Zacarías 1
1
Diosman runakuna kutirikunankumanta
1 #
Esd 4.24—5.1; 6.14. Rey Darío iskay wata pusaq killanña munaychakuchkaptinmi, Iddopa willkan chaynataq Berequiaspa churin Zacariasta Tayta Dios kaynata rimapayarqa:
2Ñoqa Tukuy Atiyniyuq Tayta Diosmi, ñawpaq taytaykichikkunapa contranpi llumpayta piñakururqani.
3Chaynaqa, kaynata nimuy, Tukuy Atiyniyuq Tayta Diosmi kaynata nin: “Kutirikamuwaychik hinaptinqa ñoqapas qamkunamanmi kutirikamusaq”. Tukuy Atiyniyuq Tayta Diosmi chaynata nin. 4Amayá taytaykichik hinaqa kaychikchu, paykunatam ñawpaq profetakuna kaynata qaqcharqaku, Tukuy Atiyniyuq Tayta Diosmi kaynata nin: “Mana allin kawsaynikichikmantawan mana allin ruwaynikichikmanta kutirikamuwaychik”, nispa. Ichaqa paykunam mana uyariqpas tukurqakuchu, nitaqmi kaqpaqpas hapirqakuchu. Tayta Diosmi chaynata nin. 5Kunanqa ¿maytaq chay ñawpaq taytaykichikkunaqa? ¿Profetakunapas wiñaypaqchu kawsanqaku? 6Profetaykunawan willachisqay simiykunawan kamachikuyniykunam ichaqa ñawpaq taytaykichikkunata hayparurqa. Hinaptinmi paykuna ñoqaman kutirikamuspa nirqaku: “Tukuy Atiyniyuq Tayta Diosmi tanteasqanman hina ñoqanchikwan ruwarun, payqa imaynam kawsasqanchikman chaynataq ruwasqanchikman hinam ñoqanchikwan ruwarun”, nispanku.
Caballokunata visionpi Zacarías rikusqanmanta
7Rey Darío iskay wataña munaychakuchkaptinmi, chunka hukniyuq killapa otaq Sebat sutiyuq killapa iskay chunka tawayuq punchawninpim, Tayta Dios rimapayarqa, Iddopa willkan hinaspa Berequiaspa churin Zacariasta. 8#Ap 6.4.#Ap 6.2.Huk tuta visionpi rikusqantam profeta Zacarías willakurqa kaynata: Huk runatam puka caballopi silladata rikurqani. Paymi arrayankunapa kanan qechwapi sayachkasqa. Qepanpiñataqmi sayachkasqaku puka caballokuna, bayo caballokuna hinaspa yuraq caballokuna. 9Chaymi tapurqani:
Señorlláy ¿Pikunataq wak sillada runakunaqa? nispay.
Hinaptinmi rimapayawaqniy ángel niwarqa:
Ñoqam qawachisqayki pikunam kasqanta, nispa.
10Hinaptinmi arrayankunapa chawpinpi kaq runa nirqa:
Kay silladakunaqa kay pachata patan-patan purimunankupaq Tayta Diospa kachamusqankunam, nispa.
11Chay silladakunañataqmi, arrayankunapa chawpinpi sayaq Tayta Diospa angelninman kaynata nirqaku:
“Ñoqaykum kay pachata patan-patan puriramuniku, hinaspam rikuramuniku kay pachaqa mana imapa pasasqan hawkalla kasqanta”, nispanku.
12Chaymi Tayta Diospa angelnin qaparirqa kaynata:
¡Tukuy Atiyniyuq Tayta Dios, qanchis chunka watañam Jerusalenpaqwan Judá nacionpaq piñakurunki! ¿Hayka unayraqtaq pasanqa paykunata llakipayarinaykipaq? nispa.
13Hinaptinmi rimapayawaqniy angelta rimapayamuspan, kuyapayakuq hinaspa consuelakuq simikunata Tayta Dios nimurqa. 14Chaymi rimapayawaqniy ángel kamachiwarqa kaynata willakunaypaq:
Tukuy Atiyniyuq Tayta Diosmi kaynata nin: Ñoqaqa anchatam Siontawan Jerusalén llaqtata kuyani. 15Ichaqa mana imapas qokuq nacionkunapaqmi llumpayta piñakuruni. Tumpallataraq piñakusqayraykum paykuna aswanraq mana allinta ruwarqaku. 16Chayraykum Tayta Dios kaynata nin: Kunanmi Jerusalén llaqtata yapamanta llakipayaykusaq, hinaptinmi temploypas chaynataq Jerusalenpas musoqmanta hatarichisqa kanqa, nispa.
17Chay angelqa kamachiwarqataqmi kaytapas:
Tukuy Atiyniyuq Tayta Diosmi kaynata nin: “Llaqtaykunatam huktawan allin kaqkunawan llimparichisaq. Kikiypunim Sión llaqtata consuelaykusaq, hinaspaymi Jerusalentapas kaqllamanta llaqtaypaqña akllakuykusaq”, nispa.
Waqrakunatawan herrerokunata Zacarías rikusqanmanta
18Huktawan qawarispaymi visionpi rikururqani tawa waqrakunata. 19Chaymi rimapayawaqniy angelta tapurqani:
¿Ima ninantaq kay waqrakunaqa? nispay.
Hinaptinmi payñataq niwarqa:
Kay waqrakunaqa Judata, Israelta chaynataq Jerusalentapas cheqerachiq atiykunam, nispa.
20Chaymantam Tayta Dios qawachiwarqa tawa herrerokunata. 21Chaymi tapurqani:
¿Imapaqtaq kay herrerokuna hamurunku? nispay.
Hinaptinmi payñataq niwarqa:
Imaynam chay waqrakuna Judá nacionta cheqerachirqa manaña pipas uman hoqariy atinankama, kay herrerokunañataqmi hamurunku Judá nacionta waqrachkaq hina manchakuypaqta katkatatachispa, atiyninkuwan cheqerachiq nacionkunapa waqranta kuchuspanku pampaman wichichinankupaq, nispa.
Currently Selected:
Zacarías 1: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
