EFESENA 6

1Nigi gurona, humgi kuɗ sumaygiya, ki kuɗ Bum-Sumuna nala, kay kayni hay liyamu. 2Slaŋ yam buŋu hiɗi suŋu kulo'o, -- kayni mi vun-ma-gatna ma jewna ma deŋga ka kuɗumu -- 3Kay naŋ ma fi ŋaata, mus ŋol hay nagata kaw.

4Nigi sumayna, ka gurona vigi ɦiyɗi, may nigi wulsi kulo'o hay gatta ta ŋaata hiɗi hatta ŋalda vi Bum-Sumuna.

5Nigi sa li lop vo vi sumuna, humgi kuɗ mulaygina hay sliwna hiɗi narta, hiɗi wiira kaw, hay ŋalda ŋaata vi dikgiya ki kuɗ Kristu nala; 6nigi ma li lopna kuɗ vok-irsiɗi, ki sumuna ɗuwgiya di ŋaat kigi kaw nalaɗi, may ki sa sunda vi Kristu nala, sa li lopna hiɗi diksi kaf hay minda vi Lawna. 7Sunsiya hiɗi minda ta gasita ki nigi sunum kayn mi Bum-Sumun nala, may ki nigi sunsi kayni si sumuna ɦawa naɗi, 8hay wida ala gigekaw, la gorvona lebo goor ma vuɗina, Bum-Sumuna ma wurakam ɗawn kuɗ ŋaata ta nam la'ta.

9Tigi nigi mulaysina, nigi ma li ŋray ca ki kayn nala tam sa sunda vigiya; nigi ma tel tuwgiya kay lawsi dono'o, hay wida ala ma ŋolla visiya ma ka hay wuralawna, nam ma ka ir saɗi, nam kayn ma figina kaw.

Sle ma duura vi sa ma viyna

10Va ma hinin kayni, kay nigi ma lak dono'o hay Bum-Sumuna, hay donota vi gaŋeraŋa valamu kaw. 11Cukgi slena ma duura vi Lawna kaf kigiya, kay nigi fi col dono'o vok yalla vi Matna pet. 12Kay nay dur kayni hiɗi sliwn hiɗi busuwnaɗi, may hiɗi gaŋeraŋa, hiɗi donota, hiɗi muliyan jufunda sa ka gaa kay nagat tanna, nay dur kayn hiɗi ŋusiyana ma joona, ma ka hay liyn ma kulo dukalawna kaw. 13Kay na'ta, yawgi slen ma duura vi Lawna kaf, kay nigi fi lak dono'o kay dur hay fattiɗeŋ ma joona, as col dono'o kaw bugol kolda.

14Lakgi dono'o: Furgi juni hiɗi gasita; cuki hiɗi ŋoŋ ma duura vi ɗigerta; 15tuguruna cuki segi kotay ŋaa'a hiɗi labar ma firina vi toyta; 16vok duura kaf, yawgi marayta vi vida, ma nigi as tew kuta vi ɓarawna vi ma joona goyo hiɗi namna; 17yawgi ŋalayta-duura vi su'da hiɗi kew-gaferaŋa vi Ŋusta, kayni mi yoboyna vi Lawna. 18Hay vok-liyna kaf siɗawgiya hay Ŋusta, siɗawta hiɗi tiyna kuɗ jafamu jafamu. Lakgi jigere hay kayni ŋiresl', siɗawgi kay sa peldetna kaf. 19Kanu kaw, kay yoboyna ma vulanti manu, hay li ma nan mal vunan goyo, kay nan ma fi di ŋayayta vi labara ma firina goyo hiɗi kursuliya, 20yoboy namna ma nan muɗi kuɗum sa ma sunda hay jaɓna; ma nan ka kusum hiɗi kursuliya, kay nan ma kusum ki kayn nala.

Gi deɓta vi Paulus ta cawta

21A nigi kaw, nigi ma hum slena kanu, hiɗi slena ma nan lum goy haraŋi, ɓasun ma hayan kalamna, Tikikus sa ma sunda ma gasina hay Bum-sumuna ma di slen kayni kaf tigiya. 22Nan gumis tigi ir muray ɦawa, kay nigi ma wi lakka vuma'a, kay nam ma tungi dikgi gaa'a kaw.

23Lawna Bumna hiɗi Bum-sumuna vaya Yesu Kristu vul sle'ta hiɗi minda tam ɓosiyayna tage. 24Slugota ma li hiɗi nisi kaf sa min Bum-sumuna Yesu Kristu hay ɓulakɗita.

Currently Selected:

EFESENA 6: Massana

Highlight

Copy