2 KORINTENA 13
13
Gatta hiɗi gi-deɓta ma cawna
1Kayni mi sem ma ɦidina ma nan co katgiya. Slen kaf as kota kuɗ yoboyna vi sa di-goyna ma' lebo ɦidi. 2Hay li ma nan ay jargiya sem ma ma'na, dit kayni nan da' tigiya: May wulini nan may jargiɗi, dit kayni nan min da' goy jewe tam nisi sa li suluk jewe, tam segena kaw ala: Hay li ma nan hotisawa katgiya, nan as hin sa goy kuɗgiɗi. 3Kay nigi gar a fi va ma ɗek ala Kristu ka law hiɗi nanu, namu ma may maŋay jargiɗi, may ka dono'o jargiya. 4Kay la nam ɓalay kat gu-ma-grakŋa hay maŋayta, wulini nam ka iriya hay donota vi Lawna; numa'a kaw, numa maŋay hay namu, may numa ma lak iri hiɗi namu, hay donota vi Lawna ta ka jargiya.
5Hay na'ta wakgi tuwgiya kay tuwgiya, kay ɗuwa la nigi ka hay vida; sargi tuwgi goy ŋaa'a tige. Nigi may wi ala Kristu ka haygiya ɗisu? Kla nigi ma lin si sum sa hiɗi vidaɗi klasige. 6May nan ka cub hiɗi sle'ta kay nigi ma wi ala sum sa ŋray kay wakkaɗi kayn mayn si numaɗi. 7May numa siɗaw Lawna a nigi ma li va ma joo'o noŋɗi; may kay sumuna ma di ŋaa'a kumaɗi, may kay nigi ma li va ma ŋaana, la sumun di joo kuma kaw. 8Kay donota vuma'a kay li va kat gasita mayɗi; ka kuma kayni ti gasita tuta. 9May numa li firiya hay li ma numa maŋaya, may nigi dono'o, kayni numa siɗaw kigi kaw, kay nigi ma muɗ pasiyaki. 10Kuɗ na'ta nan ɗo slen ki kayn nala hay li ma nan may jargiɗi, kay hay li ma nan ka jargiya, nan as law ɗeŋɗi, kuɗ donota ta Bum-Sumuna vulanawa kay wulgi kulo'o, may kay hotgi gaaɗi.
11Bugol kayni, ɓosiyonna, lakgi hay firita, muɗgi pasiyaki, teŋgi ir tuwgiya, tapgi kepe, lakgi hiɗi toyta jar-tuwgiya, nala Lawna vi ti-kamda hiɗi toyta ma mus hiɗi nigiya.
12Gi deɓ mi tuwgiya hiɗi ŋaf-vunda ta peldetta. Sa peldetna kaf gigi deɓe.
13Slugota vi Bum-Sumuna Yesu Kristu, hiɗi ti-kamda vi Lawna hiɗi tapta vi Ŋusta-Peldetta mus hiɗi nigi kafge.
Currently Selected:
2 KORINTENA 13: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
