GALATENA 1

Ɗek-tuwta hiɗi gi-deɓta

Rom 1:1-7

1Paulus, Apostolla, vi sumun paɗi, kuɗ saɗi kaw, may kuɗ Yesu Kristu; hiɗi Lawna Bumna, ma dayam kulo'o jar sa mitina pa, 2hiɗi ɓosiyon sa ka hiɗi nanu kaf, tam sa viyna hay Galatiya: 3Slugota tigiya hiɗi toyta vi Lawna Bumna hiɗi Bum-Sumuna vaya Yesu Kristu, 4nam ma vul tuwamawa goyo kay sulukŋa vaya, kay suɗay goy hay liy ma joona ma nay ka hayam wulini, kuɗ minda vi Lawna vaya, buya, 5Gajijita talamu hay vatɗita vatɗita. Amen.

Ɦay-ɦayta vi sa Galatena

Gal 3:1-5

6nan muɗi huyum kay mige nam ma yigiyawa hay slugota vi Kristu nigi hinimawa goy gosoyo kay muɗ irgi tam labara ma firina mara'a. 7May hay gasita labara ma firina mara'a mayɗi, may sum segen ka'a min zliŋgi goyo, nisi min gun del labara ma firina vi Kristu. 8May la si numa'a lebo, la si sunda-wuralawna kaw kus tigiya labar ma firina ma ir valamu; hiɗi nam ma numa kusum tigina, sa namna beɗay goyo. 9Ki numa di jew nala, numa'a fi di wulin lo ala, la san kus labar ma firina mara'a tigiya, may mi nam ma numa kusum tigi jewnɗi, sa namna beɗay goyo.

10Kayn min di ala nan ka gar kay vi dik sumuna a nisi ma di ŋaat kanu su? Mayɗi. May nan min kayn ala di ŋaat kan mi Lawna, may mi saɗi. Lebo nan gar a sumun ma ɗuwan ŋaa'a su? La nan gar a sumun ɗuwan ŋaa'a ni, nan may min sunda vi Kristu loɗi.

Nanige Paulus muɗ goy Apostolaya

Lop Ap 22:3-16

11Ɓosiyonna, nan fi di tigi ala labar ma firina ma nan kusum tigina kayni may vi saɗi. 12Dan kay labar namna kayni may mi saɗi, sa mara hatan labar namnaɗi kaw, may ɗekan goy kalam kayn mi Yesu Kristu kay tuwamu.

13Nigi humi labara kay lita vanu hay li ma nan ay hay hagata vi vida vi sa Yudiyana. Sa viyna vi Lawna nan lisi las dono ŋolo, nan tisi ɓuraŋi kaw. 14Bogiyon sa Yudiyana hiɗi sa hay jafna vanu nan suwsi kaf hay vida vi Yudiyana. Nan ay ciwer ŋolo hay hagat ta sumiyan-ŋolo sla'ta.

15May nam ma ŋaɓan goy vanu kalaf hay suni pa, ma yanawa kuɗ slugota valamu, 16Kir Lawna ŋaa'a kay ɗek Goora valam goy kiranu, kay nan ma kus goy kalamu jar sa bay-vina, kay na'ta nan ŋra vunan hiɗi sliwna hiɗi busuwna noŋɗi. 17Nan tuɗi kulo'o hay Yerusalem kat sa Apostolayna sa ay jewannaɗi, may nan tuɗ goy Arabiya, hotay hay Damas lo. 18Busat ɦidi bugolda kayni nan tuɗ kulo'o hay Yerusalem kay ɗuw Kefas, nan mus hiɗi namu buur doogo yam vasl. 19Hay na'ta nan may wi sa ma Apostolay mara noŋɗi, may mi Yakub ɓasum Bum-Sumuna kepe. 20Ɗuwgiya, slen ma nan ka ɗom tigin kayni Lawna ka wumu, nan may ka sinɗi.

21Bugol kayni nan kal hay nagata vi Siriya hiɗi Kilikiya. 22Hay na'ta sa viyna vi Kristu hay Yuda bay wan iran tuwa noŋo. 23Nisi humi ɦawa ala, nam ma jewe las sa viyna ka kus labara kay vida ta nam ɓulaka' jewta. 24Nisi subur Lawna kanu.

Currently Selected:

GALATENA 1: Massana

Highlight

Copy