Zacarías 10
10
Llaqtanta Dios waqaychananmanta
1Tayta Diosmanta poqoy parata mañakuychik,
hinaptinqa yana puyukunata hatarichiq Diosmi
sinchi parata qomususpaykichik
allpaykichiktapas ruruchinqa.
2 #
Mt 9.36; Mr 6.34. Idolokunapa rimasqanqa llullam,
qatipaqkunapa rikusqanpas pantaymi,
yanqa musqoy hinallam willakuyninkupas,
yanqa rimayllam sonqo tiyachita rimasqankupas.
Chayraykum runakunaqa,
mana michiqniyuq ovejakuna hina llutanpi purispa
michiqninku mana kaptin ñakarichkanku.
3Chayraykum Tayta Dios kaynata nin:
Michiqkunapa contranpim sinchita piñakuruni,
llaqtay nanachikuq runakunatam castigasaq.
Tukuy Atiyniyuq Tayta Diosmi,
Judapa mirayninkunata ovejankunata hina waqaychaqmi,
paykunata guerrapaq kallpasapa caballonta hina ruwanqa.
4Judamantam lloqsinqa
wasipa cimientonpi esquina rumipas,
carpata takyachiq estacapas,
guerrapi peleana flechapa arconpas.
Paymantataqmi lloqsinqa llapa kamachikuqkunapas.
5Paykunaqa kanqaku mitupa hawanpi enemigonta sarupaq soldadokuna hinam;
Tayta Diospa yanapakuyninwanmi paykunaqa peleanqaku.
Sillada tropakunatapas paykunaqa penqaymanmi churanqaku.
6Judapa mirayninkunatam kallpanchasaq,
Joseypa mirayninkunatam salvaykusaq,
llakipayasqayraykum paykunata allpankuman kutichimusaq,
mana haykapipas qepanchasqay hinam kanqaku.
Ñoqa Tayta Dios, Diosninku kasqayraykum
mañakuyninkutapas uyariykusaq.
7Efrainpas allinnin qari-qari soldado hinam kanqa,
vino upyaqpa hinam sonqonpas kusikunqa,
wawa-churinkupas rikuspam kusikunqaku,
sonqonpas Tayta Diospim kusikunqa.
8Salvaykuspaymi silbarispay paykunata huñurusaq,
hinaptinmi pasaq tiempokunapi hinaraq
achkallaña kanqaku.
9Nacionkunamanmi paykunata cheqerachisaq,
hinaptinmi chay karu llaqtakunapi ñoqamanta yuyarinqaku,
huk punchawmi wawa-churintin kutimunqaku.
10Egiptomantam paykunata kutichimusaq,
Asiriamantam paykunata huñumusaq,
Galaadmanwan Libanoman pusaptiymi
achkallaña kasqankurayku allpapas pisinqaraq.
11Lamar qochapa olanta sayarachiptiymi,
lamar qochapa chawpinta pasamunqaku.
Nilo mayutam chakichisaq,
Asiriapa hatun tukuynintam puchukachisaq,
Egiptopa atiynintam tukurusaq.
12Ñoqa Tayta Dios kallpanchaptiymi
sutiypi ñawpaqman rinqaku.
Ñoqa Tayta Diosmi chaynata nini.
Currently Selected:
Zacarías 10: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
