Marcos 8

Tawa waranqa runakunata mikuchisqanmanta

(Mt 15.32-39)

1Chay punchawkunapim achkallaña runakuna huktawan huñunakururqaku, chaymi mikunankupaq mana imapas kaptin, discipulonkunata qayaspan Jesús nirqa:

2Kay runakunamantam llakipayarikuni, paykunaqa kimsa punchawñam ñoqawan kachkanku, manam imapas mikunankupaq kanchu, 3mana mikusqata wasinkuman kachaykuptiyqa ripusqan ñankunapichá desmayarunqaku, wakiqninkuqa karukunamantaraqmi hamurqaku, nispa.

4Discipulonkunañataqmi nirqaku:

¿Imatataq mikuchichwan mana runapa kasqanpiqa? nispanku.

5Jesusñataqmi paykunata tapurqa:

¿Haykataq tantaykichik kachkan? nispa.

Chaymi paykuna nirqaku: Qanchisllam, nispanku.

6Hinaptinmi llapa runakunata pampapi tiyaykachispan, chay qanchisnintin tantakunata hapiykuspan Diosman graciasta qorqa, hinaspam pakiykuspan discipulonkunaman qoykurqa runakunaman aypunankupaq, chaymi paykunañataq aypurqaku. 7Paykunapaqqa karqataqmi as challwachankupas, chaymi Diosman graciasta qospa chaykunatapas Jesús aypuchirqa. 8Chaymi llapallanku saksanankukama mikurqaku, hinaptinmi puchuqtapas qanchis canastataraq huñururqaku. 9Mikuqkunam karqa yaqa tawa waranqa hina. Mikuruptinkum Jesús aviarurqa. 10Chaymantam discipulonkunawan barcaman seqaruspan Dalmanuta lawman pasakurqa.

Fariseokunapa milagro mañakusqankumanta

(Mt 16.1-4. Lc 12.54-56)

11 # Mt 12.38; Lc 11.16. Fariseokunam hamuspanku Jesuswan atipanakuyta qallaykurqaku, hinaspam wichichiyta munaspanku mañarqaku huk milagrota ruwaspa Diosmanta hamusqanta qawachinanpaq. 12#Mt 12.39; Lc 11.29.Jesusñataqmi llakirikuspan paykunata nirqa:

¿Imanasqataq kay runakunaqa señaltaraq mañawanku? Cheqaptam nikichik, manam ima señalpas ruwasqachu kanqa, nispa.

13Hinaspanmi chay runakunata saqeruspan barcaman qespiykuspan qochapa waklaw chimpanman pasakurqa.

Fariseokunapa levaduranmanta

(Mt 16.5-12)

14Discipulonkunam tanta apayta qonqarurqaku, aswanpas huk tantallam barcapi karqa. 15#Lc 12.1.Jesusmi discipulonkunata nirqa:

Fariseokunapa hinaspa Herodespa levaduranmantayá waqaychakuychik, nispa.

16Chaymi discipulonkuna ninakurqaku:

Tantata mana apamusqanchikraykum chaynataqa nichkan, nispanku.

17Jesusñataqmi rimasqankuta musyaruspan nirqa:

¿Imanasqataq manam tantanchik kanchu nispa atipanakunkichik? ¿Manachu entiendenkichik? ¿Hinallachu sonqoykichik rumirayachkan? 18#Is 6.9-10; Jer 5.21; Ez 12.2.¿Ñawikichik kachkaptinchu mana rikukunkichik? ¿Rinrikichik kachkaptinchu mana uyarikunkichik? ¿Manachu yuyankichik 19chay pichqa tantata pakispa pichqa waranqa qarikunapaq haypachisqayta? ¿Hayka canastatataq puchuqta huñurqankichik? nispa.

Chaymi paykunañataq nirqaku:

Chunka iskayniyuq canastatam, nispanku.

20Qanchis tantamanta tawa waranqa runapaq mirachiptiyqa ¿hayka canasta huntataraqtaq puchuqta huñurqankichik? nispa.

Chaymi paykunañataq nirqaku:

Qanchis canastatam, nispanku.

