Zacarías 9
9
Israelpa enemigonkuna castigasqa kananmanta
1 #
Is 17.1-3; Jer 49.23-27; Am 1.3-5. Hadrac llaqtapa chaynataq Damasco llaqtapa contranpim profeta Zacariasnintakama Tayta Dios kaynata rimarirqa:
Tayta Diospam Siria lawpi llaqtakunaqa,
paypataqmi Israelpi llapallan ayllukunapas.
2 #
Is 23.1-18; Ez 26.1—28.26; Jl 3.4-8; Am 1.9-10; Mt 11.21-22; Lc 10.13-14. Tayta Diospam Damascopa hichpanpi Hamat llaqtaqa,
payllapataqmi yachaysapa Tiro llaqtawan Sidón llaqtapas.
3Tiro llaqtam murallankunata hatarirachin,
qollqetam ñutu allpata hinaña huñukurun,
qoritapas ñanpi mituta hinañam montokurun.
4Ichaqa Señormi wakchayachinqa,
atiynintapas lamar qochapim chinkarachinqa,
kikin llaqtatapas ninam rupanqa.
5Chaynata rikuspam Ascalón llaqtapas mancharikunqa,
Gaza llaqtapas nanaywanmi ñakarinqa,
Ecrón llaqtapas pantaypim rikurinqa.
Gaza llaqtapa reyninpas chinkanqam,
Ascalón llaqtapas mana runayuqmi chunninqa.
6 #
Is 14.29-31; Jer 47.1-7; Ez 25.15-17; Jl 3.4-8; Am 1.6-8; Sof 2.4-7. Asdod llaqtapipas mana reqsisqa runakunañam yachakunqaku,
chaynatam filisteokunapa hatunchakuyninta puchukachisaq.
7Aycha mikusqantapas yawarnintintam siminmanta qechurusaq,
millakuypaq kaqkuna mikusqantapas kirunmantam aysarusaq;
chaywanpas paykunamantam wakinta ñoqapaq puchuchisaq,
hinaptinmi Judapa partenña kanqaku.
Ecrón llaqtapas Jebús llaqta hinaraqmi kanqa.
8Ñoqañataqmi runaykunapa muyuriqninpi sayaykuspay waqaychasaq,
manam pipas yaykunqachu ni lloqsinqachu,
ñakarichiqkunapas manañam chaynintaqa pasanqakuñachu,
kunanqa kikiyñam llaqtayta qawaspay waqaychasaq.
Israel nacionpa reyninmanta
9 #
Mt 21.5; Jn 12.15. ¡Sión llaqtapi yachaqkuna llumpayta kusikuychik!
¡Jerusalenpi yachaqkuna kusikuymanta qapariychik!
Reynikichikmi qamkunaman hamuchkan,
Payqa allin ruwaq hinaspa salvakuqmi,
asnopi silladam humildella hamuchkan,
malta asnochapim hamuchkan.
10 #
Sal 72.8. Paymi Efrainpa carretankunatawan
Jerusalenpa caballonkutapas chinkachinqa,
guerrapaq arcokunatapas pakipanqam.
Nacionkunapa hawkayaynintam rimarinqa,
lamar qochapa kaylaw patanmanta waklaw patankamam munaychakunqa,
Eufrates mayumanta qallaykuspam
kay allpa pachapa patankama munaychakunqa.
Israel nacionta Dios salvananmanta
11Yawarwan pactota ruwasqanchikraykum,
mana yakuyuq pozokunapi presochasqa kasqankumanta
runaykikunata libramusaq.
12Librasqa kayta suyaqkuna,
murallasqa llaqtaykichikman kutikuychik.
Kunanmi qamkunaman willachkaykichik,
iskay kuti mastaraqmi kutichipusqaykichik.
13Judatam guerrapaq arcota hina chutaruni,
Efrainñataqmi flechankuna kanqa.
Sión llaqta, qamtam espadata hina ruwasqayki,
hinaspaymi wawaykikunata
Grecia nacionpa contranpi hatarichisaq.
14Tayta Diosmi llaqtanpi qawachikunqa,
flechankunatapas llipyata hinam kacharinqa;
Tayta Diosmi trompetata tocanqa,
sur lawmanta hatarimuq remolino wayrapa chawpintam hamunqa.
15Tukuy Atiyniyuq Tayta Diosmi llaqtanta waqaychanqa,
paykunañataqmi enemigonkupa warakanan rumikunata sarupanqaku,
hinaspam enemigonkuta mikurunqaku,
yawarnintapas vinota hinaraqmi tomanqaku,
yawarwan huntasqa plato hinaraqmi kanqaku,
altarpi waqrakuna hinaraqmi kanqaku.
16Tayta Diosmi ovejakunata salvachkaq hina
chay punchawpi llaqtanta salvaykunqa,
paykunañataqmi coronapa alhaja ruminkuna hinaraq
allpanpi kancharinqaku.
17¡Mayna allinraq kanqa!
¡Mayna sumaqraq kanqa!
Trigopas jovenkunatam kusichinqa,
vinoñataqmi sipaskunata kusichinqa.
Currently Selected:
Zacarías 9: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
