2 MULIYANA 11

Atali ti mul kay Yuda

2 Lml 22:10-12

1Hay li ma Atali sum Ahasiya hum ala goora va' mitiya, na' fokay kulo'o, jafna vi mulda na' cisi goy kafe. 2May Yoskeba, goota vi mulla Yoram, ɓasum Ahasiyata, na' vi Yowas goora vi Ahasiya, na' slum goy jar gurona vi mulla, hay li ma nisi ci mulla, na' vulum hay ɓam goota ta suna'ta hay ziyt ta buura. Na' ŋayam goyo kay Atali may fi a cum goy loɗi. 3Nam mus goy ŋayay ir busat karkiya hiɗi Yokseba, hay ziyna vi Ma-Vatɗina. Hay na'ta ti mulda hay nagat kayn ti Atali.

Atali ciy goyo, Yowas vurnay hay mulda

2 Lml 23

4Hay busata siɗiyata, Yehoyada cuk sumuna kay gar sum sa ŋulona vi vok ma kisna vi sa Kariyena,#11:4 Sum segena var ala sa Kariyena kayni si sa Keretiyena. 2 Sam 8:18. hiɗi sa jaŋŋa, nam marsi talamu hay ziyna vi Ma-Vatɗina, nam jun bonot hiɗi nisiya, nam ɗeksi kay goora vi mulla. 5Bugolda nam ka vulsi dita ala: Kayni mi va ma nigi ma lumna. Sum sa jargiya sa cuk hay lopna hay buura vi sabatna, gal ma ɦidina visiya as ŋom ziyna vi mulla, 6gal ma ɦidi hena hay vun-galana vi Sur, gal ma ɦidi hena hay vun-galana bugol sa jaŋŋa; nigi ma lak jigere kay ŋom vun-ziyna, kay hin sa kal kalafɗi. 7Vokŋa vigi hena ma ma'na, nisi kaf sa cuk goy hay ŋomda hay buura vi sabatna, ma ŋom ziyna vi Ma-Vatɗina kat mulla: 8Nigi ma ŋuy mulla goy hay galam kafe, gigekaw hiɗi sle-ma-duura valam hay ɓalamu ɓalamu, la sa gigekaw min kalay jargiya, nigi ma cum goyo; nigi ma lak goboy kat mulla hay li ma nam kal goyo, hay li ma nam kalay kalafi kaw.

9Sa ŋulona vi vok ma kisna li kuɗ dita vi mul-ma-ɗifinna Yehoyada kafe; nisi yaw sumuna visi kafe, sum sa kalay hay ŋomda hay buura vi sabatna hiɗi sa cuk goy hay ŋomda hay buur ma sabatna kaw, nisi kalay kat mul-ma-ɗifinna Yehoyada. 10Mul-ma-ɗifinna vul kawayna hiɗi marayna hay ɓam sa ŋulona vi vok ma kisna hiɗi vok ma birimna, nam ma ay vi mulla David pa, nam ka lakay hay ziyna vi Ma-Vatɗina. 11Nisi sa jaŋŋa, gigekaw hiɗi sle-ma-duur hay ɓalamu ɓalamu, nisi ŋuy mulla, nisi lak hay gal ma jufna ta-ta hay gal ma gulla vi ziyda kaw. 12Mul-ma-ɗifinna mar goora vi mulla kulo talamu, nam tun kuroŋŋa hiɗi di-goyta hay yalamu. Nisi tunum mulu, nisi ɦok mul kalamu, nisi ci ɓisiya, ka di ala: Mulla mus iri musge.

13Hay li ma Atali hum suwana vi sa jaŋŋa hiɗi sumun kafe, na' co kat sumuna hay ziyna vi Ma-Vatɗina. 14Hay li ma na' ɗuw kayni, mulla ka musi kulo kay jaŋgalla, ki muliya segen ka li nala; sa ŋulona valamu hiɗi togolomna ka goboy talamu: Sum sa hay nagat kaf ka hiɗi firita, nisi ka buw togolomna. Atali jet sligara va' goyo, na' ka ciriy ala: Vun ma ŋirayna! Vun ma ŋirayna! 15Ki kayn nala mul-ma-ɗifinna Yehoyada vul dit kayni tam sa ŋulona vi vok ma kisna, sa ay tuni vok sojena, nam ka disi ala: Nigi ma va' goy gine hiɗi nigiya, sum sa tap kuɗa'na kaf nigi ma cisi goyo hiɗi kew-gaferaŋa. Kay mul-ma-ɗifinna di ala: Nigi ma ca' kalaf hay ziyna vi Ma-Vatɗinɗi. 16Nisi kota' liyna, na' kalay hay ziyna vi mulla, jik hay hagata vi kulumayna, kayni mi liyn ma nisi ca' hayamna.

17Yehoyada jun bonot jar Ma-Vatɗina hiɗi mulla hiɗi sumuna, ala hiɗi bono na'ta nisi ma lin si sumuna vi Ma-Vatɗina; nam jun bonota jar mulla hiɗi sumuna kaw. 18Sum sa hay nagat noŋ kaf cuk hay ziyna vi Baal, nisi ɦo ziy namna gaa'a, giwin-ma-ɗifinna valamu hiɗi slen ma slum nalana nisi tom goy noŋ kafe, Matan mul-ma-ɗifinna vi Baal nisi cum gaa vok giwin-ma-ɗifinna. Mul-ma-ɗifinna Yehoyada lak sum sa ŋomda hay ziyna vi Ma-Vatɗina. 19Nam yaw sa ŋulona vi sum sa kisna, sa Kariyena hiɗi sa jaŋŋa, hiɗi sum sa hay nagat kafe, nisi jik mulla gaa'a hay ziyna vi Ma-Vatɗina pa, nisi cuk kalaf hay ziyna vi mulla, nisi jik hay vun-galana vi sa jaŋŋa, Yowas mus kay zlamda-mulda may. 20Sum sa hay nagat kaf ka li firiya, hoyok-ziyn tuni ŋal kiliŋ may. Nisi ci Atali goy hiɗi kew-gaferaŋa hay ziyna vi mulla.

Currently Selected:

2 MULIYANA 11: Massana

Highlight

Copy