CAWA'TA TUNITA 17

Semda vi Abram muɗi Abraham

1Hay li ma busata vi Abram co dok-zleeŋe yam zleeŋe, Ma-Vatɗin vul tuwam kiramu dum ala: nanu mi Lawn ma Gaŋeraŋ-Petna, naŋ ma poy ɗigere dok-dok vok iranu. 2Nan min jun bonot jaran hiɗi naŋu, nan ma laŋ jafaŋ ŋolo. 3Abram girif gaa vok Lawna, Lawn law talamu di'e: 4Kayni ti bonota ta nan juna' hiɗi naŋu, naŋ ma muɗ mi bum jaf-sumun ŋolo. 5Wulin ɗawni, nisi ma yaŋ ala Abram loɗi, may ma muɗ yaŋ ɗawn ala Abraham kay nan min muɗaŋ goy bum jaf-sumun ŋolo. 6Naŋ ma biya jaf-sumun ŋolo ta-ta vok ɗaw, nan ma muɗaŋ goy bum jaf-sumu'u, muliyan ŋolo ma kalay goy hay naŋ pa. 7Nan min jun bonota van jaran hiɗi naŋu, hiɗi jafna vaŋ ma bugolaŋŋa, kuɗ jafsiya-jafsiya, ma li ɗawni ti bonota ta vat loɗita, hiɗi bono na'ta nan ma muɗ mi Lawna vaŋu hiɗi jafna vaŋ ma bugolaŋŋa kaw. 8Nagat kaf ta naŋ ka musi haya' wulin ki pul ŋala kayni, nan min vulaŋga, nan min vula' mi jafna vaŋ ma bugolaŋŋa kaw, nagata Kanaan kaf nan min vulaŋga kay naŋ ma mus haya' dok-doko, nan ma muɗ mi Lawna visiya.

Tun-cawta vi ka-gosayta

9Lawna di tam Abraham: Wulin kayn naŋ ma ŋom bonota ta jaran hiɗi naŋga ŋaa'a, naŋ hiɗi jafna vaŋ ma bugolaŋŋa, kuɗ jafna visi voksiya kaf. 10Kayni ti bonota ta jarayta; nigi ma ŋoma' ŋaa'a, jafna vigi sa bugolgin kaw ma ŋoma'a, kayn di ala gurona vigi sa jufayn kaf nigi ma kaasi gosaya. 11Nigi ma ka gosaya, kayni mi va ma ɗek bonot ta jaran hiɗi nigita. 12Guro sa jufayna vigiya hay li ma buurta visi coowa glafandi, nigi ma kaasi gosaya, kuɗ jafna vigi kaf; la nisi vuɗ vo vigiya, la nigi gussi hiɗi gurju'u hay ɓam sum sa pulla sa may hay jafna vigiɗi kaw. 13Nigi ma ka gosay mi sum sa vuɗ hay ziyna vigiya hiɗi sum sa nigi gussi hiɗi gurjuta; bonota van ma li hay sliw tuwgi ɗawni ti bonota vatɗita. 14Guro-jufay sa kay gosoyɗina nigi ma basi irsi goy jar sumuna vanu, kay nisi raw bonota van goyo. 15Lawna di tam Abraham: cata vaŋu naŋ ma ya' Saray loɗi, may naŋ ma joka' se' ala Sara. 16Nan ma ga' bolo, nan ma vulaŋ goor hiɗi na' kepe, nan ma ga' bolo, na' ma muɗ ti sum jaf-sumun ŋolo, muliyan ŋolo hiɗi jaf-sumun ma kalay goy haya' pa. 17Abraham girif gaa vok Ma-Vatɗina, nam cena, nam ka di hay dikam ala: sa ma busata valam kisna vuɗ goor ɗawn vuɗtige? Sara kaw busata va' asay dok-zleeŋe noŋo, as a vuɗ goor lo su? 18Abraham di tam Lawna, Hin Ismayel mus iri vok iraŋ malam musu. 19Lawn di'e: Cata vaŋ Sara ma vuɗaŋ goor gasiya, naŋ ma tunum selem ala Isaak. Nan ma jun bonota van hiɗi nam ɗawni, ti bonota ta vatɗina tam jafam bugolom ɗaw. 20Kuɗ jobta vaŋ kay Ismayel nan humaŋawa. Awa, nan min gum bolo, nan min biyam jafam ŋolo, Yeriman doogo yam ma' ma kalay goy hay jafna valam pa, nam ma li ɗawn mi bum jaf-sumun ŋolo. 21Nan ma jun bonota van hiɗi Isaak, namu Sara vuɗum ɗawn caka'a hay liyn ki tan nala. 22Hay li ma Lawn vat dita valam hiɗi Abraham vatna, nam kalay kulo.

23Abraham vi Ismayel hiɗi nisi sa vuɗi hay ziyna valam kaf, hiɗi sa nam gussi hiɗi gurjut kaf, sa jufayna sa hay ziyna valam noŋ kaf; nam kaasi gosaya hay buur na'ta, ki Lawn dum nala. 24Hay li ma Abraham ka gosay kayni, busata valam asay dok-zleeŋe yam zleeŋe. 25Hay li ma goora valam Ismayel ka gosay kayni, busata valam asay doogo yam ɦidi. 26Hay buur na'ta de Abraham ka gosaya, hiɗi goora valam Ismayel kaw. 27Sum sa hay ziyna vi Abraham kaf, sa vuɗ hay ziyna valamu hiɗi sa nam gussi hiɗi gurjuta hay ɓam sa pulla, nisi ka gosay hiɗi nam kuɗ tuwsi kaf.

Currently Selected:

CAWA'TA TUNITA 17: Massana

Highlight

Copy