loɗi. 3Bugol kayni Ma-Vatɗina di tam Yakub, wulin kayni hotaŋ hay nagata vi sumiyaŋu, hay nagata ta naŋ vuɗi haya' pata, nan ka hiɗi naŋu. 4Yakub yi Rakel hiɗi Leya aya, kay nisi ka goy kuɗ farayna. Valam hay sinena. 5Nam di tisiya: Bugi nan ɗuwum kayni, dikam may buti goy tan ki jew nala loɗi; may Lawna vi bunu nam ka hiɗi nanu. 6Nigi kay tuwgi kaw wi ala bugiya nan sunum kayn hiɗi donota van noŋ kafe. 7May bugi ɗuwan ki va ma liw nala, wurakŋa vanu nam muɗum muɗ muɗ sem doogo. May Lawn may malam hagat kay nam lan va ma jooɗi. 8Hay li ma nam di ala fokŋ ma jarayna nam vanu, fokŋ kaf vuɗ gurona valam kayn jaraya, hay li ma nam di ala, fok ma tuwam zlubara nam vanu, fokŋ kaf vuɗ gurona valam kayn tuwam zlubari. 9Lawn yaw farayna vi bugiya, nam vulanta.
10Hay li ma fokŋ ka fila, nan poŋ iran kulo kayni, duwayt dan ala fok-gamalana ma ka fil ma boyn kayni tuwam jaraya tuwam zlubari lebo sergeɗe. 11Nala sunda-wuralawna di tan hay duwayt ala: Yakub, nan hot dit ala nanis zawni. 12Nam di tanu: Poŋaŋ iraŋ kulo'o ɗuwaŋu: fok-gamalana ma ka fil fok-meen kaf kayni nam jaraya, zlubari hiɗi sergeɗe, kay slen kaf ma Laban ka li taŋu nan wumawa. 13Nanu mi Lawna vi Betel, liyn ma naŋ ɦok mul kay liyn ma ɗiŋiriŋŋa, liyn ma naŋ yi va kaŋŋa. Wulin kayni fokaŋ kulo'o, kalaŋ goyo hay nagat kayni, hotaŋ hay nagat ta naŋ vuɗi haya'ta.
14Rakel hiɗi Leya hot dit talam ala: Numa'a ir faraya lebo voco vuma ka hay ziyna vi buma'a lo su? 15Numa wulin kayn kiram ki sum sa pul naɗi su? Kay nam gusma goy gusu, faray ma kuma'na ti kalam ti' lay ɗisu? 16Faray ma Lawn yawam goy hay ɓam buma' kafn kayni nam vuma'a hiɗi gurona vuma'a. Wulin kayn slen ma Lawn daŋgi kafna naŋ ma lumu.
17Yakub fok kulo'o, boyna valamu hiɗi gurona valamu nam ɓesi kay lamgana. 18Farayna valamu hiɗi slena valamu, ma nam fum hay Padan-Aram noŋ kaf nam yawamu, tun iram kat bulum Isaak hay nagat Kanaan. 19Hay li ma Laban kalay goy ka ɗuŋus fok-dimina valam goy kayni, Rakel kul lawayna valam bugolom yilak'. 20Nala Yakub ɗut Laban ma Arameena, kay nam may dum kay pirta valamɗi. 21Nam piriya, hiɗi slen ma ir valamna kafe, nam fokay kulo'o, ɦaw niy-lumn kulo'o, tun iram kat hiɗiyta vi Galaad.
Laban jaŋ kuɗ Yakub
22Hay buurta hidit kayni, labar co tam Laban ala Yakub pirawa. 23Laban yaw ɓosiyomna kuɗumu, nam tuɗ ir buur siɗiya kay slum selemu nam fum kay hiɗiyta vi Galaad. 24May Lawna vul tuwam kir Laban ma Arameena hay duwayta hay henjeta; ka dum ala: Laŋ ŋali, naŋ ma di va ma joo'o mi Yakubɗi.
25Laban co tam Yakub, Yakub vi guɗukŋa valam kulo kay hiɗiyna; Laban hiɗi ɓosiyom sa kuɗumna kaw vi guɗukŋa visi kulo kay hiɗiyt Galaad. 26Laban di tam Yakub, naŋ lum nala kayn mi mige? Naŋ ɗutan kay mige? Naŋ kalay hiɗi gurona vanu ki sum sa naŋ yawsi ay vun duura hiɗi kew-gaferaŋa nala kay mige? 27Naŋ piray goy ŋayaya kay mige? La naŋ ɗutan ɗutiɗi, dan di goy jeweni, nan hinaŋ kal ɗawni hay firita hiɗi nulla, hay cina vi darayna hiɗi dilla. 28Naŋ may hinan hagat kay nan fet yam gurona van goy noŋɗi, naŋ lum kayn mi law ma ɦay-ɦaya. 29Donota van ka'a kay laŋ va ma joo'o, may Lawna vi buŋu dan henjet a la: Laŋ ŋali kay naŋ ma li va ma joo'o tam Yakubɗi. 30Wulin kayn naŋ kaliyawa, kay laata vi ziyna vi buŋ ka caŋu, Lawayna van naŋ kulumay kay mige?
