2 MULIYANA 9

Yehu ci mulla vi Yuda hiɗi mulla vi Israyel

1Elise ma jobta yi sa kep jar gurona vi sa jobta, nam ka dum ala: Junaŋ furaŋu, gasas ta mula kayni slaŋgi hay ɓaŋu, tuɗaŋ hay Ramot hay Galaad. 2Hay li ma naŋ coowa ɗawni, naŋ ma gar Yehu, goora vi Yosafat, goora vi Nimsi. Naŋ ma yumay goy jar ɓosiyomna pa, naŋ ma naram goy hay ziy ta goy ŋayaya. 3Naŋ ma sli gasas ta hiɗi mula, naŋ ma ɦok mul kalamu, naŋ ma di ala: Ma-Vatɗina di ki kayn nala: «Nan tunaŋ mulu kay sa Israyella.» Bugol kayni naŋ ma mal vun-ziyn goyo, naŋ ma pir jaŋi colɗi. 4Sa ma joriyona, ma sunda vi Eliyas ma jobta kalay hay Ramot hay Galaad. 5Hay li ma nam co ɗawni, nam fi sa ŋulona vi sojen ka molay gaa'a. Nam di'e: Ma ŋolla, nan ka hiɗi va'a kay di taŋu. Yehu di'e: Naŋ minim jarma mi gige? Nam hot dit ala mi naŋu, ma ŋolla. 6Yehu fok kulo'o, kal kalaf hay ziyna, sa ma joriyona ɦok mul kalamu, ka dum ala: Ma-Vatɗina Lawna vi Israyel di ki kayn nala: Nan tunaŋ mulu kay sa Israyella sumuna vanu. 7Naŋ ma cal sum sa vo hay ziyna vi Akab mulaŋŋa, busuwna vi sa sunda vanu sa jobta, hiɗi busuwna vi sa sunda vi Ma-Vatɗin kaf nan ma jobom yalam tam Yesabel. 8Sum sa hay ziyna vi Akab kaf ma mita; sum sa hay jafna vi Akab kaf nan ma vatsi goyo, nisi sa gorvo'o hiɗi nisi sa ka goy butiya hay Israyel kafe, 9nan ma muɗ ziyna vi Akab ŋray ca ki ziyna vi Yerobowam goora vi Nebat nala, ki ziyna vi Bayeska goora vi Akiya nala. 10Durnayna ma mut Yesabel hay sinena vi Yisreel, ma fi sa'a kay pa' gaa noŋɗi. Bugol kayni goor ma joriyon mal vun-ziyn goyo, kalay jaŋi.

11Hay li ma Yehu kalay goyo kay hot tam sa sunda vi mulamna, nisi ka dum ala mayɗin mige? Sa ma ɦoyayn kayni co taŋu kay garam mige? Yehu hot dita: San kayni nigi wum ŋaa'a ŋolo, nigi wi va ma nam as dumna kaw. 12May nisi di'e: Sinda! Naŋ ma duma'aya. Nala nam di'e: Nam dan slen ki kayn nala nala. Nam dan kayn ala: Ma-Vatɗin ka di ala: Nan tunaŋ mulu kay sa Israyella. 13Wulini wulini nisi yaw sligara visiya, nisi lakam gaa kuɗ Yehu kulo kay jaŋgalla, nisi buw togolomna, ka di ala: Yehu mi mulla. 14Ki kayn nala Yehu goora vi Yosafat, goora vi Nimsi, nam fok lawt kay Yoram. Hay na'ta kayni, Yoram hiɗi sum sa Israyel kaf ka ŋom Ramot hay Galaad, kay hin Hazayel mulla vi Siriya co sla'ɗi; 15may mulla Yoram hotay hay Yisreel kay cit milla ma sum sa Siriyan vulumtina, hay li ma nam ka li duura hiɗi Hazayel mulla vi Siriya. Yehu di'e: La nigi ka hiɗi minda, sa kep kaw ma siy goy hay hoyok-ziyna kay tuɗ labara hay Yisreel noŋɗi. 16Bugol kayni Yehu ɓe kay keke-ma-duura valamu, kalay hay Yisreel, kay Yoram ka buri gaa'a, Ahasiya mulla vi Yuda ka coy talamu kay saramu may.

17Sa ma ŋomda ma ka coli kulo kay simdira vi Yisreel wi vokŋa vi Yehu ay tuɗa. Nam di'e: Iran wi vok ma ŋolla ay tuɗa. Yoram di'e: Vaŋ sa ma jaŋ kulum kepe, gum katsiya kay jobsi ala nisi tuɗay kayni hiɗi sle'ta su? 18Sa ma jaŋ kulumna kalay ŋaf ir Yehu, nam di ala: Mulla di ala nigi tuɗay kayn hiɗi sle'ta su? Yehu hotom dit ala: Law vaŋ ka hiɗi sle'ta su? Tapaŋay kuɗanu. Sa ma ŋom vun-galana ka di ala: Sa ma sunda coy ta-ta tisiya, may nam may hotayɗi. 19Yoram gi sa hena ma jaŋ kulumna, nam co katsiya di'e: Mulla di ala: Nigi tuɗay kayni hiɗi sle'ta su? Yehu hot dit ala: Law vaŋ ka hiɗi sle'ta su? Tapaŋay kuɗanu. 20Sa ma ŋom vun-galan di'e: Nam coy ta-ta tisiya, may nam may hotayɗi. Nan ka wi ki jaŋ keken kayni mi Yehu goora vi Nimsi nala, kay nam jaŋ kekena valam ki nam ɦoyaya nala.