21Hinaptinmi Jesús nirqa:

¿Chaynaqa, imanasqataq mana entiendenkichikchu? nispa.

Ñawsata Betsaida llaqtapi Jesús sanoyachisqanmanta

22Betsaida llaqtaman chayaruptinkum huk ñawsata Jesusman pusamurqaku, hinaspam llapchaykunanpaq ruegarqaku. 23Chaymi Jesusñataq ñawsata makinmanta aysarikuspan llaqtamanta hawanman pusarurqa, hinaspanmi ñawinman toqaykuspan makinta hawanman churaykuspan tapurqa:

¿Yaqachu rikukuchkankiña? nispa.

24Ñawsañataqmi qawaykachakuspan nirqa:

Runakunatam sachakunata hina rikuchkani, ichaqa purichkaqta, nispa.

25Chaymantam ñawinpa hawanman makinta huktawan churaykuptin qawarikuruspan sanoyarurqa, hinaspanmi tukuy imakunatapas allintaña rikurqa. 26Jesusñataqmi wasinman ripunanpaq kamachispan nirqa:

Amam llaqtamanqa yaykunkichu, nispa.

Jesusqa Cristo kasqanmanta

(Mt 16.13-20. Lc 9.18-21)

27Chaymantam Jesusqa discipulonkunawan Cesarea de Filipo lawpi llaqtakunaman rirqaku. Richkaptinkum discipulonkunata Jesús tapurqa:

¿Pim kasqaytataq runakunaqa ñoqamanta rimanku? nispa.

28 # Mr 6.14-15; Lc 9.7-8. Chaymi paykunañataq nirqaku:

Wakinmi ninku Bautizaq Juan kasqaykita, wakinñataqmi Elías kasqaykita, wakinñataqmi ninku hukkaqnin profeta kasqaykita, nispanku.

29 # Jn 6.68-69. Jesusñataqmi paykunata tapurqa:

Qamkunaqa ¿pim kasqaytataq ninkichik? nispa.

Hinaptinmi Pedro nirqa:

Qamqa Cristom kanki, nispa.

30Chaymi paykunata Jesús kamachirqa ama pimanpas paymanta willakunankupaq.

Jesuspa wañukunanmanta

(Mt 16.21-28. Lc 9.22-27)

31Chaymantam Jesusqa yachachiyta qallaykurqa, runapa Churinqa llumpayta ñakarichisqa kananmanta, ancianokunapa, sacerdotekunapa kamachiqninkunapa, Diospa leynin yachachiqkunapa cheqnisqan kananmanta. Chaynataq wañuchisqa kananmantawan, kimsa punchawman kawsarimunanmantapas.

32Chaykunataqa mana pakaspam willarqa. Chaymi Pedroñataq huklawman pusaruspan Jesusta qaqcharqa. 33Jesusñataqmi discipulonkunaman muyuriykuspan Pedrota qaqchaspan nirqa:

¡Ñoqamanta anchuy Satanás! Qamqa manam Diospa qawasqanta hinachu qawanki, aswanqa runakunapa qawasqanman hinallam, nispa.

34 # Mt 10.38; Lc 14.27. Chaymantam discipulonkunatawan runakunata qayaykuspan nirqa:

Pipas qatiwayta munaspaqa, amaña kikillanpaq kawsaspayá cruzninta qepikuykuspa qatiwachun. 35#Mt 10.39; Lc 17.33; Jn 12.25.Pipas vidanta salvay munaqqa chinkarunqam, ñoqarayku hinaspa evangeliorayku wañuqmi ichaqa vidanta salvanqa. 36¿Imatataq runa hurqokunman kay pachapi kaqkunata ganaruspan vidantañataq pierderuspanqa? 37¿Haykatataq runa paganman vidanta salvananpaq? 38Chaynaqa, pipas mana kasukuq huchasapa runakunapa qayllanpi ñoqamanta hinaspa palabraykunamanta penqakuqtaqa, runapa Churinpas paymantam penqakunqa. Chaynataqa ruwanqa angelninkunawan kuska Taytanpa atiyninpi kutimuspanmi.

Currently Selected:

Marcos 8: RCHQ2

Highlight

Copy