CAWA'TA TUNITA 30
30
1Hay li ma Rakel wi ala na' tay vuɗ guro mi Yakubɗi, na' tun caw li hunay mi ɓasu'ta: Na' di tam Yakub: Naŋ vulan guro'o, la naɗina nan mita. 2Yakub dikam ɓulak ŋolo tam Rakel, nam di'e: Nan telag a vu'ɗi kayn nan mi Lawn su? 3Na' di'e: Bilha goot ta sunanta zaw kaŋŋi, buraŋ ta'a, na' vuɗan goor man nan ɗaw, hinan fi guro man kuɗa'a. 4Bilha ta sunda va'a na' vulumti ca'a. Yakub kaliya nam bur ta'a. 5Bilha sli haya, na' vuɗ goor mi Yakub. 6Rakel di'e: Lawn kan kitata vanawa hay haga'a, kay nam human delanawa, vulan goorawa. Na' tunum selem ala Dan. 7Bilha ta sunda vi Rakel sli hay mara lo, na' vuɗ goor mara mi Yakub. 8Rakel di'e: ɓasunta nan dura'ti kayn mi duura vi Lawna, may nan kolawa. Na' tunum selem ala Neftali.
9Hay li ma Leya wi ala na' may vuɗ loɗi, na' vi ta sunda va' Zilpa, vula' ca mi Yakub. 10Zilpa ta sunda vi Leya vuɗ goor mi Yakub. 11Leya di'e: Nan fi ŋaatawa yo, na' tunum selem ala Gad. 12Zilpa ta sunda vi Leya vuɗ goor mara mi Yakub lo. 13Leya di'e: Nan fi sle'tawa yo, kay guro-boyn ma di ala sle'ta kanu. Na' tunum selem ala Aser.
14Ruben kalay goyo hay liyn ma feɗna vi Alkamarena, nam fi vuɗna vi mandragoora#30:14 Mandragoora Kayni mi guna vi darta. hay sinena, nam maram mi sulum Leya. Rakel di tam Leya, nan siɗawagu, mandragoora ma goora vag maram yawn nak vulan mag vulge. 15Leya da'a: Wulin kayn jufan kag viya, kayn may asagɗi su? lebo nak yaw mandragoora vi goora van lo kayn litige? Rakel da'a: Yo, ŋaa'a, hay henjet ta vaydita nam ma bur hiɗi naku kay vuɗ mandragoora vi goora vagu. 16Hay li ma Yakub may goy hay sinen vulatit pa, Leya ŋafam iram goy jiya dumu: Vaydi naŋ ma bur ɗawn kalaf kuɗanu, kay nan gusaŋ hiɗi vuɗ-mandragoora vi goora vanu. Hay henjet na'ta nam bur hiɗi na'a. 17Lawn hum siɗawta vi Leya, na' vi haya, na' vuɗ goor ma vaslna mi Yakub. 18Leya di'e: Lawn wurakanawa yo, kay nan vul goota ta sunanta mi jufanu. Na' tunum selem ala Isakar. 19Leya sli hay mara lo, na' vuɗ goor ma karkiyana mi Yakub. 20Leya di'e: Lawn lan vuldawa yo; wulin ɗawn jufan ma mus hiɗi nanu, kay nan vuɗum guron karkiya noŋo. Na' tunum selem ala Zabulon. 21Bugol kayni na' vuɗ goot-cat kep lo, na' tuna' semda va' ala Dina.
22Lawn humam gum kay Rakel; nam hum siɗawta va'a, muɗa' vuɗa. 23Na' sli haya, na' vuɗ goor kepe, na' di'e: Lawn yaw zulota vanawa goyo. 24Na' tunum selem ala Yosef, na' di'e: Lawn vulan goor mara vul loge.
