2 KORINTENA 5

1Kay numa wi ala, la ziyna vuma' ma gaa hay nagat tanna, ma koti hiɗi guɗuk ɦawana ɦo gaa'a, ziyna vuma ma koti hiɗi ɓam Lawna ka hay wuralawna, namu mi ziyna ma vatɗina ma may koti hiɗi ɓam saɗi.#5:1 Guɗukŋa lebo ziyna ma nam ka law kalam tan kayni mi tuwna valamu. Ɗuw 2 Pet 1:13-14. 2Hay na'ta numa ka ci lasi hay guɗuk ma gaa tanna, dikma ka tuma'a kay cuk ziyna vuma ma wuralawna katma'a. 3La nanige kaw, nam ma fuma hiɗi sligar-tuwna cukiya, may goy nalaɗi. 4Kay hay li ma numa ka hay guɗuk ma tanna, numa ka tiya, sutayma' toya, kay numa min fok tuwma goyɗi, may min cuk sligar tuma'a, kay irita ma lig tuwma ma mitna. 5May nam ma kotmaawa kay van kayni mi Lawna, nam ma vulma deŋga vi Ŋustawa.

6Dok-dok numa ka so tuwma'a, kay numa wi ala la numa ka dok-doko lakay hay tuw namna, numa ka goy gine hiɗi Bum-Sumuna. 7Kay numa'a poy hay vida, may hay widaɗi, 8kay numa ka hobay hiɗi kursulita kay hin tuwna goyo, a tuɗ lak vo vi Bum-Sumuna kayni kirma ŋaa suwa. 9May numa min li tuwma kirma jifiy suw pete, la numa lak hay tuwna tani, la numa hin tuw namna kaw. 10Kay nay kaf ma lak vok zlamda-kitata vi Kristu, kay gigekaw ma fi wurakŋa kuɗ va ma nam lum kat tuwamna, la ŋaa'a lebo joo'o.

Li lopna vi tap-jaara

Rom 5:1-11; Efes 4:20-24

11Kay numa wi narta ta kuɗ Bum-Sumuna, kuɗ kayni numa gar ala sumun ma huma; Lawna wuma'a, nan var ala hay tap-wida vigiya nigi ma wuma'a kaw. 12Numa min ɗek tuwma vokgi sem mara loɗi, may numa vulgi liyna kay nigi ma subur tuwgi kuɗma'a, kay nigi ma hot dita tam nisi sa gar subur-tuwta kay sle ma goy jiyna, may kay sle ma hay dikga kalafnaɗi. 13Kay na'ta la ŋalda vuma' baya, kayni kay Lawna, may la ŋalda vuma' ka tuma'a, kayni kigi nigiya may. 14Kay minda vi Kristu kolawa kuma'a, numa sa poŋ ir slen kaynawa, sa ma kepna miti kay kafe, nala nay kaf mitawa kaw; 15nam miti kay kafe, kay nisi sa ka irina ma lak iri kay tuwsi loɗi, may kay nam ma dayay kulo kisiya.

16Kay na'ta wulini pa, numa as wi sa hay sliwna loɗi, la numa wi Kristu hay sliwna (jewe) kaw, numa (wulin) as wum nala loɗi. 17La sa ka hay Kristu, nam muɗi wuliya, sle ma busayna kaf vati goyo, ɗuwgiya, slen pet muɗi wuliya. 18Slen namna kayn kaf may goy vi Lawna, nam ma toyayawa hiɗi namu hay Kristu, vulay lopna vi tap-jaarawa kaw. 19Kay Lawna ka hay Kristu, nam toy jar sa nagatna hiɗi namu, ta-ta nam ŋa raw-goyta vi sumunɗi, nam vulay yoboyna vi tap-jaara hay dikaya kaw.

20Nala numa muɗi si sa cuki sunna vi Kristu, ki Lawna kay tuwamu ka kus yoboyn hiɗi vunma nala. Numa siɗawgi hay baŋal Kristu ala, toygi jargi hiɗi Lawna. 21Nam ma bay wi sulukŋa, nam muɗum goy sulukŋa kaya, kay nay ma muɗ ɗigere vok Lawna hay namu.

Currently Selected:

2 KORINTENA 5: Massana

Highlight

Copy