GATTA-SEM-MA'TA 27
27
GI BOLDA HIƊI BE'DA
Gi bolda hiɗi be'da
1Musus hiɗi sa maariyana vi Israyel kaf vul dit tam sumun ala: Vun-ma-gatna ma nan digit vaydina nigi ma li kuɗum kafe. 2Hay buur ma nigi ɦaw Yordanawa kulo'o kay kal hay nagata ta Ma-Vatɗina Lawna vigiya min vulgiya, nigi ma jak hiɗiy ma ŋulon kulo kay tuwamu, nigi ma korom tuwam haɓi, 3yoboyna vi vun-ma-gatna nigi ma ɗom kulo talam kafe, hay li ma nigi ɦawawa kulo'o kay kal hay nagata ta Ma-Vatɗina Lawna vigi min vulgiya, nagata ta miira hiɗi yumda ka riŋ goy haya, ki Ma-Vatɗina Lawna vi sumaygi di tigi nala. 4Hay li ma nigi haw Yordanawa kulo'o, nigi ma jak hiɗiyn kulo kay hiɗiyt Ebal, hiɗiy ma nan vulgi hagat vaydi kay nigi ma jakam kulo'ona, nigi ma korom tuwam haɓi. 5Ɗawni, nigi ma in giwin-ma-ɗifinna mi Ma-Vatɗina Lawna vigiya, giwin-ma-ɗifinna ma koti hiɗi hiɗiyna, ma nigi may kal kawayn talamɗina. 6Giwin-ma-ɗifinna vi Ma-Vatɗina Lawna vigiya nigi ma kotom hiɗi hiɗiyna ma tuwam bay ceɗ goyna, nigi ma li ɗifin ma ŋal goyna tam Ma-Vatɗina Lawna vigiya kulo kay giwin-ma-ɗifinna namna; 7nigi ma li ɗifin ma gi-deɓta, nigi ma ti'e hay liyn ma nigi li firiya vok Ma-Vatɗina Lawna vigiya. 8Nigi ma ɗo yoboyna vi gatta kaf gaa kay hiɗiy namna, nigi ma ɓirim gaa ŋaa'a.
9Musus hiɗi muliyan-sa-ɗifinna sa Levitna law tam sa Israyella kaf ala: Sa Israyella, lakgi ŋali, humgiya, vaydi nigi muɗi si sumuna vi Ma-Vatɗina Lawna vigiya.
10Nigi ma hum del Ma-Vatɗina Lawna vigiya, vun-ma-gatna valamu hiɗi slen ma nam dumna ma nan vulgit vaydina nigi ma li kuɗumu.
11Hay buur na'ta de', Musus vul dita tam sumuna ala: 12Hay li ma nigi ɦaw Yordanawa kulo'o, jafna vi Simeyon, Levi, Yuda, Isakar, Yosef hiɗi Benyamin ma lak kulo kay hiɗiyt Garizim kay gi bol kay sumuna, 13may jafna vi Ruben, Gad, Aser, Zabulon, Dan hiɗi Neftali ma lak kulo kay hiɗiyt Ebal kay beɗ sumuna. 14Sum sa Levitna ma sli ditiya ma di hiɗi delsi kulo ŋolo tam sum sa Israyella kaf ala:
15Joot kay sa ma ceɗ lawayn waana, lebo kot va ma sli tuw sana hiɗi kaway ma yorayna, nam liwisi vok ir Ma-Vatɗina, lopna vi sa ma ceɗ slen hiɗi ɓalamu, lakam hay liyn ma goy ŋayayna. Sumun kaf ma hot dit ala: Amen.
16Joot kay sa ma ɗuw bulumu hiɗi sulum birek-ceke: Sumun kaf ma hot dit ala: Amen.
17Joot kay sa ma jok jaara vi sugolom goyna, sumun kaf ma hot dit ala: Amen!
18Joot kay sa ma viy sa ma dukin goy hay hagata. Sumun kaf ma hot dit ala: Amen.
19Joot kay sa ma ɓulak lawt vok sa ma pulla, sa ma kuyuna hiɗi cata duhulta. Sumun kaf ma hot dit ala: Amen.
20Joot kay sa ma bur hiɗi cata vi bulumu, kay nam yaw va ma buura vi bulum kulo'o. Sumun kaf ma hot dit ala: Amen.
21Joot kay sa ma bur hiɗi sle ma farayna. Sumun kaf ma hot dit ala: Amen.
22Joot kay sa ma bur hiɗi ɓasulumta, goota vi bulumu lebo goota vi sulumu. Sumun kaf ma hot dit ala: Amen.
23Joot kay sa ma bur hiɗi kunomta. Sumun kaf ma hot dit ala: Amen.
24Joot kay sa ma ci sugolomna goy ŋayaya. Sumun kaf ma hot dit ala: Amen.
25Joot kay sa ma yaw va hay ɓam sa'a kay ɦok busuw ma bay-joot goyo. Sumun kaf ma hot dit ala: Amen.
26Joot kay sa ma li kuɗ yoboyna vi vun-ma-gatna kaynɗi. Sumun kaf ma hot dit ala: Amen.
Currently Selected:
GATTA-SEM-MA'TA 27: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
