Tito 3
3
Iñiqkunapa imam ruwananmanta
1Iñiqkunatayá yuyarichiy, kamachikuqkunaman, autoridadkunaman sujetakunankupaq, kasukuqyá kachunku, allinkuna ruwayta chaylla ruwachunku. 2Amayá pimantapas mana allintaqa rimachunkuchu, hawkalla kawsakuspa kuyapayakuq kachunku, llampu sonqo kasqankuta lliw runakunaman ima ruwasqankupi qawachikuchunku.
3Ñawpaqtaqa ñoqanchikpas karqanchik, mana yuyayniyuqmi hinaspa mana kasukuqmi, pantaypi kaspam aychapa munayninkunapi chaynataq tukuy imaymana viciokunapa apasqan karqanchik, mana allinllapi yuyaymanaspam envidiakuspa kawsarqanchik, cheqnichikuspam kikinchikpurapas cheqninakurqanchik. 4Aswanqa salvaqninchik Diosmi sumaq sonqo kaynintawan kuyakuyninta runakunaman reqsichiwarqanchik. 5Payqa salvawarqanchik manam allinkuna ruwasqanchikraykuchu, aswanqa llakipayawaspanchikmi Chuya Espirituntakama, huchanchikmanta mayllaykuwaspanchik musoqmanta nacechiwarqanchik hinaspam musoq runataña ruwaykuwarqanchik. 6Salvaqninchik Diosninchikmi Jesucristontakama Chuya Espiritunta chaqchurimuwarqanchik. 7Kuyawaspanchikmi payqa mana huchayuqtaña chaskiykuwanchik, chaynapi confianzawan suyasqanchik wiñay kawsayta chaskinanchikpaq.
8Kay palabraqa cheqapmi, chayraykum aswanraq yachachinaykita munani, chaynapi Diosman iñiqkuna imapas allin ruwaykunapi kanankupaq. Kayqa mayna sumaqmi hinaspa runakunapa allinninpaqmi. 9Ichaqa yanqa atipanakuykunamanta karunchakuy, ñawpaq taytakunapa sutin yachaymanta hinaspa Moisespa leyninmanta atipanakuspa piñanakuykunamanta, chaykunaqa mana imapaq valeqmi nitaqmi ima allintapas apamuwanchikchu.
10Iñiqkunata umachaspa rakinakuyman apaq runataqa iskay-kimsa kutikama anyaptiki mana uyarikuptinqa qarqoruy. 11Chay runaqa pantayman urmaykuspanmi huchallikuchkan, payqa yachakuchkanmi castiganapaqña kasqanta.
Titoman imam kunasqanmanta
12 #
Hch 20.4; Ef 6.21-22; Col 4.7-8; 2 Ti 4.12. Artemasta otaq Tiquicota qanman kachamuptiyqa Nicópolis llaqtapi tupananchikpaqmi utqayman hamunki. Chaypim poqoy tiempo pasayta munachkani. 13#Hch 18.24; 1 Co 16.12.Abogado Zenastawan Apolostayá tukuy atisqaykiwan yanapaykuy, chaynapi illasqankupi mana imankupas pisinanpaq. 14Iñiqmasinchikkunapas allinkunata ruwaspa mana imayuqkunaman yanapaykuyta yachachunku, chaynapi ruwasqankuwan allin ruruchkaq hina kanankupaq.
Cartapa tukupayninmanta
15Llapallan ñoqawan kaqkunam rimaykamusunkichik. Rimaykapuwayá kuyaqninchik iñiqmasinchikkunatapas. Diosninchikyá kuyapayakuyninta qamkunaman chaqchurimusunkichik.
Currently Selected:
Tito 3: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