21Ki kayn nala Yoram di'e: Tungi jukŋ kel kulumna. Nisi ɓe hay keke-ma-duura. Yoram mulla vi Israyel hiɗi Ahasiya mulla vi Yuda, cukay goyo, gigekaw hiɗi keke-ma-duura valamu valamu, kay tuɗ ŋaf ir Yehu. Nisi ŋaf hiɗi namu hay sinena vi Nabot ma Yisreella. 22Hay li ma Yoram wi Yehu, nam di'e: Hiɗi sle'ta ɦawa su Yehu? Yehu hot dita: Hay li ma liwista vi suŋu Yesabel hiɗi fuliyana va' ɓay vat tuwa, sle'ta ti sleɗ mige? 23Yoram hot ŋoromu pir jaŋi, nam di tam Ahasiya ala: Laŋ ŋali Ahasiya, sumun vunsi ŋray kanu! 24May Yehu yaw ɓarawta valamu, nam ɓe Yoram hay ɓirlim ŋoromu, ɓarawta duɓ goy vun-dikamu, Yoram cap mita hay keke-ma-duura valamu. 25Yehu di tam sojena valam ma ŋolla Bidkar ala: Slaŋga, gaŋgi hay sinena vi Nabot ma Yisreella, kay humaŋ ma gaŋ tige: Kay naŋ hiɗi nanu, hay li ma nay ay kuɗ tuway kay kulumayna bugol Akab bulumu, Ma-Vatɗina di yoboyn talam ala: 26Kamata nan wi busuwna vi Nabot hiɗi busuwna vi gurona valamu, nan min laŋ naŋ nala kaw hay sine namna, slaŋga, gaŋgi goy hay sinena, kuɗ yoboy ma Ma-Vatɗin dumna.#9:26 1 Mul 21:19.

27Hay li ma Ahasiya mulla vi Yuda wi kayni, nam pir jaŋi hay hagata vi jardeŋŋa. Yehu jaŋ kuɗumu di'e: Nam kaw nigi ma calamis kulo kay kekena, nisi calam hay li ma jik kulona vi Gur, goboy hiɗi Yibleyam. Nam ŋay goy hay Megiddo, nam mit ɗawni may. 28Sa sunda valamu ziyim kulo hay keke-ma-duura, nisi pum hay zulda valamu hiɗi sumiyamu, hay hoyok-ziyna vi David. 29Ahasiya muɗ mulla vi Yuda kayni hay busata doogo yam kepta vi Yoram goora vi Akab.

Jafna vi Akab cimiy goyo

30Yehu kal kulo hay Yisreel. Hay li ma Yesabel hum kayni, na' jif ira' hiɗi ciyna, kusuɓ ya'a, ka ɗuw hay ir ziyda. 31Hay li ma Yehu co hay vun-ziyda, na' ka dum ala naŋ co kayni hiɗi sle'ta su? Zimri ma wulina, sa ma ci mulaŋŋa goyna! 32Nam poŋ iram kulo hay ir-ziyda di'e: Sa ma kuɗanu mi gige? Mi gige? Sum sa patayn ma' lebo hiɗi ɗuwumu, nisi co tam ir-ziyd goboyo. 33Nam di'e: Zutgit gaa'a. Nisi zuta' gaa'a, busuwna va' jaŋ kulo kay gulmunna, kulo kay kulumayna kaw. Yehu taya' gaa kuɗ selemu; 34bugolda nam kal kalafi, ti'e ci'e; nam hot di'e: Tuɗgi ɗuwgi cata beɗay goyt waŋŋi, pigit gaa'a, kay na' ti goota vi mulla. 35Nisi kaliya kay pa' gaa'a; may nisi fum hini kayn mi zok ma ka'na, kiyora'a hiɗi ɓa'a tuta. 36Nisi hotay kay vul labara kayni mi Yehu. Nam di'e: Kayni mi va ma Ma-Vatɗin dum hay vun sa ma jobta valamu Eliyas ma Tikbina, hay li ma nam di ala: Durnayna mut sliw Yesabel hay sinena vi Yisreel;#9:36 Ɗuw hay 1 Mul 21:23. 37tuwna vi Yesabel ma muɗ ki zigidikŋa ma kom goy hay sinen nala, hay sinena vi Yisreel, a nisi ma di ala kayn ti Yesabel.

Currently Selected:

2 MULIYANA 9: Massana

Highlight

Copy