Yakub hiɗi Laban
25Hay li ma Rakel vuɗ Yosef vuɗna, Yakub di tam Laban: Naŋ hinan tuɗa, kay nan min tuɗ hay nagata vanu. 26Naŋ ma vulan boyna vanu hiɗi gurona vanu sa nan sunaŋ kisina, kay nan min tuɗa; kay naŋ wi lop ŋol ma nan laŋgina. 27Laban dumu: Hinan fi slugota kuɗaŋ fige. Nan wi goy ŋaa ala Lawn gan bol kayn kuɗaŋ naŋu; 28naŋ ma tunan wurakŋ kanu, nan min vulaŋga. 29Yakub dumu: Naŋ wi'e, nanige nan sunaŋu, hiɗi nanu farayna vaŋ muɗi ir nanige. 30Kay faray ma ay hay ɓaŋ ne' jewanna muɗi ŋolo, Lawn gaŋ bol kayn kuɗan nanu, wulin kayn nan li lop kay ziyna van kay tuwan ɗawn citige? 31Laban di'e: Nan ma vulaŋgi mi mige? Yakub hot dumu: Naŋ may vulan vaɗi, la naŋ min li kuɗ va ma nan min daŋgin ɗawni, nan min ŋom farayna vaŋ mara'a lo. 32Vaydi nan min poy jar farayna vaŋ kaf, fok ma tuwam jarayna hiɗi ma tuwam zlubara hiɗi ma tuwam wuran kaf naŋ ma lakam goy valamu, jar fokŋa vaŋ kaf kayni ma tuwam jarayna hiɗi ma tuwam zlubara nam mi wurakŋa vanu. 33Gasita van ma li di-goyt kanu hay jifinta, hay li ma naŋ coyawa ɗuw wurakŋa vanu na, faray ma tuwam jarayɗi lay, zlubarɗi lay, wuraɗi layna, la nam ka jar fok-meena vanu hiɗi guro fok-dimina vanu ni, nan kulum kayn kuliya. 34Laban di'e: Kayn ŋaa'a. Van ma li'e ki naŋ di nala. 35Hay buur na'ta de, fok-ŋekŋa ma tuwam jarayna hiɗi ma tuwam zlubara, hiɗi ma tuwam haɓ ne' ne'na, hiɗi fok-dimina ma tuwam wurana kaw, Laban poŋom iram goyo, vulum hay ɓam gurona valamu. 36Nam kalam hay liy ma jaram hiɗi Yakub tuɗ ir buur hiɗi; Dir farayna vi Laban ma hinina Yakub ŋomom may.
37Yakub kus ɓam-gu ma goɗayna vi gu-ziŋitna, gu-amandena hiɗi gu-riginna, nam hom ɓulokom goyo, ɓulok haɓ ma kalaf tam gun nam hinim yalam goy ɦawa'a. 38Bugol kayni ɓam-gu ma nam hom tuwam goyna nam lakam hay dutay ma farayn ci niyna, hiɗi palkatamna goy hay ir farayn ma co ci niyna, kay hay liy ma nam coowa ci niyna, nam ma fil tuwamu. 39Farayn fil tuwam kulo goboy tam gu namna, tuwam ɗo jaraya, zlubari hiɗi sergeɗe. 40Yakub ka ir guro fokŋ goyo, ma tuwam jarayna hiɗi ma tuwam wurana nam lakam jar farayna vi Laban. Ki kayn nala nam poŋ ir farayna valam goyo, nam min tapam jar fi Laban loɗi. 41Hay li ma fok ma ŋulona tun caw fil hen kayni, Yakub lak ɓam-gun hay dutayna, kay farayn wumu, kay nam fil tuwan kulo goboy tam ɓam-guna. 42Hay li ma nam wi ala fok-dimin kayn ŋokaya, nam may bur ɓam-gun vokomɗi. Nala fok ma ŋokayna nam muɗ vi Laban may, ma ɗorayna nam vi Yakub may. 43Yakub muɗ faray ŋol suwa, faray ma gurayna nam fum ŋolo, sunda sa jufayna hiɗi sa boyn kaw nam fisi ŋolo, lamgana hiɗi kurona kaw.
Currently Selected:
CAWA'TA TUNITA 30: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001