2 MULIYANA 2

Ma-Vatɗin sli Eliyas kulo'o, Elise vurna baŋalamu

1Hay li ma Ma-Vatɗin sli Eliyas kulo hay dukalawn hay ɦiwliŋŋa kayni, nisi ka kuɗ tuwsi hiɗi Elise kay tuɗ hay Gilgal. 2Eliyas di tam Elise ala: Nan siɗawaŋu kay naŋ ma mus tani, kay Ma-Vatɗin min gan sunu ta-ta hay Betel. Elise hot dita: Hay sem Ma-Vatɗin ma Irina, hay semda vaŋ kaw, nan as hinaŋ noŋɗi. Nala nisi kalay kuɗ tuwsiya hay Betel.

3Gurona vi sa jobta sa hay Betel kalay goyo kir Elise, nisi ka dum ala: Vaydi kayni Ma-Vatɗin ka sli mulaŋŋa kulo talamu, naŋ wi nala su? Nam hotsi dit ala: Bagi vungiya, nan kaw ka wi'e. 4Eliyas di tam Elise: Nan siɗawaŋu kay naŋ ma mus tani, kay Ma-Vatɗin min gan sunu hay Yeriko. Nam hot dita: Hay semda vi Ma-Vatɗin ma irina hay semda vaŋ kaw, nan as hinaŋ noŋɗi. Nala nisi ma' kaf tapay kuɗ tuwsiya, nisi co hay Yeriko.

5Gurona vi sa jobta sa ay hay Yeriko co kat Elise, nisi di talamu: Naŋ wi ala Ma-Vatɗina min sli mulaŋŋa vaydi kulo kaŋu su? Nam hot dit ala: Nan kaw ka wi kayni, bagi vungiya. 6Eliyas di talamu: Nan siɗawaŋu, musaŋ tani, kay Ma-Vatɗina min gan goy kel Yordan. Nam hot dita: Hay semda vi Ma-Vatɗina, hay semda vaŋ kaw, nan as hinaŋ noŋɗi. Nisi ma' pete kalay kuɗ tuwsiya hay hagata.

7Sum sa jufayn dok-vasl jar gurona vi sa jobta co'o, nisi lak goy gine'e, voksi ɗiger, Eliyas hiɗi Elise lak kel niy-lumna Yordan may. 8Bugol kayni Eliyas yaw sligara valamu, ɗutumu, nam ci niyna, niyn iram ɓuraw goyo. Liyn so goyo, nisi jik hayamu kay kal kulo gal hena. 9Hay li ma nisi ɦaw kulo ɦawna, Eliyas di tam Elise: Naŋ ma joban kay va ma naŋ min ala nan ma lum taŋu, jew a nan ma sliys kulo gine hiɗi naŋu. Elise hot dita: Nan siɗawaŋ kayn ala ŋusta vaŋ ta hayaŋga ma li hayan sem ma'! 10Eliyas di'e: Naŋ jobom kayn mi va ma lop ŋolo. May hay li ma slan kulon ɗawn la naŋ wanawa hiɗi iraŋu, van kayni ma li taŋu ki kayn nala; la may naɗi, van kayni as li taŋɗi may.

11Hay li ma nisi ka tuɗ voksi hiɗi kaslan vunsiya, keke-ma-duura ma tuwam doy kuwa, hiɗi kulumay ma tuwam doy kuwa kaw munsi jarsi goyo, ki kayn nala Eliyas kalay kulo hay wuralawna jar ɦiwliŋŋa. 12Elise ka ɗuwa, ka siwel ala: Bunu, bunu! Keke-ma-duura vi Israyel hiɗi sum sa ɓey kalamna! Nam viy goy kiramu. Nala Elise yaw sligara valamu, nam jetem iram goy ma', 13sligar ma Eliyas hinim cukay gaana nam yawamu. Nam hot bugolomu, kal col kel niy-lumna Yordan; 14sligar ma Eliyas hinim cukay gaana nam yawamu, nam ci niyna ka di ala: Ma-Vatɗina Lawna vi Eliyas ka arige? Nam kaw, nam ci niyna, niyn ɓuraw goyo, nam jik hayamu, kal kulo gal hena may.

15Gurona vi sa jobta sa ay lakay vokom ɗiger hay Yerikona, hay li ma irsi wumu, nisi di'e: Ŋusta vi Eliyas cukawa kay Elise. Nisi kalay ŋafam iramu, nisi girif gaa vokomu kaw. 16Nisi di talamu: Humaŋu, jar sa sunda vaŋ tani, sum sa kursulina ka dok-vasl; naŋ min ala nisi ma tuɗ gar mulaŋŋa su? La li ŋalɗi, ŋusta vi Ma-Vatɗin kal hiɗi nam kayni, gum kulo kay hiɗiya lebo hay liy ma beɗ klasige. Elise hot dit ala: Nigi may cuksiɗi. 17May nisi so tuwsi talam ta-ta, nala nam ala nigi cuksiya. Nisi cuk sum sa dok-vaslna, nisi gar Eliyas ta-ta ir buur ɦidi, nisi may fumɗi. 18Hay li ma nisi hotay kat Elise hay Yeriko, nam ka disi ala: Nan digi ala nigi may tu'ɗi ɗisu?

Niyna vi Yeriko

19Sum sa hay hoyok-ziyna di tam Elise ala: Sam-ŋolla, hoyok-ziyn tan kayni ŋaa'a kay li ziy haya ki naŋ ka wum nala, may niy ma hayamna joo'o, nagat getiya kaw.#2:19 Nagat gediya Min di ala sle ma hay nagata sumuna, farayna hiɗi jafn kaw may vu'ɗi. 20Elise di'e: Marangi tasa-beɗayna ma wulina, cukgi mandan haya. Nala nisi maramta may. 21Nam tuɗ hay liyn ma niyn laway goy hayam pana, cuk mandan haya, ka di ala: Ma-Vatɗin di'e: Nan muɗ niyn kayni goy ŋaa'a, mitta ma co kuɗum loɗi lay, getda ma co kuɗum pa loɗi lay. 22Ki kayn nala niyn muɗi goy ŋaa'a, ta-ta hay buur ma wulinna, kuɗ yoboy ma Elise dumna.

Gurosguray sa hay Betella

23Nam fokis ɗawni kal Betel, hay li ma nam ka tuɗ hay haga ma jik kulona, gurosguray sa gurayna cukay goy hay hoyok-ziyn pa, tun caw cen kuɗumu. Nisi ka dum ala: Jikaŋ kulo'o, yaŋ kuloti'! Jikaŋ kulo'o, yaŋ kuloti'! 24Nam muɗ iram bugolomu kay sarsiya. Nam beɗsi hay semda vi Ma-Vatɗina. Ki kayn nala ursena#2:24 Ɗuw fotona vi ursena hay Wŋ 13:2. ma' cukay goy kuɗ jurut pa, jet gurosgurayn goy kuɗsi dok-fiɗi yam ma'. 25Hay ɗawnis pa nam kalay kulo kay hiɗiyta vi Karmel, ɗawni pa lo nam hot hay Samariya.

Currently Selected:

2 MULIYANA 2: Massana

Highlight

Copy