EFESENA 5

1Sligi kuɗ Lawna, ki gurona valam sa hayam kisina nala; 2poygi hay minda, ki Kristu minayawa nala, vul tuwam goy kaya tam Lawna, ki vulda hiɗi ɗifinna, ki urdina ma his ŋaana nala.

Jufunda hiɗi haraŋa

1 Tes 4:1-18; 1 Kor 6:9-11

3May, zlata-bulota hiɗi liwista kaf, hiɗi haramda kaw, hin sem slen kayni yi kulo jargi noŋɗi, kay kayni may ŋaa'a kay sa peldetnaɗi. 4Yoboy ma to'ofayna, yoboy ma ɦay-ɦayna, yoboy ma waana kaw, nigi ma dum jargiɗi, kay kayni may ŋaaɗi. May nigi ma da' ti dita ta gi-deɓta. 5Kay nigi ma wi slen kayni goy haraŋi, sa ma li zlata bulo'o, sa ma liwisi lebo sa ma min slen ŋolo, kayn min di'e sa ma girif lawayn ma waana, as fi vocota hay mulda vi Kristu hiɗi Lawn noŋɗi.

6Hin sa ɗutgi hiɗi yoboyn ma waa ɦawaɗi, kay slen ma ki kayn nala mar ɦiyda vi Lawna kay gurona vi ŋel-gatta. 7Kay na'ta tapgi hiɗi nisi noŋɗi. 8Kay nigi jewe ay jufunda may wulini nigi muɗi mi haraŋa hay Bum-Sumuna, poygi ki gurona vi haraŋa nala kaw; 9Kay vuɗna vi haraŋa kayn ka hay ŋaata, ɗigerta hiɗi gasita. 10Wakgi slen ma ŋaana hay Bum-Sumuna; 11tapgi hiɗi lop ma getayna vi jufundaɗi, may nigi ma patam cawam goyo. 12Kay slen ma nisi lum goy ŋayayna, nam zulo'o kay dum goyo, 13may hay li ma dumawa goyo, nam ma goy hay haraŋa, kay slen ma ma goy hay haraŋa pet nam mi haraŋa. 14Kay na'ta dit di'e:

Zliyaŋ kulo'o, naŋ sa ma kalay sene,

Fokaŋ kulo'o jar sa mitina pa,

Kristu ma li haraŋ kaŋu.#5:14 fi dita kayni goy hay Es 26:19; 60:1.

15Nigi ma li ŋal hay poyta vigiya, nigi ma poy ki sum sa ɦoyayna nalaɗi, may nigi ma poy ki sa yalla nala; 16gusgi liyna, kay buura ka joo'o. 17Kay na'ta lakgi hay bay-wida kay yigiɗi, may wigi minda vi Lawna.

18Nigi ma hob haygi hiɗi dolaynɗi, kay nam kalgi hay viyuwta, may hobgi hiɗi Ŋusta-Peldetta; 19Lakgi jar-tuwgi hiɗi nul ma suburta, hiɗi nul ma gi deɓta, hiɗi nulla ma hay Ŋusta; ligi nulla, vulgi suburta mi Bum-Sumuna hiɗi dikgi kafe. 20Gigi deɓ dok-dok mi Lawna bumna kay slen kaf hay semda vi Bum-Sumuna vaya Yesu Kristu:

21Nigi ma hot yigi gaa kuɗ tuwgiya tuwgiya hay narta kuɗ Kristu.

Ziyna vi sa viyna

Kol 3:18—4:1; 1 Pet 2:18-25; 3:1-7

22Nigi boyna, humgi kuɗ jufaygiya, ki kuɗ Bum-Sumuna nala. 23Kay jufna mi yamda vi cata, ki Kristu mi yamda vi tapna ma tuwna valamna nala, nam mi sa ma su'da valam kaw, 24ki tapna hot yisi gaa kuɗ Kristu nala, boyna ma hot yisi gaa kuɗ jufaysiya hay slen kaf kaw, cat gige gigekaw hot ya' gaa kuɗ jufa'a jufa'a.

25Nigi jufayna, gigekaw ma min cata valamu valamu, ki Kristu min tapna nala, vul tuwam goy kisiya kaw, 26kay lisi goy peldete, hay li ma nam porsi hay muzta-niyna hiɗi yoboyna kaw, 27kay nam fi col tapna sa ka hiɗi gajijita vok-iramu, bay va tun tisiya, bay hormosa, hiɗi va mara ma ki kayn nalaɗi kaw, may kay nisi ma lak peldet bay joota. 28Nala kaw, jufayna ma min boyna visiya ki sliw-tuwsi nala, sa ma min cata valamu min tuwamu kaw. 29Kay sa ma ka gaw tam tuwamu mayɗi, may nam ma vulum tina, kotom tuwamu kaw, ki Kristu li tam Ekklesiyata nala, 30kay nay mi ɓetna vi tuwna valamu. 31Kay na'ta jufna ma hin bulumu hiɗi sulumu kay tap hiɗi cata valamu, nisi ma' ma muɗ mi sliw-tuw ma kepna. 32Ŋayay na'ta kayni ŋolo; nan di kayni kay Kristu, kay Ekklesiyata may. 33Hini kayn ala, gige gige jargiya ma min cata valamu valamu, cata ma hum kuɗ jufa'a kaw.

Currently Selected:

EFESENA 5: Massana

Highlight

Copy