Zacarías 12
12
Jerusalén llaqta librasqa kananmanta
1Israelpaq Tayta Diospa rimarisqan simikuna. Cielokunata mastariq, kay pachapa cimientonta churaq hinaspa runaman kawsay qoq Tukuy Atiyniyuq Tayta Diosmi kaynata nin:
2Ñoqam Jerusalenta muyuriqninpi nacionkunapaq sinkachikuq vasota hina churani. Chay llaqtakunam Jerusalenta muyuriruspanku, Judapa wakin llaqtankunatapas atacanqaku. 3Chay punchawpim Jerusalén llaqtata, llapa nacionkunapa contranpi llasa-llasaq rumita hina ruwarusaq; pipas hoqariy munaqtaqa chay rumim ñuturunqa. Hinaptinmi kay pachapi llapallan llaqtakuna contranpi huñunakunqaku. 4Tayta Diosmi kaynata nin: Chay punchawpim llapa caballokunata mancharichispay sillakuqkunatañataq locoyarachisaq. Judapa mirayninkunata waqaychaspaymi nacionkunapa caballonkunatañataq ñawsayarachisaq. 5Chayta qawaykuspankum Judá nacionpi kamachikuqkuna sonqonkupi ninqaku: “Tukuy Atiyniyuq Tayta Diosmi Jerusalenpi yachaqkunapa Diosninqa, paytaqmi kallpanchaqninkupas”, nispanku. 6Chay punchawpim Judá nacionpi kamachiqkunata yanta chawpipi sansata hina ruwarusaq chaynataq gavillakunapa chawpinpi ratachkaq ninata hina, hinaptinmi muyuriqninpi nacionkunata alleq lawman ichoq lawman paykuna kañanqaku. Jerusalenpi runakunañataqmi hina llaqtankupi yachanqaku.
7Tayta Diosmi Judá naciontaraq puntata salvaykunqa, chaynapi Davidpa castankunawan Jerusalenpi yachaqkuna, Judá nacionpi mana hatunchakurunankupaq. 8Chay punchawpim Jerusalenpi yachaqkunata Tayta Dios waqaychanqa; chay tiempopiqa manchati runapas rey David hinam allinnin qari-qari kanqa, rey Davidpa mirayninkunañataqmi Dios hinaraq kanqaku, ñawpaqninkuta riq Tayta Diospa angelnin hinaraqmi kanqaku. 9Chay punchawpim Jerusalenpa contranpi hamuq nacionkunata puchukachisaq.
10 #
Jn 19.37; Ap 1.7. Davidpa mirayninkunamanwan Jerusalenpi yachaqkunamanmi ichaqa llakipayakuq hinaspa mañakuq espirituta chaqchurimusaq. Hinaptinmi ñoqata, lanzawan tuksisqankuta qawaspa, piwi churinkumanta hina waqanqaku, sapallan wawankumanta hinam llakikunqaku. 11Chay punchawmi Jerusalén llaqtapi sinchi waqakuy kanqa, Hadad-rimón sutiyuq idolonkumanta Meguido pampapi waqasqankuta hinam waqanqaku. 12Kay nacionpi yachaqkunam, castankuman hina sapakama waqanqaku: Davidpa mirayninkunam sapaqpi waqanqaku, warminkupas sapaqpitaqmi waqanqaku; Natanpa mirayninkunam sapaqpi waqanqaku, warminkupas sapaqpitaqmi waqanqaku. 13Leví castakunam sapaqpi waqanqaku, warminkuñataqmi sapaqpi; Simeipa castankunam sapaqpi waqanqaku, warminkuñataqmi sapaqpi. 14Wakin ayllukunapas chaynatapunim sapakama waqanqaku, warminkupas sapaqpitaqmi waqanqaku.
Currently Selected:
Zacarías 12: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