31Yakub hot di mi Laban: Nan ka hiɗi narta hay dikanu, kay nan var ala naŋ ɗawn ma yaw gurona vaŋ goy hay ɓan klasige. 32May sa ma naŋ fi lawayna vaŋawa hay ɓalamuna, nam ma ti mitta! Vok ɓosiyay sa ka tani kaf naŋ ma fek sle ma ir vaŋŋa ma ka hay guɗukŋa vanu, yawaŋga. Kay Yakub may kiram ala sle namna kulumay ti Rakeleɗi.
33Laban kal kalaf hay guɗukŋa vi Yakub, hay guɗukŋa vi Leya hay guɗukŋa vi boy sa sunda sa ma'na, nam may fi vaɗi. Nam kalay goy hay guɗukŋa vi Leya pa kal kalaf hay guɗukŋa vi Rakel. 34Rakel yaw laway namna, na' lakam gaa kuɗ jaŋayna vi lamgana, na' mus kulo kalamu. Laban sar hay guɗukŋ kaf, nam may fi vaɗi. 35Rakel di tam bu'a: Mulanna, dikaŋ muɗ ɦiyɗi, nan min fok kulo vokaŋɗi kayn kay slena vi boyn ka tanu. Nam gara gara, may nam fi lawaynɗi.
36Yakub muɗ ɦiya, nam tun caw nef Laban: Nam sli ditiya di tam Laban: Nan cum mat vaŋ mi gige? nan laŋgi joon mi mige? Naŋ garan hiɗi dikaŋ noŋ pet kayn kay mige? 37Hay li ma naŋ fek slena van kaf kayni, naŋ fi sle vaŋ hay ziyna van su? Vulaŋ sle namna goy kir ɓosiyoŋŋa hiɗi ɓosiyonna, kay nisi ma di lawta ta jarayta. 38Nan li busat dok-ma' hay ziyna vaŋu, fok-dimina hiɗi fok-meena vaŋu may suroɓ goy noŋɗi, fok-gamalana ma ka jar farayna vaŋu nan mutum noŋɗi. 39Fok ma muuriyan jetemi goyna nan may maraŋgaɗi, kay nan kay tuwanu ka wurakaŋga, faray ma nisi ka kulum kan falayta hiɗi henjeta naŋ ka jobom tanu. 40Hay falayta fatta ka waranu, henjeta sle'na ka roŋanu, senda iran may wa'ɗi. 41Wulini nan li busatawa dok-ma' hay ziyna vaŋu; nan laŋ lop hay busat doogo yam fiɗi kay gurona vaŋ sa ma'na, nan laŋ lop kay farayna vaŋ busat karkiya', wurakŋa van naŋ muɗum muɗ muɗ sem doogo. 42Lali Lawna vi bunu Lawna vi Abraham, namu ma Isaak li nar kuɗumna ay hiɗi nanɗi, naŋ gan irani ɗawn goy hiɗi ɓan ɦawa kiɗaŋ-kiɗaŋ'. Lawn wi lasta vanu hiɗi lop ma nan lum hiɗi ɓanna, kay na'ta kamata nam ka kitata valamawa. 43Laban di tam Yakub: oyn lakŋi si gurona vanu, gurosgurayn lakŋi si gurona vanu, farayn tani mi farayna vanu, slen ma naŋ wum kafn lakŋi nam vanu, wulin nan as lum tam gurona vanu hiɗi gurona visi sa nisi vuɗsin ɗawn mi meloge? 44Naŋaya junay bonota, jaraŋ naŋ hiɗi nanu, kay kayni ma li ti di-goyta jaraŋ naŋ hiɗi nanu. 45Yakub yaw hiɗiyna, nam jakam kulo yam tuwam ɗiŋiriŋi.
46Yakub di tam guro-biyomna, yawgi hiɗiyn aya, nisi yawamiya. Nisi molom kulo'o, nisi ti kulo kay hiɗiy namna. 47Laban tun sem liy namna ala Jegar-Sahaduta, Yakub tunum selem ala Galed may. 48Laban di'e: Hiɗiy ma molay yam tuwam tani nam ma li di-goyta jaran hiɗi naŋu. Kuɗ kayni nisi tunum selem ala Galed. 49Nisi tunum Selem lo ala Mispa, kay Laban di'e: Lawn ma ŋomaŋ naŋ lay ŋoman nan lay hay li ma iray muɗ wi tuwam loɗin ɗawni. 50La naŋ las gurona vanu, la naŋ kal yaw boy sara'a lo, wi jaray ɗawn mi sa loɗi, laŋ ŋali, li di goyt jaraŋ naŋ hiɗi nan ɗawn mi Lawn kay tuwamu. 51Laban di tam Yakub: Humaŋu, zawni mi hiɗiy ma nan molom kulo ɗiŋiriŋ jaraŋ hiɗi nanu. 52Hiɗiy ma nay inim kulo ɗiŋirin zawni ma li di-goyt jaray ala nan as jik goy bugolomu kay kalays kataŋɗi, naŋ kaw as jik goy bugolomu kay kalay katanu kay lan jooɗi lay. 53Lawna vi Abraham hiɗi Nakor, Lawna vi busiya ma ka kitat jaraya. Yakub yi va kalamu hiɗi semda vi nam ma Isaak li nar kuɗumna.
54Yakub li ɗifini kulo kay hiɗiyna, nam yi guro-biyomniya kay ti'e, nisi ti'e, cap bur kulo kay hiɗiyta.
Currently Selected:
CAWA'TA TUNITA 31: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001